الكيكه المعجزه
الكيكه المعجزه
المقادير
- ٣ بيضات
- كاستين ونص معمول بالجوز مطحون رح تستغربو هالمكون بس اله قصه مضحكه وغريبه
- نص كاسه حليب سائل او ماء
- معلقه فانيلا
- معلقه بيكنج باودر كوب جوز الهند
- الطبقه الثانيه:
- لتر حليب
- كوب نشاء
- نصف كوب سكر
- ممكن استبدال نص كوب من النشاء بمغلفين كريم كراميل
- مغلف كريمه دريم ويب
الخطوات
السلام عليكم ورحمه الله صديقاتي العزيزات
اليوم جبتلكو حلو مبتكر ورهيب ومعجزه فعلا
رح تستغربو من الي صار معي بس معلش بنعيش وبنتعلم
** كان عندي طلبيه معمول بالجوز
وبعد ما شكلت المعمول وخبزته حصلت الكارثه
المعمول ساح بالصواني ل درجه بطلو يبينو الحبات من بعض وصارو شبه البسبوسه
طبعا السبب مجهول بالنسبه الي رغم الي سنوااات بشتغل معمول ما صار معي هالنهفه
طبعا ما بتتخيلو الخيبه والصدمه والانزعاج خصوصا كنت عامله كميه كبيره
خسارتي الماديه مش مهمه قد خساره التعب والمجهود
وطفيت الفرن وقعدت اتفرج ع هالمصيبه
طبعا تركت المعمول لنشف شوي وكسرته من الصواني وضبيته بحافظه لحد ما يجي الفرج
** بعد يومين من حدوث الكارثه قلت مستحيل اكب المعمول ولو خرب الا الاقي اله حل
وهوووون اجت الفكره العبقريه
ذاكرين الكيكه القبرصيه وصفه ام جاسم
اه اه هاي الي بتجنن وطلعت قنبله نوويه
بالزبط هاي قلت رح اجرب اعمل حلو من هالمعمول زيها
قمت فتت المعمول وطلعت منه الحشوه طبعا هاي مهمه صعبه شوي بس قدر الامكان طلعت حبات الجوز الصامده
والباقي طحنته ع المحظره لصار مثل البقسماط
كونه المعمول في سمنه وسكر معناها الكيكه ما رح يلزمها سكر وزيت
خفقت البيض مع فانيلا وضفت نص كوب حليب وضفت الجوز الي بالحشوه والمعمول المطحون وكوب جوز الهند ومعلقه البيكنج باودر
صبيتهم بصنيه مدهونه زيت وع الفرن ٣٠ دقيقه ع حراره ١٨٠
بس جهزت الكيكه شربتها بالقطر البارد نص كوب
تركتها تبرد شوي لحتى اجهز الطبقه الثانيه
&&& الطبقه الثانيه
حطيت لتر حليب ونص كوب سكر ونص كوب نشا لاني اتفاجئت انه النشا خالص
برضه هون دخلت بصدمه
ولمعت براسي احط مغلفين كريم كراميل لعل وعسى تحدث المعجزه وتزبط
خلطتهم ع البارد ورفعتهم ع الغاز ليغليو مع التحريك المستمر
طبعا رح يضل قوام الخليط شبه سائل ما تقلقو
طفيت الغاز وضفت ضرف كريمه دريم ويب وخفقتهم سوا لتجانسو فقط
وصبيت هالخليط فوق الكيكه وغلفتها وع الثلاجه ٤ ساعات
بس جمدت حطيت جوز هند ع الوجه كميه ممتازه تغطي الوجه
ورجعتها ع الثلاجه تشد كمان شوي
وبعد ساعتين قطعتها وقدمتها لنفسي كنوع من التجربه قبل ما اتلقى الانتقادات من حدا
فعلا رااااائعه بمعنى الكلمه
معجزه رهيبه وكميه طاقه فضيعه وكميه زاكي مش ملاقيه كلمات مناسبه لوصفها
&&& الشكر لاختي ام جاسم الي استوحيت الفكره من كيكتها النوويه
واعطتني افكار لوصفات ثانيه بالمعمول الي خرب
والفكره لو خربت معنا اي وصفه ما نرميها ونشغل الجمجمه شو ممكن نستفيد منهم
دمتم بود جميعا … احبكم كلكم ❤
