كنافة نابلسية خرافية بطريقة مضمونة وطعم لايقاوم

المقادير

• نصف كيلو سميد نااااعم حصراً
• أربع ملاعق سمنة
• ثلث كوب مطفطف شوي حليب بودرة (اذا مو موجود منستبدلو بثلثين كوب حليب سائل من مقدار المي)
• ملعقة ونصف قطر (من نفس القطر اللي رح تجهزوه لتسقية النابلسية)
• ماء حوالي نصف لتر (مايعادل كوبين)
• أما بالنسبة للجبنة فبدنا جبنة عكاوي أو مشللة وفينا نخلط مع موزاريلا بس مو ضروري التنتين بسيحو بشكل رائع
• انا هون استخدمت ٤٠٠ غرام جبنة شلل و١٠٠ غرام موزاريلا خلطتن سوا
• ومنحتاج قطر مالازم يكون تقيل
• عيار كوب سكر وكوب ماء وعصرة ليمونة

الخطوات

“بسم الله الرحمن الرحيم”

* أول شي منخلط الحليب البودرة مع السميد

* منضيف القطر والسمنة بعد ماندوبها ومنخلطهم مع السميد لتترطب حبات السميد بالسمنة، بصير شكلها متل الرمل

* منضيف المي بالتدريج ومنحرك لنحصل على خليط بين خليط الكيك والعجينة منتركو ربع ساعة ومنصبو بصينية مدهونة شوية سمنة ومندخلها الفرن لتنشف و يادوب تشقر

أخدت معي حوالي ٣٥ دقيقة ومشغلة الفرن من فوق تحت

* بعد الشوي منكسر العجينة لشقف وبس تبرد تماماً منطحنها بمحضرة الطعام أو الخلاط لتنعم ونحصل على فرك الكنافة

* بالنسبة للجبنة ماكان عندي عكاوي بس عندي جبنة مشللة ظريفة وفيها حبة بركة ههههه

ولأني عندت عالنابلسية قعدت نقي حبة البركة من الجبنة بكامل هبلي

* قطعتها لشرايط ماتكون سميكة كتير ونقعتها بمي وفيرة ثلاث أرباع الساعة وغيرت المي عنها ونقعتها كمان ثلاث أرباع الساعة وصارت حلوة معي

* منحط الجبنة بمصفاية تصفي عالأخيييير بدون مايضل فيها مي أبداً

* وهلأ منجي لمرحلة التطبيق

بصينية تكون قصيرة الحواف (أنا عملتها بالمقلاية اللي شكلها متل الصاج لأنو ماعندي صينية مناسبة وزبطت الحمد لله)

* مندهن الصينية بالسمنة إما مع شوية ملون أو بدون مابتفرق ومنحط من فرك الكنافة بمنخل ومننخل عالصينية لنغطي طبقة السمنة تماماً

هالحركة بتعطينا وش مرتب وناعم للنابلسية وبعدها منحط بدون نخل عادي

* منضغط عالفرك منيح ليتماسك مع بعضو ويصير عنا طبقة متساوية سمكها حوالي نصف سانتي ومنحط فوقو الجبنة ومنترك حوالي سانتي ونص عالداير فراغ لأنو الجبنة لما تسيح رح تتمدد

* منشغل أكبر عين غاز عالنايص ومنحط الصينية عطرف النار مشان ماتتركز الحرارة عالنص وتستوي عنا بشكل متساوي ومندور الصينية بهدوء لنشوف الأطراف تحمرت والجبنة ساحت منيح

* بس تستوي متل ماحكينا منطفي تحتا ومنغطيها دقيقتين لنضمن تكون الجبنة دابت تماماً

* وأخييرا حان وقت الحقيقة ووقت إطلاق الزغاريد

منحط الجاط فوق الصينية ومنقلب الكنافة عليه بحذر ومنسقيها فوراً بالقطر الساخن وصارت جاهزة للتقديم

يعني أجمل فقرة بكل الموضوع فقرة شط الجبنة

كفيلة لحالها تنسيكم المتاعب كلها ههههه

** ملاحظااااااات أخيرة لنابلسية ممتازة **

– نوعية الصينية يفضل تكون ألمنيوم أو تيفال وبكل الأحوال ضغطو العجينة بشكل ممتاز لتطلع متماسكة بس التيفال لازم نكون حريصين اكتر شوي انو نضغط العجينة لأنها بتزحلق أحيانا لوماعملنا هيك هههه

– القطر بالعجينة بيعطينا اللون المطلوب بدون أي ملون

جربت صينيتين وحدة بملون ووحدة بدون ملون وطلعو نفس الشي

– القطر للتسقية لازم مايكون بارد لحتى مايبرد النابلسية ولا يكون عم يغلي لأنو ممكن يفرفطها شوي فأفضل شي يكون ساخن

– الجبنة فيكم تستخدمو العكاوي أو المشللة وكل ماكنتو مقطعينها قطع أصغر بتحلى بشكل أسرع بدون ماتحتاجو تبدلو المي كتير

– أثناء الطهي مننتبه اذا طلع أي سوائل عالجبنة مننشفها بهدوء باستخدام محارم المطبخ

– المقادير اللي حاطتهم بيعملو الجاط اللي بالصور وواحد تاني متلو تقريبا

– سامحوني اذا إضاءة الصور مو تمام عحظي كانت الدنيا مطر وغيم وعتمة ومن فرحتي الطاغية ماخطرلي شغل الأضوية

– آخر ملاحظة.. اللي بتعملها ومابتعزمني مارح ابعتلها ولا سكبة برمضان

بالنهاية بتمنى تكون الوصفة عجبتكم وتجربوها وتدعولي بالبركة وبكل شي حلو متلكم يا أحلى وردات