ورق عنب (يلنجي)
ورق عنب (يلنجي)
المقادير
- ورق عنب الكمية حسب افراد العيله
- رز حبة قصيره
- حبة بندوره صغيره
- حبة بصل صغييييره
- سنون تومه حسب الرغبه
- ملح او ماجي
- بهارات مشكله
- كاري
- زيت زيتون
- عصير ليمون
- ورشه ملح ليمون
- الخضار حسب الرغبه:
- جزر
- بطاطا
- حبة بندوره
- بقدونس
- نعنع
- زعتر ناشف
الخطوات
اول شي بنسلق ورق العنب ، طبعا اكيد مو سلق سلق ب مي بتغلي بنسقطهم ليتغير لونهم من الاخضر للاخضر اللون التاني يعني او الزيتي المهم اكيد بتعرفو اللون ما علينا
هلأ بنكون ناقعين الرز بصراحه انا بحب انقعه بنفس مية الدوالي بعد ما ينقع بنغسله وبنصفيه
بنبشر عليه بصله صغيييييره وسنون التومه طبعا طعمهم رهييييييب مع الدوالي وبنفرم بندوره صغيره ناعم وبنضيف البقدونس المفروم والنعنع والزعتر والبهارات والماجي وعصير الليمون ورشه ملح الليمون بنخلطهم شوي وبعدين بنضيف زيت الزيتون وبنخلطهم منيح
وبنبلش نلف
بالطنجره بنحط حبه بطاطا مقطعه دوائر وجزر طبعا انا بحطه وبكتره لاني السيد ابني مستحيل يدوق الدوالي بدونه بنسفه نسف ما شاء الله وبندوره دوائر وبترتب الدوالي
وبنرش عليه شويه ماجي او ملح حسب الرغبه وملح ليمون منه بيعطيه طعم ومنه بخلي لونه اخضر ما بسود
وبنغمره بالمي مع اول غلوه بنحط عليه صحن وبنوطي الغاز ع الاخر ل حد ما يستوي وما بتفتحو عليه قبل ما يصيرله ساعه بياخد من ساعه ونص ل ساعتين ازا بتحبوووه كتير طري ، بس يستوي بنقلبه بالسدر وتعب 10 ساعات برووووح ب ثوااااني بس فداهم
وبالعافيه عليكم يارب ❤❤❤❤❤
