مفتول فلسطيني

مساء الخير لاحلى جروب صياما مقبولا وذنبا مغفورا باذن الله وبما انها رجعت الشتوية استغليت الفرصة وعملت مفتول وطبعا بتعرفوا اني صرت اعمل المفتول بالخفاقة الكهربائية بعد تعب سنين وانا افتل على ايدي وايدي وجعتني وعملت فيها عملية … .وصورتلكم فيديو حتى تشوفوا منيح عملية الفتل ،بس بدكم تعذروني لاني كنت انا اصور وانا افتل لاني لحالي بالبيت … المهم رح الاقي تعليقات سلبيه متل اللي شفتها بجروبات تانية .. ،رح تطلع وحدة تقولي راحت هيبة المفتول ،ووحدة تقولي ليش مش حاطة كوسا وباذنجان باليخنة ..والله حبيبتي انا عاملة مفتول مش صينية خضار .وعلى فكرة انا عم بنشر طريقتي مش طريقتك ،فرجاءا اللي بعجبها المنشور تعلق واللي ما بعجبها تمر مرور الكرام ..واللي دايما بشجعوني ربي يسعدهم وما يحرمني من تعليقاتهم الايجابية
اولا بتنقعي برغل مقدار كاسة شاي او فنجان قهوة لحتى تبدي عليهم .بتحطي البرغل بعد ما نقعتيه بجاط عميق وبتشغلي الخفاقة وبتبلشي ترشي شوية طحين قمح وشوية مي فيها ملح وتخفقي بالخفاقة وكل ما حسيتي الكمية كبرت ،بتنخليهم بمصفاية حتى ينزل المفتول الناعم ويبقى الخشن ..بتردي ترجعي الناعم اللي نخلتيه ع الجاط وبتردي تخفقي وتزيدي مرة مي ومرة طحين لحتى تخلصي كل كمية الطحين ،،وطبعا ما رح يطلع كباتيل معك الا اول مرة ورح يصير يركض معك الطحين ركض ..

وطبعا انا بحطهم باللجن وبرشهم شوية طحين وبفتلهم على ايدي شوية حتى تشد حبة المفتول وتوخذ الشكل الكروي متل الخرز ،وبنخله بمصفاية فتحاتها واسعة شوية لحتى ينزل كل الناعم ..

وطبعا الطحين بيلعب دور ،المفروض لما بدك تشتري طحين ضروري يكون طحين خاص للمفتول ومش للعجين ..

هلا نيجي للتهبيل

بنجيب طنجرة المفتول بنحط فيها مي للنص فقط وبنضيف ملح وكمون وشرحات ليمون حتى ما تسود الطنجرة ،

بس تغلي المي بنحط المصفاية تبع طنجرة المفتول فوق الطنجرة وبندهنها زيت كما هو موضح بالصور وبنحط المفتول فيها وبنفرده منيح بحيث يكون بنفس المستوى .بعد ساعة تقريبا بنشيل المفتول وبنحطه بجاط كبير وبنفرده بشوكة كبيرة وبنرشرش عليه كاسة مي وبنحركة بالشوكة وبنرد نزيد المي اللي بالطنجرة وندهن المصفاية زيت وبنفرد نص كمية المفتول وبنفرد فوقهم كمدة المفتول اللي هي عبارة عن راسين بصل مفروم وبنفركهم بملح وكمون وفلفل اسود وبهارات مشكلة وفي ناس بحطوا عين جرادة حسب الرغبة .وبعدها بنفرد بقية المفتول وبنتركهم كمان ساعة ع تهبيل البخار حتى يستووا منيح وبنشيلهم بعد ساعة ونفردهم بالجاط ونرشرشهم زيت زيتون .

اليخنة تبع المفتول معروفة

عبارة عن بصل شرايح بنقلبه بزيت زيتون لحتى يذبل وبنضيفله البندورة المقشرة والمقطعة وبنضيف حمص حب مسلوق وملح وكمون وفلفل اسود وبهارات .وطبعا بتضيفي معلقة معجون الطماطم وممكن تحطي شوية من مرقة الجاج عليها

وصحة وهنا

للاسف الفيديو ما بتحمل على التطبيق

#مفتول ام نضال بالخفاقة الكهربائية