خبز بيتي على طريقتي دورة طبخ ٦
خبز بيتي على طريقتي دورة طبخ ٦
المقادير
- ثنين كيلو طحين
- معلقتين خميرة كبيرة
- معلقة صغيرة بكنغ باودر
- ربع معلقة كربونة
- فنجان قهوة سكر
- معلقة كبيرة ملح
- كاسة لبن رايب
- معلقتين خل ابيض
- ربع كوب زيت
- ماء دافي للعجن
الخطوات
السلام عليكم ورحة الله صديقاتي اعذروني على التقصير بس والله الأمر مش بإيدي والله ما بقدر اعلق ولا ارد على تعليقاتكم على وصفاتي هالفترة وان شاء الله يهدا الوضع وارجعلكم واليوم قلت لازم انزل كم وصفة بما انو زوجي داوم وعندي شوية فراغ وهلا بدي ابدأ بالخبز طبعآ الخبز بهالطريقة اكتر من رائع وطري جدآ جدآ جربو ودعولي طبعآ انا صرت اعمل كل شي بالبيت وما بشتري ولا شي من برا حفاظآ على سلامة اولادي وزوجي ويلا بلا رغي ادخلي بالموضوع ههههههههههههههه
اول شي بنخل الطحين وبحط علي كل المكونات ما عدا الزيت بتركو للأخر وبعجن بمي دافية مائلة للسخونة شوي وبعجن حتى تصير عندي عجينة طرية ودبقة وكل ما كانت العجين طرية بطلع معك الخبز طري واللبن الرايب بخلي طري جدآ وبعد ما اعجنها بحط اخر شي الزيت وبعجنها منيح وبتركها تخمر ساعة لساعتين حسب الجو وبعد هيك برش طحين على طاولة العمل او على الرخام تبع المطبخ وبقطع العجين كرات وبعد ما اخلص ببلش افردهم رغفان واحطهم على قطعة قماش نضيفة وبعد الرق بريحهم عشر دقايق وبعدين ببلش اخبزهم بالفرن او ع الصاج ع الغاز وانا عملت الطريقتين والصاج ع الغاز حسيتو افضل بضلو اطرى بحط الرغيف ع الصاج وبعدلو ثمن ثواني لعشرة وبقلب وبضل اقلبو بهالطريقة حتى ياخد اللون وينفخ وبعدين بحطو بقماشة نضيفة او بشكير وبغطي وبعد ما يدفى شوي بحطو بأكياس وبحطو بالفريزر وطريقة الفرن انا عملتو بالفرن العربي بحمي الفرن جدآ وبكون حاطة الصاج يحمى تحت الشواية او سدر الشوي وبعدين بحط الخبز من تحت الشواية وبسكر علي بس ينفخ وياخد لون وبشوف اذا الجال الي من تحت ما اخد لون بقلبو وبعطي لون خفيف وبطلعو على قماشة وبغطي وبنفس الطريقة بفرزو وبس وصحتين وهنا عليكم جربو هالطريقة ودعولي حبيباتي 😉😚
