مربى العنب على طريق امي الغاليه الله يرحمها ولا اطيب ملكة المطبخ

المقادير

• 3 كيلو عنب
• 4 كاسات كبيره سكر الكميه قابله للزياده
• ليمونه واحده

الخطوات

بسم الله الرحمان الرحيم

السلام عليكم

كيفكم صديقاتي الغاليات ان شاء الله تكونو جميعا بالف خير وصحه وسلامه اليوم رح اقدملكم وصفه سهله وبسيطه حتى يستفيدو منه الصبايا الي ما بعرفو يعملو مربى العنب او العنبيه مربى امهاتنا الغاليات الي كانو كلهم يعملو ويخزنوه لفصل الشتاء بكميات كبير وطبعا كان اشهى واطيب مربى

تعالو نشوف الطريقه اول شي بختار كميه جيده من العنب تكون حباتها صامده وغير تالفه وبغسلهم كويس وبفرطهم وبرد اغسلهم واصفيهم من المي وبضعهم في طنجره وبضيفلهم كميه السكر وبعصر حبة الليمون وبصفيها كويس وبضيفها للعنب وبخلطهم مع بعض كويس هون في ناس بتركوهم بالثلاجه عدة ساعات قبل عملية الطبخ حتى يذوب السكر مزبوط لكن انا اتبعت الطريقه التانيه وضعتهم فورا على الغاز على نار هاديه وضليت احركهم واقلبهم كل فتره بنلاحظ انه مية العنب بلشت تخرخ متل ما شفتو بالصور والريم الابيض ببلش يتكون بنشيله اول باول وبنستمر بالتحريك كل شوي حتى ينضج كله بنفس المستوى وما يلزق بعد مرور ساعه ونص او ساعتين بنلاحظ انه اللون بلش يتغير للاحمر المشقر او البني الفاتح وريحة المربى بلشت تفوح وما بننسى التحريك حتى ما تنشعط منا ونخسرها ونخسر كل تعبنا في نهايه المطاف بنلاحظ انها بدأت تتماسك وتتسبك بنطفي الغاز وبنتركها تبرد ونعبيها بمرطبان نظيف وبضع كميه من زيت الزيتون على وجه المرطبان وبنحكم غطاءه وبنحفظه بالثلاجه او خارج الثلاجه…والف صحه وهنا

ملاحظات

انا استخدمت عنب قليل البذور واذا استخدمتي عني فيه بذور رح تلاحظي انه رح تطفو البذور على الوجه اثناء الطبخ اذا بتحبي شيلي جزء منها واتركي جزء لانه مفيد جداويستخدم كماده حافظه للمربى

2: بامكانك تزيدي كمية السكراذا بتحبي الحلو كثير

3:طفي الغاز قبل ما يتماسك المربى ويلزق ببعضه لانه اذا تماسك بقوه رح يغلبك

بتمنى انكم تجربوها بما انه احنا في موسم العنب وتدعو بالرحمه لوالدتي ووالدي وجميع موتى المسلمين

استودعتكم لله