القطمير التركي الرائع للسحور سلسلة الوصفات التركية 19 ملكة رمضان
القطمير التركي الرائع للسحور سلسلة الوصفات التركية 19 ملكة رمضان
القطمير التركي الرائع للسحور سلسلة الوصفات التركية 19 ملكة رمضان
طبعا القطمير نوع من المخبوزات التركية اللي أنا شخصياً بتتدهور قواي أمامها ومالها شكل واحد فيها تنوع وكلو حلو وكلو طيب وكلو بساعدنا نصير رشيقات كتير
المهم تعالو نشوف المقادير بلا ما اسرح وامرح متل العادة
المقادير
- للعجينة منحتاج:
- كوب ماء دافئ
- ملعقة خميرة فورية
- ملعقة ونصف سكر
- نصف كوب حليب
- ربع كوب زيت
- نصف ملعقة ملح
- حوالي ٣ ونصف كوب طحين (أو حسب الطحين)
- ٤ ملاعق زبدة تقريباً
- للحشوة :
- ممكن جبنة بيضا + بقدونس
- أو جبنة قشقوان أو زيتون أو ممكن تتركوها سادة وتاكلوها مع زعتر أو أي شي بتحبوه (ملاحظين كم مرة قلت أو)
الخطوات
“بسم الله الرحمن الرحيم”
* أول شي منخلط السكر والخميرة مع الماء ليدوبو منيح منضيف نصف كوب طحين ومنخلطو معهم ومنغطيهم لتتفاعل الخميرة حوالي ربع ساعة
* بس تتفاعل منضيف الزيت والحليب والملح ومنخلطهم وبعدا منبلش نضيف الطحين ونخلط لنوصل لعجينة طرييييية منعجنها كتير منيح مو أقل من عشر دقايق لتصير ناعمة وأمورة ومنغطيها ليتضاعف حجمها
* بعد ماتختمر منشكل كرات حسب الأحجام اللي بدنا ياها
ومنبلش ناخد ٣ كرات منفردهم شوي ومندهن سطحهم بالزبدة ومنطبقهم فوق بعض
الطبقة الأخيرة منقلب الجهة المدهونة زبدة لتحت مشان الجهة اللي فوق ماتكون مدهونة لنقدر نتحكم فيها بدون زحلقة هههه
* منفردهم ولو حبينا فينا نتركهم سادة أو منحشيهم ومنسكر الأطراف على بعضا ومنرجع منفردهم شوي بحيث تكون السماكة مو أقل من ١ سانتي
* منشويهم بمقلاية على نار هادية ومنغطيهم وبس تبلش تحمر من تحت وتنشف من فوق منقلب عالجهة التانية
تقريباً بتاخد كل جهة حوالي ٣ أو ٤ دقايق
* وبعد هيك بصيرو جاهزيييين بطعم ولا ألذ والعجينة بتكون هشة وفيها بعض الطبقات بسبب الزبدة عدا عن نكهتها اللذيذة ،، رح تكيفو عليها وتدعولي إن شاء الله
*حبابات انتو خبروني قديه زدتو من أول الحجر ورمضان لهلأ بركي بتخففو عني شوي ههههه
* بحبكم كتير وبتمنالكم سعرات ممتعة
