كفتة بالطحينية مع رز
كفتة بالطحينية مع رز
المقادير
- لحمة كفتة
- طحينية
- ليمون
- لبن رايب
- رز
- شعرية
- زيت
- ملح
- ماجي حسب الرغبة
- نشا
الخطوات
اول شي يا حبوباتي بنجيب الكفتة وبنزبطلها البهارات والملح انا بحط عليها شوية بهارات مشكلة وهيل مطحون وفلفل اسمر ورشة كري وملح وبنخلطها منيح
وبعدين بنعملها كرات صغيرة وبنقليها على نار حامية حتى تشد وما تفرط لما نحطها بالطحينية
وهلأ بنجهز الطحينية طبعا على حسب الكمية يلي بدك تعمليها وليمون بنسنها بالليمون حتى يصيرو ناعمين وبعدين بتحطي عليهم شوي شوي مي دافية لحتى يدوبو مزبوط انا حطيت لبن وطبعا سويتو عالخلاط مع معلقتين نشا حتى يصير ناعم منيح وبعدين حطيت معو الطحينية بالخلاط لحتى يتجانسو مع بعض بتعرفو برمضان الطحينية بتعطش مشان هيك بتحطو لبن كتير بيخفف حدة الطحينية يا قلبي
بنحطهم على النار مع اضافة كمية المي الكافية للطبخة وماجي طبعا حسب الرغبة مع التحريك المستمر لغاية ما تغلي بنضيف الكفتة وبنخليهم يغلو شوي مع بعض وبنطفي النار
وبعدين بنجهز الرز هاي الطبخة بينحطلها شعرية كتير بالرز لحتى تكون ظاهرة
وان شاءالله تكون عجبتكم الطبخة يا قلبوشاتي والف صحة وهنا ولا تنسوني من دعواتكم بهالشهر الفضيل الله يحفظكم ويخليلي اياكم يا احلى صبايا
