كيكة الديسباسيتو ملكة الكيك
كيكة الديسباسيتو ملكة الكيك
المقادير
- ٤ حبات بيض بدرجة حرارة الغرفة
- كوب سكر او حسب الرغبة
- ٥ ملاعق كاكاو خام نوعية جيدة
- كوب حليب او ٤ ملاعق حليب مع كوب ماء
- نص كوب زيت نباتي
- باكينج باودر
- فانيلا
- رشة قرفة صغيرة
- رشة قهوة
- كوب ونص طحين منخول ممكن تحتاجي اكتر او اقل
- تشريب الكيك:
- كاسة ماء دافئ
- ملعقة كاكاو او نسكافيه حسب الرغبة
- ملعقة شوكلاته سائلة تذوب مع النسكافيه او الكاكاو
- طبقة الكريمة :
- ٤ ملاعق نوتيلا او اي شوكلا سادة
- ٢ ملعقة كاكاو
- ربع كوب حليب سائل
- علبة قشطة اختياري
الخطوات
السلام عليكم ورحمة الله وبركاته كيف الصبايا الامورات
هاي الوصفة نزلتها قبل المرة وحبيت اكررها لانه قسما بالله من ازكى الكيكات يلي رح تذوقيها اذا كنتي من عشاق الشوكلاته
اول شي بنبلش بالكيكة
بنخفق البيض كتير منيح مع الفانيلا وبنضيف السكر وبنخفق وبعدين الزيت والحليب و بعدين بنضيف الكاكاو الخام وبننخل الطحين وبنقلب بملعقة خشبية وهاد من اسرار نجاح الكيك انه الطحين ما بنخفق بالخفاقة الكهربائية وباخر نخلة للطحين بنضيف الباكينج باودر وبنخلطه بس شوي لانه الكيك ما بينخلط كتير بعد اضافة الباكينج باودر وهاد سر تاني
بنكون محميين الفرن وداهنين البايركس يلي بدنا نقدم في الكيكة بزيت او زبدة راشيين شوية طحين
بنسكب الكيكة وعلى الفرن
بعد استواء الكيكة بنخزقها بعود خشبي تبع الشواء وبنشربها بربع كوب حليب دافئ مع ملعقتين كاكاو او نسكافيه وشوكولاتة سائلة
بنخفق الدريم ويب مع شوية حليب ونقطتين فانيلا
سائلة وبنحطهم بالفريزر ٥ دقايق
وهلأ على الغاز بحط ربع كوب حليب وملعقة كاكاة او تنتين انا حسب النظر و٤ ملاعق شوكولاتة دهن او لوحين ازا كانت جامدة على نار هادية ٣ دقائق مش اكتر وممكن اضيف ملعقة زبدة بتخلي الخليط يلمع بعد ما نشيله عن الغاز بنضيف القشطة اختياري طبعا بس لازم تعرفي انه الخليط ما بيكون سائل بيكون متل قوام الطحينية
بنخليه لحتى يبرد وبعدين بضيفه شوي شوي للدريم ويب مع التقليب من تحت لفوق بتكون الكيكة باردة ومتشربة السائل بنضيف خليط الكريمة عليها وبنزينها وعلى التلاجة ساعة
