جاج مشوي بالشبك بالفرن

المقادير

• جاجه منظفة ومفتوحة من الظهر بنعمل بالصدر والفخاد شرطات بسكينه حاده
• للتتبيله:
• دبس فليفله
• شطه
• ربع فنحان خل
• ربع فنجان زيت زيتون
• بودرة ماجي
• بابريكا
• توم بودره
• بصل بودره
• كزبره ناشفه
• إكليل جبل منشف
• ملح

الخطوات

بنجهز التتبيله ونتبل الجاجه قبل بليله والتتبيله هي ربع فنجان خل وربع فنجان زيت زيتون ومعلقة كبيره دبس فليفله بنزل وصفتها بمنشور لحاله إن شاء الله ومعلقة شطة ومعلقة بابريكا وتوم مطحون وبصل بودره وكزبره وشوية بودرة ماجي وزنجبيل مطحون و إكليل الجبل منشف وملح بنخلط التتبيله وبندهن فيها الجاجه منيح وبالفتحات وبنتركها بالتلاجه لتاني يوم

تاني يوم بنجيب شبك الشوي الخاص بالمنقل ونحط الجاجه جواته ونسكره وبنكون محمين الفرن علي أعلى درجه ونحط صينيه فيها قصدير وماي ونحط الشبك عليها وندخلها للفرن وكل نص ساعه بنقلب الشبك للوجه التاني ونتركها بالفرن من ١.٥ إلى ٢ ساعه

ونطلعها ونعمل جنبها بطاطا مقلية ومتومه ونحط تحتها خبز صاج مدهون بدبس الفليفله مخلوط مع شوية رب بندوره وشطة

وصحتين وهنا على قلبكن