حلا أيام زمان حلاوة السميد أو الكريزه
حلا أيام زمان حلاوة السميد أو الكريزه
المقادير
- لعمل طبقة الكريزه بالحليب :
- كوب ونص او كوبين من السميد الخشن
- اربع اكواب من الحليب السائل
- كوب سكر (او حسب الرغبه )
- لون طعام اصفر
- معلقة صغيره من سكر الفانيلا او ماء الورد
- لعمل الطبقه الثانيه :
- كوب سميد
- اربع اكواب ماء
- كوب سكر
- لون طعام احمر
- معلقه من سكر الفانيلا او ماء ورد
الخطوات
السلام عليكم ويسعد أوقاتكم بالخير
اليوم وصفتنا حلاوة السميد ( الكريزه ) واكيد الكل بحبها وبعرفها وبتذكرنا بايام الطفوله وايااام زمان
بس اليوم حبيت اقدمها بطريقتي مع انها بسيطه وسهله بس لا بد من انه هيك وصفات نعملها ونتذكر ايام الطفوله ونحكي عنها لأطفالنا وان شاء الله بتعجبكم
يلاااا نشوف الطريقه …..
& اولا حابه احكي ملااحظه الطبقه الاولى عملتها بحليب فطلعت معي مش متماسكه السبب انه لازم لما نعملها بحليب نزيد السميد وانا راحت عن بالي بس مشى الحال هالمره وطلعت زاكيه كتبت بالمقادير العيار المزبوط انا استخدمت كوب سميد بس،، فلذلك راح نزيد نص كوب تقريبا عشان تكون متماسكه ..اما الطبقه الثانيه عملتها بالماء وطلعت متماسكه مو محتاجه لزيادة سميد
& لعمل طبقة الكريزه بالحليب بنضع السميد والسكر والحليب السائل وبنحركهم عالبارد ومن ثم بنرفعهم عالنار عاليه وبنستمر بالتحريك ثم بضيف شوي من لون طعام محلول مع معلقتين ماء استخدمت اللون الاصفر وممكن نعملها بدون اضافة اللون ،،، لحتى يبلش يغلي بنضيف النكهه يلي بنحبها ممكن ماء ورد او فانيلا انا ضفت معلقه من سكر الفانيلا وبنتركها تغلي مع التحريك المستمر لحتى تثقل ويصير الفقاعات يلي فيها كبيره بتكون جهزت معنا يعني تقريبا بدها دقيقتين بعد ما تغلي او حسب ما تثقل بنزلها بجاط البايركس وبسوي سطحها بتركها تتماسك لحتى اجهز الطبقه الثانيه
& ممكن الاستغناء عن الطبقه الثانيه بس انا حبيت اعمل طبقتين ولونين بطلع شكلها احلى
& وممكن عمل الطبقتين بالماء بدون الحليب بس مش غلط التغير (اصل الكريزه بالماء بتنعمل )
& الطبقه الثانيه تقريبا نفس الطبقه الاولى بس بدون حليب،،، بضع السميد والسكر والماء وبحركهم وبرفعهم عالنار عاليه وبضع شوي من اللون الاحمر محلول مع معلقتين ماء وبستمر بالتحريك لحتى يغلي بوطي تحته النار وبتركه لحتى يثقل وبضيف سكر الفانيلا او ماء الورد
وبعد ما تجهز بنزلها فوق الطبقه الاولى وبسوي سطحها وبتركها لحتى تصبح بدرجة حرارة المطبخ وبدخلها الثلاجه للوقت يلي بتفضلوه هي الفكره بس انها تكون بارده انا عملتها قبل بيوم .. ثاني يوم بنقطعها ونقدمها وممكن تزينها بجوز الهند وصحه وعافيه
دمتم بكل الخير
