ماعندك مواد تعملي حلو تعالي معي نبدع حلو بابسط المكونات ملكه المطبخ

المقادير

• بسكوت ساده
• كريما ضرفين
• ٦ حبات موز
• كميه من الفراوله
• حليب سائل لتغميس البسكوت
• كوب حليب مثلج لعمل الكريما

الخطوات

السلام عليكم صديقاتي العزيزات

مين منا ما بيجي عباله حلو وبنقص عليه بعض المكونات وبنلغي الفكره وبنقعد

اليوم صار معي نفس الشي جاي عبالي حلو بارد وكل ما اقرر اعمل نوع حلو بلاقي ناقص اشي من المواد ههههههه

قلت لاااااا خلص طفح الكيل رح اخترع حلو من الموجود

ما عندي فانيلا اعمل كيكه قلت بعمل حلو بالبسكوت وللاسف برضه ما لقيت بسكوت ساده لقيت بسكوت محشي بس قلت ولو كان رح كمل طريقي

فتحت طبقات البسكوت عن بعض وبلشت صف البسكوت بالصنيه بعد تغميسه بالحليب

ولقيت كريما ضرفين خلطتهم ولو ما عندك كريما ممكن قشطه عادي او كربما وقشطه ممكن تحطي كريم كراميل المهم ما نوقف بنص الطريق ههههههه

خفقت الكريما وضفت جزء فوق طبقه البسكوت الاولى وحطيت شرحات موز فوقها

ما عندك موز ولا يهمك حطي اي نوع فوكه موجود وارجعي صفي فوقه كمان طبقه بسكوت مغمس بالحيب وطبقه اضافيه من الكريما

لقيت عندي فراوله بالفريزر قلت ومالوووو طيبه بنجربها

قطعت الفروله وضفتها فوق الكريما وارجعت حطيت فوقها كمان طبقه بسكوت وطبقه كريما اضافيه

وسويت سطحها وزينتها ببسكوت مطحون كان ضال وراي ٤ حبات

وكرات ذهبيه وشرحات الموز والفراوله

وغلفتها وع الثلاجه ٣ ساعات ع الاقل

طبعا انا اعملتها الضهر واكلناها ع السهره

ان شاء الله بتعجبكم الوصفه و ما بدنا يضل شي بنفسنا شو عندكو استخدمو وابدعو

صحتين والف عافيه للي حابين يجربوها

بصراحه طلعت رهيبه جدااااا

تحياتي اختكم بلبله