عشيقة زوجي بقلم هلا غرابلي

#عشيقة_زوجي_بقلم_هلاغرابلي

الجزء الاول:

عشيقة زوجي….

الحياة …دائما بتعطيك شي و بتاخد منك شي تاني يعني مستحيل ضلك عايش سعيد او حتى ضلك عايش حزين على طول فيه مد و جزر بحياتك لازم تمر عليك فترة تنقلب الطاولة عليك و تنقلب حياتك من الاحسن للاسوا او العكس تماما وهيدا يلي صار معي انقلبت حياتي بس للاسف من الاحسن للاسوا….

متزوجة و عندي ابني جود يلي كنت شوف الدنيا من عيونه و زوجي قصي يلي كان مثال للزوج الصالح و الاب الحنون و اهلي يلي كانو سندي و عزوتي بهالحياة و بيت حمايي يلي كانو اهلي التانين…يعني باختصار كنت عايشة بحياة اقرب للمثالية حتى هديك السنة يلي كانت اسوا سنة بحياتي على الاطلاق السنة يلي انهار فيها زواجي و بعدت عن ابني ضي عيوني …..

بدات معاناتي بعد ما رجعت ميساء يلي كانت حبيبة زوجي السابقة لحياتي و حياة زوجي رجعت لدمرها و تحرق كل شي حلو و تخرب بيتي يلي ما تخيلت ابدا انو بيوم اطلع منه مكسورة القلب و الخاطر ….

مرت اول 3سنين زواج علي كانت سنين حب و تفاهم و انسجام و صدق و مودة و رحمة متل اي اتنين متزوجين بحبو بعض ….

زوجي كان انسان صريح معي و قلي خلال فترة الخطبة انو كان يحب وحدة اسمها ميساء يلي تركته و تزوجت و صار عندا اولاد من رجال تاني كان وضعه المادي افضل من زوجي و كانت صفحة بحياته و طواها …..بس هالصفحة رجعت انفتحت مرة تانية بعد ما ميساء طلقت و رجعت تتواصل مع زوجي لتستعيد قلبه و عقله يلي ما عادو ملكي …..

لاحظت على زوجي كترة شروده قاعد معي جسد بس ما روح كل ما حاول اتقرب منه يصدني صار انسان عصبي و قاسي معي كنت حاول افتح معه اي حديث يسكره فورا كنت حاول الفت نظره ب لبسي و حركاتي لا يطلع و لايهتم وصلنا لمرحلة كترت مشاكلنا على اسباب تافهة كتير و وصلت لوقت فقدت اعصابي فيه و قلتله انت رجال ما بينعاش معك بقا بس كان جوابه اقسى من كل شي مرق علي قلي اانا يلي ما بقا بدي عيش معك و ما بحبك وندمان اني تزوجتك… انا بعدني بحب ميساء و بدي اتزوجا هون كانت الصدمة الاولى يلي خلتني انهار و ابكي قلتله عم تحكي هالحكي بعد 3سنين زواج و في ولد بيناتنا و بعد الحب و العشرة و بعدين وينها ميساء تركتك و تزوجت رجال بس لانو اغنى منك قلي اي و طلقت لانو بعدها بتحبني و بدا اياني و تابع حكيه انا اكتشفت انو بعدني بحبها و متعلق فيها قلتلو طب و انا مرتك يلي النا عشرة مع بعض وين حبك الي .!!!راح ؟؟!!بهالبساطة بتحكي هيك حكي قدامي ما عاملي اعتبار و حساب قلي نحن لازم نطلق و كل واحد يروح بطريق و هون كانت الصدمة التانية انو بدو يطلقني كرمال يتزوج وحدة غيري تركته كرمال شب معه مصاري اكتر و دفع عليها اكتر قلتلو و ابنك قلي بدك خديه بدك اتركيه و بعدين تركني منهارة بالارض و عم ابكي و طلع من البيت…..

هيدا زوجي …ابو ابني …قصي ….يلي قضيت معه احلى ايام حياتي..

