كعك الشاي متل الجاهز ولا اروع من هيك ملكة الفطور
كعك الشاي متل الجاهز ولا اروع من هيك ملكة الفطور
كعك الشاي متل الجاهز ولا اروع من هيك ملكة الفطور
المقادير
- أربع أكواب ونص طحين ٦٢٥ غرام
- ربع كوب زيت ذرة ٥٠ غرام
- كوب سكر ٢٠٠ غرام
- الزبدة نص كوب ١٢٥ غرام
- ثلاثة ارباع الكوب حليب ١٧٥ غرام
- معلقة ونص كبيرة بكنغ باودر ٢٥ غرام
- يانسون حب معلقة كبيرة (اختياري)
- فانيلا معلقة كبيرة
- سمسم (اختياري)
- قزحة (اختياري)
الخطوات
السلاااااااام عليكم ورحمة الله يا غاليات كيفكم طمنوني عنكم وحدة وحدة اشتقتلكم قدددددد الدنيا اعذروني مقصرة وغياباتي كتيرة بس عنجد التمسولي العذر يعني مش بأيدي هيك الضروف جاية معي ههههههه
ما علينا اهم شي اني ما بقدر استغني عنكم وبرجع حتى لو طال الغياب
المهم انا جاية وجايبة معي فطور سريع فطور المستعجل والي مش جاي على بالو يفطر جبتلكم كعك الشاي رائع متل الجاهز بالزبط وطعمو رهيييييب وقرشتو بتجنن وفعليآ كأنك جايبتي من المخبز ويلاااا نشوف الطريقة
اول شي بحط الطحين والبكنغ باودر والفانيلا واليانسون اذا حبيتو بس عنجد مع اليانسون اطيب وبعدين بحط الزيت والزبدة وبفركهم ببعض حتى ياخد الطحين كل الزيوت وبعدين بحط السكر والحليب بجاط وبذوب السكر وبديرو على الطحين وبعجنها رح تتشكل عجينة متل الكعك تبع العيد بس متماسكة اكتر وبتطلع معك عجينة مخملية وسهلة تشكليها وبعد هيك اذا حبيتي انك تحطيلها سمسم او قزحة بتجيبي كوب سمسم ابيض محمص بتحطيلو معلقة سكر ورشة مي وبتخلطيهم منيح بالسمسم وبعدين بتشكلي العجين وبتلفيها لفة ع السمسم او اذا بدك معها قزحة بتضيفة معلقتين قزحة مع السمسم وبعد ما تلفيها لفة ويمسك عليها السمسم بتحطيها على صنية وعليها ورقة زبدة او ادهني دهنة زيت بسيطة وبعد هيك على فرن نار هادية تحت الوسط بشوي بتدخلي الصنية تتحمر من تحت وبعدين حمري الوجة بدها ما يقارب من ٢٠ ل ٢٥ دقيقة بالفرن وبعد هيك بتطلعيها وبتتركيها تبرد تماااامآ وبعد هيك جهزيلك بريق شاي وتذوقي الطعم الرهييييب
ملاحظة:
لازم تعملي الأصابع رفيعة لأنها رح تنفش بالفرن وتتركي مسافة بين الحبات حتى ما يلزقو ببعض
وكمان بتمنى لو انكم تشتغلو ع الميزان بضل الشغل ادق وانجح وكمان سعرو معقول وبتقدرو توفرو وبضلو عندك العمر كلو ورح يريحك كتييير بالحلويات وخصوصآ الكعك والمعمول والغريبة والبيتيفور والاشياء هاي وخدو نصيحتي وما رح تندمو
وأعذروني مش مصورة خطوات العمل مش عارف يعني بأخر لحظه بس وانا بشكل بالكعك اجيتو ببالي وحكيت لازم انزللهم الطريقة اكيد رح تعجبهم ورح يدعولي عليها كتييير
عنجد بتمنى تجربوها وتفرجوني تطبيقاتكم وتدعولي دعوة من قلبكم يا غاليا
