طريقة شوي سمك الهامور

المقادير

• سمك هامور
• راس ثوم مهروس
• ملح
• فلفل أسود
• عصير ليمون حسب الكميه استخدمت عصير ثلاث حبات
• شرائح ليمون
• نص كوب زيت زيتون
• للصوص :
• كميه من الكزبره او بقدونس
• طحينيه كوب صغير
• عصير ليمون
• سنين ثوم
• ماء

الخطوات

السلام عليكم ..ويسعد أوقاتكم بكل خير يا رب

بقدملكم اليوم وصفه طيبه لشوي سمك الهامور

وطعمه بهالطريقه كثير لذيذ وبنصحكم بتجربتها

يلاااا نشوف الطريقه ….

& استخدمت سمك الهامور الطازج بغسله مزبوط وبصفيه من المي وبنشفه بفاين المطبخ من بقايا المي وبشرح السمك

& بتبل السمك باضافة الملح والفلفل الاسود من الجهتين ومن الداخل ..ومن ثم بضيف الثوم المهروس وعليه عصير الليمون وبضعهم عالسمك من كل الجهات مع الضغط عليه عشان يتشرب النكهات،،، ممكن نقعه بالتتبيله لمدة ساعه او بدون حسب وقتك

وبضيفله زيت الزيتون باخر مرحله قبل تدخيله الفرن وشرائح الليمون ..السمك عندي كان مفتوح فوضعته بالفرن وهو مفتوح عشان يستوي اسرع

ممكن تدخيله الفرن بدون فتحه بزبط عالجهتين

& بقصدره وبدخله الفرن عالنار عاليه يعني تقريبا ربع ساعه وبعدين بوطي تحته النار لاقل من الوسط لحتى يستوي

اخذ معي تقريبا ساعه الا ربع 40-45 دقيقه وكان مستوي

وضعته بالفرن بدون اضافة الماء نهائي

بعد ما يستوي وتتنشف ميته بحمره

& قدمته مع صوص هو المفروض يكون بقدونسيه يلي بتتقدم مع السمك بس انا ما كان فيه عندي فاستبدلته بالكزبره والصراحه كنت متردده انه اعملها بس بالفعل وصدقا طلعت كثير طيبه وزاكيه

بخلاط الكوكتيل ضفت الطحينيه والليمون وشوية مي وسنين ثوم وخلطتهم وبعدين ضفتلهم الكزبره وخلطتهم سوا وهيك صارت جاهزه وطعمها روووعه

اذا كانت شديده ممكن اضافة عصير الليمون لحتى تصير بالقوام يلي بتفضليه

وهيك وصفتنا صارت جاهزه سهله وطيبه

ان شاء الله بتعحبكم

دمتم بكل الخير