عقلي كان رافض يصدق الحكي يلي سمعته حتى جسمي يلي صابته بردية كان رافض انو يكون موجود ببيت تاني غير بيتي او وحدة تانية غيري تنام على تختي وتحط تيابها بخزانتي و توقف على مرايتي لتتزين لزوجي انا يلي بحبه و بعشقه …..

دقيت لاخي يلي كان بنفس الوقت اخي و صديقي و سند ضهري و قلتلو تعا لعندي ضروري و اول ما اجا فتحتله الباب و حضنته وبلشت ابكي ارتعب و قلي شو في شو صاير معك قعدت و حكتله كل شي قلي بالناقص منه قومي ضبي اغراضك و مشي معي و يبقى منتفاهم معه بالمحاكم قلتله بس انا ما بدي اتطلق انا بحبه قلي عم يقلك ما بقا بدو اياكي وين كرامتك ما رح خليكي عنده ولا ثانية قلتله طول بالك انا ما دقتلك لتجي تقلي هالحكي يلي انا بعرفه قلي طيب شو بدك قلك و شو بدك نعمل انا جاهز قلتله ما في شي براسي هلا بس خبر اهلك بطريقة مناسبة يلي صار و انا بحكيك و بقلك شو صار معي بلكي غير رايه و عدل عن قراره قلي طيب ……

رجع زوجي المسا و قررت ارجع افتح معه الموضوع قلت بكون راق و هدي وبفهم منه اكتر و وقت حكينا قلي انا بعدني على قراري انا بدي الطلاق كنت مفكر حالي حبيتك بس انا ما بحبك قلتله خلص ما في مجال لتتراجع قلي ابدا خبري اهلك بطريقتك ومنبلش بكرا بمعاملة الطلاق و انا رح ادفعلك متاخرك كامل و اذا اخدتي جود معك انا رح اتكفل بمصروفه قلتله اي و بعدين رح تروح تتزوج هديك قلي هالشي ما بخصك ابدا قلتله ماشي بس انا عندي طلب مو كرمالي و لا كرمال عشرتنا و الايام يلي قضيناها مع بعض كرمال ابنا … انا حابة اشبع منه قبل ما اتركه لانو انا ما رح اخد حضانته قلي تفضلي قلتله انا بدي اعمل العدة عندك و ببيتك و بس تخلص العدة تاني يوم ما رح تشوفني ابدا بهالبيت …فكر شوي و قلي ماشي…..

كان بدي اكسب وقت بس لاعرف شو بدي اعمل و لاتعرف على عدوتي يلي كانت بلا ضمير و اخلاق حتى ماقبلت تنزل حتى على ضرة و حبت تنفرد بزوجي لحاله و 3شهور كانت بالنسبة الي مدة منيحة ……يتبع

الجزء التاني:

بعد ما نطق زوجي بالطلاق يلي اخر شي توقعت اسمعه من زوجي و ما تخيلت حياتنا توصل لهيك مطرح ابدا ……اسبوع قضيته بالبكا و الاكتئاب و بحسبي الله و نعم الوكيل فيكي يا ميساء يلي دمرتلي حياتي ….

3شهور …شو ممكن اعمل فين ليرجع زوجي …… بلشت استخدم علاقاتي الاجتماعية و اعرف كل التفاصيل حتى التفاصيل الصغيرة و التافهة عن غريمتي ميساء ليش طلقت و اكام ولد عندها و وين زوجها و تفاصيل تانية كتيرة ممكن تفيدني و كل التفاصيل كنت جيبن عالواتس و التلفون بحكم اني بالعدة و ما بقدر اطلع الا بالنوادر …..

اما علاقتي كيف كانت مع زوجي كنا متل الاخوات تماما خلال 3شهور مع انه حاولت كتير ابرز مفاتني و اتبعت وسائل اغراء كتير بس كله كان يقدر يقاومه بصعوبة و يتهرب منه بحكم انو ميساء كانت ماثرة عليه كتير …حتى كمان انفصل عني بغرفة تانية بس هالشي ابدا ما خلاني ايئس و استسلم للامر الواقع حتى لو كان الطلاق امر حاصل لا مفر و مهرب منه …..

