طريقة السبانخ مع الدجاج والأرز بتشهي
طريقة السبانخ مع الدجاج والأرز بتشهي
المقادير
- دجاج حسب الحاجه استخدمت دجاجتين
- سبانخ طازجه خضرا او مفرزه
- راس بصل
- راس ونص ثوم مهروس
- زيت ذره
- كيلو ونص أرز قصير الحبه
- لتتبيلة الدجاج :
- م.ك.ثوم مهروس
- م.ك.ملح
- م.ك.فلفل أسود
- ربع كوب خل ،،ما يعادل تقريبا اربع ملاعق كبار
- ربع كوب دبس رمان تقريبا اربع ملاعق كبار
- 2 م.ك.زيت زيتون
الخطوات
السلام عليكم ويسعد مسااكم بكل خير
اليوم بقدملكم أكله شتويه ولذيذه ومفيده سبانخ مع الارز والدجاج وهادا موسمها زااكيه كثير بالجو البارد ومغذيه لانها غنيه بالحديد وما في غنى عنها بالشتا اما اذا كانت فطاير سبانخ او سبانخ مع الارز ..ان شاء الله بتعجبكم طريقتي
يلاااا نشووف الطريقه …..
& اول شي بسلق الدجاج بغمره بماء وبتركه لحتى يغلي بشيل الزفره يلي عالوجه بضيف راس بصل بفتحه بالسكين من فوق عالشكل زائد بدون ما افرمه عشان اشيله بسهوله من بعد ما يستوي الدجاج …من بعد غليان الدجاج بعشر دقائق بضيف ملعقة ثوم مهروس لسلق الدجاج وملعقة ملح وبتركه لحتى يستوي
الثوم المهروس تقريبا راس ونص اخذت منه لسلق الدجاج ولتتبيلة الدجاج وللسبانخ اخر شي ،،كمية الثوم حسب ما بتحبو نكهته فيكم تزيدو او تنقصو
& من بعد ما يستوي بنشل الدجاج وبضعه عالجنب وبجهزله التتبيله وبدهنه فيها وبتركه لحين وقت القلي أو التحمير حسب ما بتفضلو بس بالقلي طعمه جدا زااكي مقرمش من برا وطري من جواا
وممكن نخليه مع السبانخ وما نقليه ولا نضعله التتبيله الخيار الكم ….
& عالمرقة الدجاج بنضع السبانخ ( السبانخ يلي متوفره عندي المفرزه من بعد ما ذوبتها بالمرقه طحنتها عالخلاط لانها كانت خشنه كثير ومن بعد الطحن برجعها تكمل سواها وبزيدها ماء اذا كانت ثقيله او حسب ما بتحبو ثقلها …
( استخدمت 2 باكيت سبانخ )
بعد ما تغلي كم غلوه بضيفلها الثوم المهروس المقلي بزيت ذره ..لحتى يصير لونه اشقر بضيفه للسبانخ وما بكثر عليه زيت وبزبط الملح للسبانخ وبعد ما يغلي مع الثوم غلوتين ثلاث بطفي تحته وبكون جاهز معنا
& اذا كان السبانخ طازج أخضر بنفرم اوراق السبانخ فرم خشن وبنغسله اكثر من مره لحتى ينضف من الاتربه والاوساخ وبنصفيه وبنعصره بأيدينا من المي وبنضيفه لمرقة الدجاج
& بنقلي الدجاج بزيت ذره عالنار وسط وما بنطول عليه بالقلي لانه بتحمر بسرعه لانه مستوي وبطبخ الارز الابيض وبقدمه مع السبانخ
& ممكن طبخ السبانخ مع اللحمه حسب ما بتفضلو
دجاج او لحمه
وهيك صارت جاهزه معنا للتقديم وااكيد يقدم مع الليمون وصحه وعافيه
دمتم بكل خير
