كيكة التمر مع صوص التوفي طعم مميز
كيكة التمر مع صوص التوفي طعم مميز
المقادير
- 3 كوب طحين
- كوب زيت
- كوب سكر
- كوب حليب سائل
- كوب تمر منزوع النوى او كوب معجون التمر
- كوب مي
- 4 او 3 بيض بحرارة الغرفه
- معلقة فانيلا
- معلقة خل
- 3 معلقه صغيره بكنج باودر
- معلقة قرفه اختياري
- رشة ملح
- لصوص التوفي :
- كوب سكر
- معلقتين زبده
- علبة قشطه 200 غ وممكن اكثر حسب ما بتحبو قوام الصوص
الخطوات
السلام عليكم ويسعد أوقاتكم بكل الخير
اليوم بقدملكم كيكة التمر بصوص التوفي
والطعم لا يوصف الصراحه من الكيكات المميزه
ان شاء الله بتعجبكم بنصحكم بتجربتها
يلااا نشووف الطريقه …..
& اول شي بنجهز التمر ممكن استخدام تمر منزوع النوى بمقدار 12 حبه تقريبا او حسب حجم التمر بننقعه بكاسة مي ساخنه وبعد ما يطرى بنخلطه
عالخلاط الكوكتيل ..او ممكن استخدام معجون التمر بمقدار واحد كوب وبنخلطه عالخلاط مع كوب مي لحتى يتجانسو ..انا استخدمت معجون التمر
وعلى كلى الحالتين بنحتاح للوصفه كوب من التمر المخلوط مع المي
& اولأ بنشغل الفرن عالدرجة حرارة 180 درجه
وبنجهز قالب الكيك او الصينيه بدهنها الزيت ورشها بالطحين
& بنبلش بخفق البيض مع الفانيلا والسكر والخل
بنخفقهم مزبوط لحتى الخليط يصير لونه فاتح وينفخ (هالخطوه من اسباب نجاح الكيك وارتفاعه )
من ثم بنضيف الحليب والزيت وبنخلطهم ما بنطول بالخلط مجرد ما يختفي الزيت والحليب بضيف كوب التمر وبخلطه معهم
& بنبلش بأضافة الطحين المنخول والبكنج باودر ورشة ملح والقرفه بخلطهم من تحت لفوق بالخلاط اليدوي
ملاحظه:(خليط الكيك بكون اثقل من الخليط العادي بشوي هو هيك ما في خوف منه بس ممكن يثقل كثير فبنخففه بحليب سائل حسب الحاجه لانه حسب نوع الطحين المستخدم )
& بفرغه بالقالب وبدخله الفرن عالشبك الأوسط بحتاج من 40 _ 45 دقيقه بنختبر استواءه بعود خشبي
ملاحظه: (طبعا لازم اول ما نخلص تجهيز الخليط ندخله فورا الفرن المحمى مسبقا عشان ما يفقد البكنج تفاعله والكيك يطلع مرتفع معي )
& الكيك صار جاهز بنتركه بالفرن لحتى يبرد ومن ثم بننتقل لتجهيز صوص التوفي
& الصوص طريقته سهله وبسيطه بس محتاج طولة بااال
بنضع السكر عالنار وسط وبنتركه لحتى يبلش يذوب ويصير اللون الابيض خفيف بنبلش نحرك فيه وبنضيفله معلقتين زبده وبحرك عالسريع راح تلاحظي انه بلش يتكتل عادي ما في خوف استمري بالتحريك أهم شي
وبعدين بنضيف علبة قشطه وبنحرك وبنضل نحرك ونحرك ونحرك لحتى تختفي التكتلات تماما
(اذا حبيتي يكون الصوص مش ثقيل بنزيد كمية القشطه )
يفضل عمل الصوص وقت التقديم لانه بثقل لما يبرد يعني نجهزه ونستخدمه فورا )
واذا ما استخدميته فورا عالكيكه وثقل معك بنسخنه عالنار واطيه وبنضيف تدريجيا حليب سائل وبنحرك لحتى نوصل للقوام يلي بدنا أياه
انا زدت حليب سائل لحتى وصلت للقوام يلي بدي اياه للتزين لانه جمد معي شوي تقريبا زدت ثلث كوب حليب سائل بس بالتدريج ومع التحريك
وممكن حفظه بالثلاجه لحين وقت الاستخدام
بنقلب الكيكه وبنزينها بالصوص
وطعمهااا جدا رائع والتوفي مع كيكة التمر ميكس رائع الطعم …ان شاء الله بتجربوها وبتعجبكم
دمتم بكل الخير