طنشته …صرت اتصرف كانو عايشة لحالي بالبيت مع ابني جود يلي عمره سنتين وقت كان يجي كان يشوفني عم العب انا و ابني او عم نتعشى مع بعض و عم نضحك و مبسوطين كتير حتى احيانا يجي يشوفنا عم نرقص و كان يقرب يلعب ابنه بس بدون حتى ما يطلع فيني و كانه خايف تجي عيوني بعيونه ليلمح الحزن و الضرر يلي سببلي اياه و لانه نهاري كان طويل و ممل جدا و مافي لا طلعة و لا فوتة من البيت فكرت عبي وقتي بشغل استفاد منه ماديا و يلهيني عن التفكير بالمصاب يلي صابني لهيك بلشت بورشات تصميم ازياء لانو انا دارسة فنون بس ما سمحتلي الفرصة لكفي كل سنوات دراستي و اتخرج و تزوجت فورا بس كان بدي راسمال لبلش و انا ما معي ابدا لهيك طلبت من زوجي يعطيني نص متاخري حاليا و النص التاني لبعد الطلاق و وافق و سالني ليش لازمك المبلغ و انا قلتله انو بدي افتح مشروع خاص فيني …..

دقيت لاخي بحكم اني ما بقدر اطلع من البيت و وصيته على كل الاغراض يلي لازمني لمشروعي و بلشت بتصميم فساتين سهرة كبداية و اخي ساعدني كتير بما انه عنده معارف كتير و بلشت اتعامل مع ورشة خياطة ابعت صور التصاميم و مواصفاتها و هنن ينفذوها على ارض الواقع و ينزلوها عالسوق…….وكنت على كل تصميم اخد مبلغ و لحمدلله كان مشروع ناجح و الله وفقني فيه …

برجع لغريمتي ميساء يلي عرفت انو عندها ولدين و عرفت انو زوجها كمان طلقها ليتزوج عليها وحدة تانية يعني كانو صار عندها عقدة نفسية و بدها تنتقم بانها تعيد السيناريو يلي صار معها مع غيرها و تاخد رجال من مرته و اولاده لانو هي ما بتحب زوجي و لو بتحبه فعلا كانت ما فضلت رجال تاني عليه رجال عنده نفوذ و مال

اما زوجي يلي قال انو بحبها هو كمان ما بحبها بعد ما تركته و تزوجت غيره و هيدا يلي اتاكدت منه بعدين بس هو مصر يتزوجها و يحصل عليها حتى يرضي غروره و خاصة انو اعتبرها صعبة المنال وحصوله عليها انجاز اله بما انه اخدت رجال صاحب سلطة …….

كنا قاعدين بالسهرة وقت قررت زت قنبلتي و فجرها بنص خلقته و قلتله انا حابة قلك شغلة عرفتها عن جديد انو ميساء زوجها طلقها ثلات مرات و ما بقا بتجزله هلا الا اذا رجعت تزوجت من رجال تاني غيره و يلي هو حضرتك يعني انت محطة بس مو اكتر هالجملة خلته ينط من محله و يمسك ايدي بقوة و يلزقني بالحيط و قلي انت وحدة كذابة و غيورة قلتله اترك ايدي وبعد عني وجعتني متل ما بدك كذابة انا حكيت لخلص ضميري بس و كان وجهه احمر كتير و معصب و ترك البيت و طلع فورا و على ما يبدو راح تخانق معها ….

صار يرجع عالبيت يشوفني مشغولة بالتصاميم حتى احيانا اتعمد احكي مع المسؤولة عن ورشة الخياطة و هو قاعد و قلها اي عم اعمل كل جهدي و طاقتي لخلص الكوليكشن الجديد حتى مرة قلتله بدي تسالي شيخ قلي عن شو قلتلو دقولي اليوم من مجله فاشن يلي الها فروع بكل الوطن العربي قلي اااييه قلتلو بدن يوقعو عقد معي لينزلو كل الفساتين يلي من تصميمي على مجلتن لهيك مضطرة انه اطلع من البيت بالنهار بس ليوم واحد وقع العقد و برجع لهيك اسالي اذا بقدر ادفع كفارة مصاري عن هاليوم (ما في شي من هالشي ابداما وصلت شهرتي لمجلة فاشن لسا )قلي ولللللله ….ماشي ….بسالك….و هو متفاجا انو مرته صارت بزنس وومنو على اساس سال بس انا اشك بالموضوع و قلي انو ما بيندفع كفارة ابدا عن هالشي لهيك لازم التزم ببيتي …

.

