طريقة المندي بالفرن بالدجاج

المقادير

• دجاج حسب الحاجه
• كيلو أرز بسمتي
• لسلق الدجاج بنحتاج:
• راس بصل مفروم
• م،ص ملح
• 2 عود قرفه
• قرنفل
• حبه من اللومي
• م،ك بهارات دجاج
• م،ص فلفل أسود
• لخلطة الأرز :
• راس بصل كبير مفروم
• 2 عود قرفه
• حبة لومي
• م،ص هيل مطحون او حب
• م،ص فلفل أسود
• 2 م ،ك ملح او حسب الحاجه
• 3 حبات فلفل اخضر حار
• زيت ذره
• مرقة الدجاج
• صوص دهن الدجاج :
• م،ص ملح
• نصف ملعقه صغيره فلفل اسود
• م،ص بابريكا
• عصير نص ليمونه
• 2 م،ك زيت
• 2 م،ك كاتشب
• لتلوين الارز:
• م،ص بابريكا
• م،ص كركم

الخطوات

السلام عليكم ويسعد أوقاتكم بكل خير

بقدملكم اليوم وصفة المندي رهيييبه وطعم كثيير طيب بنصحكم بتجربتها نزلت سابقا وصفه للمندي وكمان كثير طيبه بس وصفة اليوم مختلفه بالطريقه لكنها نفس المبدأ طبخ الارز بالفرن ان شاء الله بتعجبكم

يلاااا نشوووف الطريقه ….

& نسلق الدجاج لما يبلش يغلي بنشيل الزفره عن الوجه وبعدين بنضيف البصل والبهارات يلي ذكرتها بالمقادير

وبتركه عالنار وسط يسلق وقبل ما يتم استواءه تماما بشيله من مية السلق وبدهنه بالصوص يلي هو بابريكا وملح وفلفل اسود وعصير نص ليمونه ومعلقتين زيت بخلطهم سوا وبدهن فيهم الدجاج وبتركه لحتى اجهز للأرز

& بقلي راس بصل مفروم بزيت ذره (بحسب حساب طبخ الارز بالزيت ) وبضيف للبصل القرفه واللومي والفلفل الاخضر الحار وبقلبهم سوا لحتى يتقلو بشيلهم عن النار وبضيفلهم الارز البسمتي المغسل ومنقوع ومصفى وبضيفله الملح والفلفل الاسود والهيل وبقلبهم سواا ومن ثم بضيفله مرقة الدجاج المصفيه وبحركهم لحتى تمتزج النكهات وبقصدر الطنجره طبقتين عشان تحمل الدجاج وبثقب القصدير بالسكين مثل ما هو موضح بالصوره وبضع الدجاج عالقصدير وبضع فوق الدجاج قصدير بحكم اغلاقه مزبوط وبدخله الفرن عالنار عاليه (برفع رف الفرن عالدرجه الاولى عشان اضمن انه الارز ما ينحرق ) بعد عشرين دقيقه من غليان الارز بوطي تحته عالنار خفيفه وبتركه نص ساعه وبعدين بشيل الدجاج وبضعه بصينيه للتحمير وبفتح عالارز اذا كان لسى مو مستوي برجعه عشر دقائق انا كان مستوي معي بعد النص ساعه وبنثر نثر ورااائع

&بعد هيك بجهز لتلوين الارز وهو معلقه صغيره بابريكا مع شوية ماء وبخلطهم وبضيفهم عالارز بشكل طولي والكركم نفس الشي بعملهم عالشكل زاائد عالارز وبغطيه بتركه عالنار واطيه عشر دقائق لانه ضفناله مي

وبعدين بطفي النار تحته وبتركه يرتاح

قبل التقديم اختياري …وهيك الارز جاهز معنا

& بحمر الدجاج ودهنته بزيت ذره عشان اللمعه

عند التقديم بحرك الارز عشان الالوان تتوزع وبضعه بطبق التقديم وبضع عليه الدجاج وبزينه بالقرفه واللومي يلي مع الارز ..وشرائح ليمون وفلفل اخضر

ممكن التزين باللوز الزبيب المقلي

ويقدم مع صلصة الدقوس واللبن ..وصحه وعافيه

ملاحظه :1- ممكن تلوين الارز ببودرة الزعفران او الوان الطعام …مو متوفره عندي فاستخدمت الكركم والبابريكا

-2 ممكن اضافة ورق الغار لسلق الدجاج وحب الهيل والقرنفل للارز

اذا جبيتو لون الارز يكون ابيض قبل التلوين لا تضيفو بهارات الدجاج وبتقللو فلفل اسود لانهم بغمقو لون الارز

وممكن ما نضع الدجاج فوق الارز ونكتفي بتحميره من بعد السلق بس انا بفضل وضعه مع الارز بالفرن

بالوصفه السابقه للمندي كان الدجاج مع الارز بالفرن بدون سلق والطريقتين اروع من بعض بكل صراحه طعم لا يقاوم

ان شاء الله تعجبكم وتجربوها

دمتم بكل خير