كنافه بالقشطه طعمها رائع بطريقه جديده ملكة رمضان

المقادير

• عجينة الكنافه تقريبا نص كيلو حسب حجم الصينيه المستخدمه
• نص كوب سمنه مذوبه
• 2 ملعقة سكر بودره
• 3 كوب قشطه تقريبا طريقتها موجوده بملفي
• لدهن الصينيه:
• 2 ملعقة سمنه
• للتزين :
• قرفه مطحونه
• فستق حلبي مطحون
• لنسقي الكنافه:
• قطر  تقريبا 2 كوب ..حسب كمية الكنافه
• للقشطه:
• 3 ملعقة سكر بودره أختياري

الخطوات

السلام عليكم ويسعد أوقاتكم بالخير

اليوم بقدملكم وصفة حلوو لذيذ جدا كنافه بالقشطه وتغير عن الوصفات المعتاده للكنافه وبالفعل طعمها كثير زاكي وبسيطه وسهله

يلااا نشوف الطريقه ….

& اول شي بحاول أفتح عجينة الكنافه عن بعضها بأيدي افكفكها عن بعض ..وبعدين بضيفلها السكر البودره والسمنه وبفركهم سوا لحتى تتشرب العجينه كامله السمنه

وبعدين بضعها بصينيه مدهونه بالسمنه وبضغط عليها بايدي لحتى تتماسك سوا وتكون نفس المستوى

& بدخلها عالفرن محمى عالدرجة حرارة 180.. تقريبا بدها 15 دقيقه او لحتى نشوف اطرافها تحمرو بنطلعها

& بعد ما اطلعها من الفرن بسقيها بالقطر بدرجة حرارة المطبخ …تقريبا بدها كوبين قطر او حسب حجم الصينيه والكنافه ..وبتركها تتشرب القطر وتبرد

& ثم بضع عليها القشطه يلي نزلت وصفتها قبل كم يوم

اذا ممكن ادمن تمار تضيفي رابط القشطه لحتى يسهل عالاخوات يشوفوها

& طلعت القشطه من الثلاجه قبل بساعه عشان تكون سهلة الاستخدام بضيفلها 3 ملاعق سكر بودره وبحركها مزبوط اضافة السكر اختياري لانه هي مش حلوه …استخدمت منها تقريبا 3 اكواب او اكثر حسب ما بتحبو سمك القشطه …

بنمدها بلطف عالكنافه وبزينها بالقرفه المطحونه طعمها كثير زاكي معها ..ورشة فستق حلبي مطحون ناعم

التزين حسب الرغبه

بغطيها وبدخلها الثلاجه لحتى تبرد تماما

انا عملتها قبل بيوم من تقديمها

& الصينيه المستخدمه اصغر من حجم الوسط بشوي ..

&وبفضل قبل ما أقدمها اطلعها من الثلاجه وخليها شوي يعني ربع ساعه بتكون الكنافه اطرى وتزينيها يكون وقت التقديم كمان افضل

وصفتنا صارت جاهزه وطعمها جدا رائع بتمنى تجربوها وتحكمو بنفسكم وتعطوني رأيكم

دمتم بكل الخير والسعاده