صارو 3شهور و اجا وقت انو ضب اغراضي و ذكرياتي و جروحي و اطلع من البيت يلي قضيت فيه ايام حلوة لتجي وحدة تقعد محلي بس يلي كان قاهرني اكتر من البيت و من زوجي يلي رح يصير بحضن مرة تانية هو ابني يلي قررت اتركه عند ابوه بملئ ارادتي لانو رح يضل هو الرابط الوحيد بينا و الامل الوحيد لارجع عمر بيتي من جديد ….

حتى زوجي بالنهار يلي كنت عم ضب اغراضي فيه لارجع على بيت اهلي ما اجا ابدا عالبيت ودقلي و قلي ابعتي جود لعند اهلي و كان صوته مخنوق و مدايق

ايام صعبة مرقت علي بعد الطلاق …كنت فيق بالليل ابكي و مشتاقة لابني بس يلي مصبرني انو كنت شوفه كل يومين …..يومين يمرو علي متل السنة بطولن …..و كانو اهلي نعم الاهل يصبروني و يحنو علي….

بيت حمايي انزعجو كتير على طلاقي يلي حاولو يمنعوه و اخدو موقف من ابنن لانو كانو بحبوني و انو انا ببقى ام حفيدن و ضليت انا و اياهن صحبة متل اول اجي و روح عند زيارات و هالشي خدمني كتير

يتبع…

الجزء التالت:

اول شهر من طلاقي كان اصعب شهر مع اني كثفت شغلي بالتصميم و زار ربحي عن قبل و ابني كان كل يومين يجبلي اياه قصي للباب يحطه و يروح و يجي ياخده بعد كام ساعة او انا وديه لبيت حمايي….و مرة كان بدو يجبلي اياه و نطرت لقبل ما يجيبه بساعة و دقتله و قلتله ما تجبلي جود اليوم لانو عندي مناسبة شخصية قلي شو عندك ليش قلتلو اليوم خطبتي قلي خطبتك؟؟!!انا تابعت حكيي بدون ما علق على ردة فعله و قلتله بكرا جبلي اياه من الصبح و انا بوديه لعند اهلك عال6العصر قلي لمين انخطبتي قلتله ما بخصك و يلا مستعجلة سلام و سكرت …..

بعرف تماما انو طليقي انصدم بانو بهالسرعة انخطبت و رح صير لرجال تاني و بالحقيقة انا ما انخطبت بس صيتت اني انخطبت لشب من دبي ..

