خبز السحر ملكة رمضان
خبز السحر ملكة رمضان
المقادير
- ثلاثة كوب حليب
- نص كوب زيت
- معلقة صغيرة ملح
- ربع كوب سكر
- معلقتين كبار خميرة
- معلقة صغيرة بكنغ باودر
- ربع معلقة صغيرة كربونة
- معلقة كبيرة خل ابيض
- ست كاسات طحين للوجة
- الطريقة الاولى:
- معلقة صغيرة كربونة
- معلقة كبيرة طحين
- ثلث كاسة ماء
- الطريقة التانية وهي المفضلة الي :
- معلقتين حليب باودر كبار
- ربع كوب ماء
- الطريقة الثالثة والي انا شخصيآ ما حبيتها ولا عمري استخدمتها هههههه:
- صفار بيضة
- معلقتين حليب سائل
- معلقة صغيرة خل للزنخة
- سمسم وقزحة للوجة
الخطوات
السلام عليكم صديقاتي كل عام وانتم الى الله اقرب اسأل الله العظيم ان يجعلكم من الذين شملتهم الرحمة والمغفرة والعتق من النار بهاذا الشهر الفضيل واتمنى يا اغلى اخوات انكم تدعولي بهاي الايام المباركة ولاتنسوني من حسن دعائكم يا غاليات
وهسة خلينا نشوف طريقة الخبز التركي المشهور جدآ بخبز السحور (خبز بيدا التركي)
اول شي بنزل بالحليب الدافي والخميرة والسكر والزيت والملح والبكنغ باودر والكربونة والخل وبخلطهم منيح منيح حتى تذوب الخميرة وبعدين بنزل بالطحين على اجزاء ممكن تاخد معك ست اكواب وممكن اكتر او اقل حسب نوع الطحين عندك وبعدين بعجنها حتى تتشكل عجين دبقة بعض الشيء وطرية بدهنها بشوية زيت وبغطيها وبحطها تخمر بمكان دافي لمدة ساعة الا ربع وبعدين بقسم العجين على ثلاث كرات كبيرة او اربعة وباخد كل كرة على سدر مدهون زيت او مغلف بورق الزبدة وبفرد الكرة على شكل رغيف بسمك تقريبآ ١.٥ سم وبغطيهم وبتركهم يخمرو كمان نص ساعة وبعدين بوقت ما بكون تركتهم يخمرو بجهز خلطة الدهن لوجة الخبز
اول طريقة
الي هي الكربونة والطحين بخلطهم مع بعض وبحطلهم المي وبحطهم ع الغاز ثواني ورح يفورو ويعملو رغوة بشيلهم وبتركهم يبردو طبعآ هاي الطريقة بتعطي لون حمار رهييييييب جدآ رائعة هالطريقة بس مشكلتها بتترك نكهة كربونة ع الخبز الي ما بتضايق من نكهة الكربونة يستخدمها رح تعجبو كتير وطبعآ هدول الخبزات بهاي الطريقة عملتهم لونهم خيالي
بس يخمر العجين بدهن وجهو بهالخليط وبرسلو السمسم والقزحة وبدخلو الفرن المحمى مسبقآ وعلى نار فوق الوسط بشوي بخبزهم وبس ياخدو لون من تحت بحمر الوجة وبعد ما يجهزو بطلعنم وبغطيهم ببشكير مطبخ نضيف عشر دقايق وبعدين شوفي الطراوة والهشاشة الرهيييييبة رح تنبسطي كتيييير بالنتيجة
الطريقة التانية
بخلط الحليب مع المي بكل بساطة وبدهن فيها وجة العجين وبرشلها السمسم والقزحة وبدخلها الفرن
والطريقة الثالثة
والي انا ما بحبها ابدآ وهي صفر بيضة عليها معلقتين حليب سائل ومعلقة صغيرة خل وبخلطهم منيح وبدهني فيهم الخبز وبترشلها السمسم والقزحة وبدخلها الفرن
طبعآ ملاحظات نجاح هاد الخبز :
من اهم نجاح هالخبز وسر نجاحو وطراوتو وهشاشتو هي بالتخمير كل ما الخبز ارتاح وختمر مزبوط رح تاخدي افضل نتيجة وممكن تعملي بأي عجينة انتي معتمديها وتخمريها مزبوط وتريحيها خصوصآ بعد التشكيل وتتركيها ترجع تخمر وتضاعف رح تاخدي نتيجة رووووووعة لهالخبز واتمنى انكم تجربو وتدعولي دعوة حلوة متلكم
ملاحظة أخيرة بس يطلع الخبز من الفرن ادهن الوجة زيت زيتون او زيت نباتي
اعذروني ما كتبت ع الصور ولا شرحت عليهم بس لانو الادمن حكتلي للمسابقة ما بزبط الصور تكون مكتوبة ولهيك انا تلبية لطلبها نزلت الصور الاصلية والله يجزيها الخير مشتلي وصفة الكبة والسمبوسة لاني صرت منزلهم ومتغلبة فيهم مشكورة كتير ادمن تمارا على مراعات جهودنا ربي يجعلو بميزان حسناتك
