المندي ع طريقتي الجديده
المندي ع طريقتي الجديده
المقادير
- دجاجه أو أكثر حسب الكميه اللي بدك تعمليها انا بالصوره عامله دجاجتين
- ٣ كاسات رز بسمتي منقوع قبل بوقت
- بصل ٣ حبات صغار كامل مش مقطع
- ٣ حبات جزر
- ٣ حبات بطاطا مقشره
- راس ثوم كامل
- حبتين بندوره
- ٣ حبات بصل مفروم شرائح
- رأس ثوم مهروس
- فلفل حار
- ماجي
- هيل مطحون
- ٣ ملاعق بهارات مشكله مطحونه
- الملح
- رغيفين خبز تقطعيهم مثلثات
- لتتبيلة الدجاج كلهم بالخلاط مع بعض لحد ماتنخلط المكونات مع بعض:
- حبة بندوره
- ٤ ملاعق صلصه
- ملعقة لبن
- ملعقه زيت نباتي
- شوية ملح
- رشة بهارات
- نص حبة بصل
- ٣ ملاعق كبار سماق
- ٣ حبات ثوم مهروس
- للتزيين:
- فسدق طعام
- بقدونس
- ليمون
- فلفل
- بصل شرائح
- سماق
- وللتقديم جهزي:
- شطه حاره
- سلطه
- سلطة لبن وخيار كثير طيبه مع المندي
الخطوات
اول شي تحطي بطنجره ع الغاز كاسة زيت وبتضيفي شرائح البصل والفلفل الحار والهيل وتغطي عليهم لحد
مايذبل البصل وبس يذبل تنزلي عليه الدجاج والماجي والبهارات والثوم المهروس وتحركيهم كويس مع بعض وبعد خمس دقايق تحطي الجزر والثوم والبصل والبطاطا وبتضيفي كاسة مي… وبهالوقت بقصدير حطي فحم مولع
بالطنجره نفسها وغطي عليها لحد ماياخذ طعم الفحم كامل وبعدها طلعي الفحم((بهالطريقه صار طعم الأكل ومرقة الدجاج كلها طعم فحم)) وضيفي المي والملح وغطي ع الطنجره لحد مايستوي الدجاج والخضار.. بس قبل يستوي بربع ساعه ضيفي حبتين البندوره لأنها بسرعه تستوي ماتاخذ وقت…
بالنسبه للتبيله بس تبلشي طبخ اعمليها وحطيها بالثلاجه أقل شي مدة ساعه.. وبس يستوي الدجاج والخضار طلعيهم ونزلي مكانهم الرز وغطي عليه ع نار هاديه لحد مايستوي… وبلشي تبلي الدجاج والخضاووغطيهم كويس بالتتبيله يعني القطعه كامله لازم تتغطى بالتتبيله وبس تخلصي.. مقدار كاسة حطي زيت بالقلايه وبلشي اقليهم قلي لأن الطعم هيك أزكى وبس تخلصي قلي غطي الدجاج مباشره بكيس ومايدخل عليه هوا طبعاً مع فحمه مولعه.. واتركيه ع جنب.. الكيس يخلي الدجاج طري كثير ماينشف معك أبداً..
ومن نفس تتبيلة الدجاج خذي وحطي ع الخبز المثلثات وحمري الوجه بس وغطي عليه….
وبس يستوي الرز كمان تحطي فحمه مولعه..
وبالاخير تقدميه مع الزينه والسلطات وتقطعي شرائح بصل وتحطي عليها سماق وتزيني الاكل فيه….
عوووافي أن شاء
“انا عمري 21 وأول مره انزل طبخه اعطوني رأيكو شو ماكان حتى لو انتقاد انا لسا اتعلم”