تاني يوم وقت جيت وصل ابني لبيت حماي يلي انا ما زلت على علاقة طيبة معن جهزت حاالي باحلى صورة و لبست المحبس و الطقم الدهب يلي كنت شاريتن من مردود شغلي و مريت على محل حلويات و جبت 4علب ضيافة يلي كنت موصية علين قبل بيوم من اتقل نوع و محفور عالعلبة اسمي و اسم خطيبي الوهمي اياد و فتت عندن و فورا انتبهو على الدهب يلي لابسته و قدمتلن الضيافة و قلتلن باركولي انا انخطبت اول ما سمعت حماتي الخبر ما تحملت و راحت فورا عالمطبخ تبكي بس انا لحقتها و قلتلا طولي بالك كل شي قسمة و نصيب قلتلي ليش استعجلتي هالقد بلكي رجعتو قصي بحبك و بدو وقت ليعرف قيمتك قلتلها انا ما رح ضل انطره و ضيع فرص عمري على امل يرجعني …..كانت الساعة 6و نص وقت رن جرس بيت حماي و راحت بنت حماي تفتح الباب ليكون عالباب واقف طليقي قلها اجت ندى قلتلو اي جوا لحظة لقلها تلبس قبل ما تفوت بس هو ما نطر ولا دقيقة و ضل فايت و وقت شفته قمت بسرعة حط جاكيتي علي فات و قلي شوووو ست الحسن انخطبت مبروووك لللليششش زفو العروس زفوها( كان صايبته الساعة الجنونية)و ايمت انشاالله العرس و مين سعيد الهنا يلي كان ناطرك لتطلقي ليخطبك فورا ووللله و جايبتيلنا ضيافة اللله اسمه اياد عاشق الاسامي (الضيافة كانت على الطاولة و وقت شافها حملها و قرا الاسماء المحفورة عليها)انا جاوبته هاي حياتي و انا حرة فيها ما في شي بيمنعني ارجع اتزوج مرة تانية الا بس انت بحقلك و انا لا قلي اسمعي منيح اذا بدك ضلي مستمرة بهالخطبة بدك تنسي ابنك تماما و تحلمي تشوفيه قلتله ما فيك تمنعني شوفه و ما تخلينا ندخل المحاكم بيناتنا بهالقصة و بعدين كلها 3شهور ليخلصلي خطيبي اوراقي و طالعة على دبي يعني ما بعرف لايمت برجع و بشوف ابني …. الطاولة يلي عليها الضيافة صارت بالجو و نزلت على راسنا متل الشظايا حتى اهله وقفو خايفين و ما عارفين شو يعملو من نوبة العصبية يلي صابته و كأنو من مبارح كان كابت جواته كل هالقهر و اجا هلا ليطلع كل شي اما حماتي ضل تقله طول بالك ابني كل شي اله حل ……قلي خطيبك …خطيبك شو بشتغل بلا صغرة قلتلو عنده وكالة البسة بمول دبي قلي ولله هيك انتو النسوان بتركضو ورا يلي معه اكتر قلتلو فشرت ما كل النسوان متل الشااكلة يلي عندك و كملت لبسي منيح و تركته عم يحكي و طلعت …..

بعد يومين كان بدو يجبلي جود متل العادة

بس انا هالمرة تناسيت تماما انو جود رح يجي اليوم و علملي عالموبايل متل العادة لانزل اخد جود او ابعت حدا يطلعلي اياه و كنت معظم الاحيان ما انزل انا اخده ابعت حدا كرمال احرمه من شوفتي …بعد ما عملي مس كول عالموبايل دقتله فورا و قلتله انو يييي ولله نسيت و راح من بالي انو بدك تجبلي جود اليوم و التهيت قلي ليش وينك انت قلتلو كنت معزومة عالغدا عند بيت حماييي اهلو لاياد قلي وينك انت هلا ؟؟؟قلتلو هاي عالطريق نص ساعة و بوصل انشالله… قلي باي شارع انت؟؟؟ قلتلو شارع الحمرا قلي خليكي بارضك جاية (انا فعلا كنت معزومة عالغدا بس عند صاحبة ورشة الخياطة ) ربع ساعة و كان واصل بس انا قبل ما يوصل فتت على رقم اخوي و بدلت اسمه و عملته اياد و دقيت لاخوي و قلتلو دقلي بعد تلت ساعة على انك خطيبي اياد لانو قصي رح يكون جنبي بعد شوي ……وصل و قلي اطلعي بالسيارة قلتلو شو عم تحكي انت مجنون قلي لسا ما جنيت اطلعي عم قلك قلتلو ما بطلع يلي بدو يشوفني من اهل خطيبي شو بدو يفكر و بجوز يوصلو الحكي لاياد و انا ما بنهنلي يزعل خطيبي مني خلص هات جود و روح الله معك نزل من السيارة و فتح الباب و دخلني بالقوة و قفل السيارة حتى ما اطلع منا و لف و طلع ….اذا بتريد نزلني و ما بقا ضل هيك ملاحقني خلص كل واحد عنده حياته و روح التفت لمرتك و اولادها قلي انت بطلتي تحبيني …..بتكرهيني؟قلتلو انا لا بحبك و لا بكرهك انت ما بتحرك بقلبي ولا نوع من المشاعر متل الحيط تماما قلي ندى انا ولله بحبك و بدي نرجع صرت اضحك كتيرر قلتله حلو كتير من 5شهور ندى بدي نطلق و هلا ندى بدي نرجع شو مفكرني لعبة و بعدين انت ما بتحبني بتحب ميساء قلي لاااا انا ما مبسوط معها ابدا قلتله ما خصني هادا قرارك المهم انا مبسوطة مع اياد بعد شوي دقلي اياد(اخي ) و فتحت

