بسبوسة التمر والقرفه 2 طعم شتوي بأمتياز

المقادير

• كوب ونص سميد ناعم
• نص كوب طحين
• كوب الا ربع زيت ذره
• نص كوب حليب سائل
• 2 بيض
• بكيت قشطه او نص كوب لبن
• م.ك.فانيلا
• م.ك.بكنج باودر
• م.ك.قرفه مطحونه اختياري
• رشة ملح
• كوب من معجون التمر
• لنقع التمر:
• كوب حليب ساخن
• لتسقية البسبوسه :
• علبة حليب مكثف محلى ،،،او قطر
• للتزين:
• قرفه مطحونه

الخطوات

السلام عليكم ويسعد اوقاتكم بالخير

اليوم بقدملكم طريقة بسبوسة التمر والقرفه من ألذ انواع البسبوسه كثييير طيبه وطعمها شتوي بما انه دخلنا بموسم الشتا وسهله وبسيطه وفخمه بنفس الوقت ان شاء الله بتجربوها وبتعجبكم

يلاااا نشوف الطريقه …..

& اولا بنقع كوب من معجون التمر بكوب حليب سااخن وبتركه لحتى يبرد ..بعد ما يفتر او يبرد تماما ببلش بعمل خليط البسبوسه

& بخلط المواد الجافه سوا الطحين والسميد والبكنج باودر ورشة ملح والقرفه

& عالخلاط الكهربا بضيف البيض والفانيلا والقشطه والحليب والزيت وخليط التمر والحليب

( ممكن استخدام اللبن بدلا من القشطه ) وبخفقهم سوا لحتى يمتزجو تماماثم بضيفهم عالخليط المواد الجافه وبخلطهم بالخلاط اليدوي لحتى يختفي السميد والطحين بوقف خلط وبتركه خمس دقائق (اذا كان الخليط كثير شديد بخففه تدريجيا بربع كوب حليب سائل لا اكثر )ثم بسكبه في صينية مدهونه بالزيت ومرشوشه بالطحين او بالسمنه او بالطحينيه

& بدخلها على فرن محمى مسبقا عالثاني رف بالفرن من تحت او في وسط الفرن عالدرجة حراره 180

بتاخذ وقت من 35-40 دقيقه بختبر استوائها بعود خشبي ..بعد ما تستوي بتركها خمس دقائق ترتاح وبعمل فيها ثقوب بواسطة عود خشبي وبسقيها حليب مكثف محلى وبتركها لتتشربه تماما وبعد ما تبرد بغطيها لوقت التقديم بقطعها وبرشها بالقرفه المطحونه او حسب الرغبه

& ممكن تسقيتها بالقطر البارد حسب رغبتكم

بس طعمها مع الحليب المكثف المحلى رااائع

& ممكن الاستغناء عن القرفه المطحونه بالوصفه بس حبيت اضيفها لانها زاكيه مع التمر وجو الشتا

& ما ضفت السكر للوصفه اكتفيت بحلاوة التمر والحليب المكثف المحلى وحلاوتها طلعت مزبوطه اذا بتحبوها تكون حلوه كثير ضيفو نص كوب سكر للوصفه ..بس بدون سكر طلعت 100/100

ووووهيك وصفتنا الطيبه صارت جاهزه بسيطه ولذيذه لاااازم تجربوها عشان تحكمو بانفسكم عالطعم بانتظار رأيكم بالوصفه

دمتم بكل الخير