تفريز الفول الأخضر دورة طبخ ١

المقادير

• كمية من الفول الأخضر مقمع ومسحوبة الخيوط الي بالجناب ومقطع حسب التقطيع الي بتحبي
• كمية ماء مغلي
• معلقتين كبار سكر
• ماء بارد

الخطوات

السلام عليكم يا حلوات كيفكم شو اخباركم اشتقتلكم كتيييييير يا غاليات اليوم اجيت وجبت معي شغلة خفيفة لطيفة وكتير ناس هلا بتفرز فول اخضر جيت جبتلكم طريقتي البسيطة لتفريز الفول وان شاء الله افيدكم ويلا ع الطريقة

اول شي بطنجرة ع النار بغلي ماء كمية منيحة حسب كمية الفول وبعد ما تغلي بضيف السكر وبضيف الفول وبغطسو بالماء مزبوط وبخلي يغلي من خمس لثمن دقائق حتى تشوفي صار لونو بلش يفتح عن الخضار شوي يعني دخل ببداية استوى بنشلو من المي المغلية ع مي باردة او مثلجة انا عملتو بمي الحنفية العادية كانت باردة ومشي الحال هههههههههه لانو اصلآ الفول اجاني من اهلي وما كنت مجهزة للتفريز ثلج او مي باردة بس مشي الحال اهم شي

وبعدين بصفي بمصفى حتى تنزل كل المي الي في وبعدين بوزعهم بأكياس التفريز وبحكم اغلاقهم وهاي الطريقة بتقعد من السنة للسنة ما بتغير لونهم ابدآ جربوها ودعولي يا غاليات