خبز الصاج بدون صاج روعه أفكار منزليه
خبز الصاج بدون صاج روعه أفكار منزليه
المقادير
- ٤ أكواب طحين أبيض منخول ( أو نص أسمر ونص أبيض بيزبط وبيطلع أزكا )
- م.ص خميره
- م.ص ملح
- نص م.ص سكر
- ٣ م.ك زيت نباتي
- ماء دافئ للعجن
الخطوات
بسم الله نبدأ
في وعاء بحط كل المكونات مع بعض وبعجنهم بالميه لما تتكون عندي عجينه طريه وناعمه بتركها ترتاح شئ عشر دقائق وبعدين بقطعها لكرات وسط خليها ترتاح شئ عشر دقائق
بعدها ببلش أرق فيهم بمساعده رشات من الطحين لسمك متوسط لما خلصت غطيتهم بفوطه
**مرحله الخبز**
طبعا الكل بيعرف نوع هالخبز بينخبز على صاج والصاج إلي عندي خرب شو الحل
المهم بتجيبي صينيه ألمنيوم تكون قديمه أو ما بدك إياها والأفضل تكون أكبر من إلي أنا إستخدمتها بس ما كان عندي إلا هيا لأنو لو كانت أكبر بيطلع حجم الفرشوحه أكبر
بتحطيها على عين الغاز وبتولعي الغاز لتحمي بعدها بتوطي النار
هالوقت عنا خيارين إما نرجع نأخد كل رغيف ونرقه تاني ليصير شفاف عالأخر وبخبزه على الصينيه لما يصير يطلع فقاقيع بنقلبه ليأخد اللون إلي بدنا إياه وبنغطيه بفوطه ليبقي طري
أو نأخد رغيف ونحطه على رجلنا ونبلش نمد بالأطراف بالأول وبالهوا نطيره ليصير شفاف ونخبزه زي الطريقه الاولي
أنا معتمده الطريقه التانيه وهيا الأفضل بس إلي مو متعود حتكون صعبه عليه بس مع التكرار إن شاء الله بيتعلم وبصير أحسن من بوراك ههههه
ملاحظات:
١. العجينه لازم تكون طريه ليمد معك العجين بالتشكيل
أنا أحيانا نفس العجينه هاي بس بدل الزيت بحط سمنه بتعطي طعم أزكا بخبزها بمقلاه تيفال بس ما برقها عالأخر وسبق ونزلت الطريقه مع وصفتي للشاورما
٢. كل مرحله ضروري تغطي العجين لأنو إزا وجهه نشف راح يغلبك بالشغل وشكله ما راح يطلع زابط
٣. الأفضل تستخدمي صينيه أكبر من إلي أنا إستخدمتها هيك بتطلع أكبر وشكلها أحلا الفرشوحه
٤. فيكي تخزنيهم بالفريزر بعد ما تخبزيهم وطالعيهم وقت ما بدك
٥. هالخبز كتير بيستخدم بأكلات مثل : الشاورما والفته الغزاويه والمنسف والساندويتشات إلي بالجبنه أو إلي باللحمه وووغيره لهيك حبيت أنزل طريقتي وإن شاء الله بتجربوها وبتعجبكم
♡وصحه وعافيه بحبكم أنا ♡