الخط و قلتله اي حبيبي….تمام ..مشتاقتلك……غير شكل الاكل طيب كتيرررر بس امك بتجنن ما خلتني ساعدها ولا بشي و كل ما قلها شبعت مرة عمو تقلي اقعدي ما اكلتي شي لسابلش قصي ينفخ و يحمر و يخضر قمت قلتله يلا لصير بالبيت منكفي حديثنا باي بحبك و سكرت قلي دخيل الله خلص بكفي ليش هيك عم تعملي نحن منحب بعض قلتلو احكي عن حالك بس و يلا وصلني لاقرب نقطة لبيتي بدي ارجع عندي شغل كتيرررر …..

ميساء يلي بلشت تحس على زوجها انو عم يحن لمرته القديمة فقدت اعصابها و دقتلي و اول ما عرفت عن حالها كبست زر تسجيل الصوت و انا كنت جدا محترمة معها بحديثي اما هي بلشت تسب علي و تقلي ابعدي عن زوجي و هيدا الي و بحبني و لو ما بحبني ما كان زتك ببيت اهلك و تزوجني و قعدني محلك و حكي كتير بشبه بعضه انا كنت استفزها بالحكي بطريقة ناعمة حتى طالع اسوا ما عندها و كان جوابي الها بانو انا انخطبت و رح اتزوج قريبا و طلعي من حياتي انت و زوجك بعد ما خلصت سكرت و بعتت التسجيل الصوتي لطليقي قصي و معاه حكي (اطلعو من حياتي بقا كل يومين بتعملولي قصة جديدة و انا ما عم قرب عليكن و شو هالمستوى البيئة يلي حاويه عندك بالبيت)….

يتبع

كان التسجيل الصوتي البسيط هو نهاية زواجها لميساء من زوجي بس زوجي فكر انو خلص بعد ماطلقها اناهلا رح اترك خطيبي و ارجعله بالامر الساهل صار يدقلي عشر مرات بالنهار و من اصل العشرة لرد مرة وحدة و صار كل يوم يمر بالسيارة من تحت بيتي متل المراهقين و حاططلي اغاني ارجعلي انا قلبي معاك و كل فترة يبعتلي بوكيه ورد احمر اما اهله قلولي انو قصي ندم كتير على جازته من ميساء يلي كانت متطلبة كتير و ما يعجبها شي و غير قنوعة و كان ينطر مناطرة لاجي عند اهله ليلحقني وبقي عهالحالة 3شهور و انا العب باعصابه ارخي الحبل و شده لوقت قلتله فيه ما تجبلي جود هالاسبوع لانو عم انزل عالسوق عم جهز لبس و خيط فستان عرسي الابيض و وقتها جن و قلي بدك تلبسي الابيض لواحد تاني غيري ما بتلبسيه الا على جثتي و انا طنشته ….

بتفاجا بنفس اليوم بالسهرة بدق بابنا و بكون قصي يلي جاي يطلبني من اهليبس اهلي قلوله ما بصير تطلب وحدة و هي مخطوبةو اعطينا وقت لنفكر لانو المفروض عرسها بعد 15يوم و قبل عرسي باسبوع فسخت خطبتي على ايادو رجعت لقصي يلي شرطت عليه مهر جديد و عفش جديد و طلبت منه يبيع البيت و يشتري بدله حتى نبدا بداية جديدة و بالنسبة لشغلي خبرته انو مستحيل اتركه بس بعدين خففت منه بحكم اني حبلت فورا ببنوتي سارة اما ميساء سمعت انو عم تحاول مع زوجها يرجعها على ذمته حتى لو على ضرة .

انتهت.