مني كيك تريليتشا ملكة الكيك

المقادير

• اربع بيضات
• معلقة كبيرة خل
• كوب طحين
• ثلاث معالق زيت نباتي
• ثلاث معالق ماء
• نص معلقة بكنغ باودر
• معلقة كبيرة فانيلا
• نص كوب سكر
• للتشريب :
• كوبين حليب
• مغلف كريمة بودر
• معلقة صغيرة فانيلا
• للكريمة :
• مغلفين كريمة انا استخدمة نوع نون
• كوب شاي صغير حليب بارد
• للكراميل :
• نص كوب سكر
• كوب حليب
• معلقة كبيرة نشا
• معلقة صغيرة فانيلا
• معلقة كبيرة زبدة

الخطوات

السلام عليكم صديقاتي عزيزاتي الغاليات اعتذر على التقصير واعتقد الكل عارف السبب اكيد التعليم عن بعد

ارجو ان تقبلو اعتذاري يا احلى ستات زاكي واذا ما قدرت ارد ع التعليقات فأعذروني بحبكم في الله واشهد الله على حبي الكم

المهم جبتلكم هالكيكة الضريفة لأصحاب القلوب الشجاعة الي تتحدا الدايت وتنتقم لكرشها وتعمل هالكيكة وتمزمز عليها بعد يوم عناء مع التدريس عن بعد ههههههههههههه والله يقدرني على عمل الخير ههههههههههههههه ويلا عالتطبيق بسرعة

اول شي بخفق البيض والسكر والفانيلا والخل حتى تصبح خليط كريمي وتضاعف حجمها بدها تقريبآ من ٧ ل ١٠ دقايق خفق وبعدين بضيف الزيت وبخفق باستمرار وبضيف الماء وبعدين بفصل الخلاط وببلش بالمعلقة السليكون اوالسباتشولا وببدأ بإضافة الطحين بالتدريج مع البكنغ باودر وبقلب من تحت لفوق حتى يختفي الطحين ويصير عندك خليط كيك متجانس وقوامو مابكون سائل ولا ناشف قوام كريمي رائع بوزع الخليط بأطباق بايركس صغار مدهونين زيت او بتعملي بصينية وحدة بعبي الاطباق للثلث لانها رح تنفخ ولازم تتركي مجال للكريما والكراميل وهسة بندخلها الفرن بتاخد ما يقارب الربع ساعة طبعآ حسب فرنك لازم تكون نار وسط والفرن محمى مسبقآ وبعد ما تجهز بختبرها بسكين او عود خشبي من النص اذا طلعت ناشفة امورك تمام حمري الوجة وطلعيها تهدا حرارتها وبعد خمس دقايق شربيها خليط الحليب الي هو بتخلطي كوبين الحليب مع مغلف الكريمة والفانيلا حتى يذوبو تمامآ وشربي الكيك فيها حتى تتسقى بشكل كامل وبعدين بتتركيها تتشرب وتبرد وبهالوقت اخفقي الكريما واتركيها بالثلاجة تتماسك نص ساعة ولازم تكون الكريمة متماسكة عشان ما تختلط مع الكراميل بس نحطو فوقها المغلف مكتوب بيوخد كوب شاي حليب انتي حطي ع المغلفين كوب علشان تطلع معك متماسكة وبعد هيك الكراميل بتحطي ع الوجة وبتزيني بقليل من الكريمة بخففها بشوية مي وبعمل خطوط وبمشي على الخطوط خط رايح خط جاي حتى تطلع بهالشكل معك بتحطيها بالثلاجة تتماسك وتبرد وتتشرب النكهات مع بعض وكوليها بالصحة والعافية

للكراميل

بذوب السكر حتى ياخد لون ذهبي ويذوب كامل وما يضل في حبيبات سكر ولازم النار تكون هادية وبعدين بتكوني مذوبة النشا والفانيلا بالحليب وبتنزلي بالتدريج على السكر المكرمل ولازم تكوني حريصة بهالمرحلة لانو بفور اولها لهيك بتضيفي شوي شوي حتى يوقف الفوران ولازم تحركي بإستمرار حتى ما يكبتل النشا وبعد ما يذوب الخليط ويصير عندك سائل كثيف بتنزليلو معلقة الزبدة وبس تذوب بتوخدي الصوص وبتصفي بمصفى ناعمة حتى اذا كان في اي تكتل او اي شي بالصوص ما ذاب بتصفي وبصير عندك صوص كراميل ولا اروع ولازم تتركي يبرد تمامآ قبل ما تحطي ع الكريمة عشان ما يسيح الكريما

وبهيك انتهت طريقة الكيكة العدوة للدايت وصديقة الكروشات وارجو منكم تجربتها بكل جرئة وابدولي ارائكم يا لزلوزات والى اللقاء بكيكة تسمين اخرى ههههههههههههههههه

ملاحظات نجاج الكيك

اول شي لازم البيض يكون بحرارة المطبخ مو من الثلاجة

ثاني شي لازم تنخلي الطحين والبكنغ باودر مرة او تنتين عشان تدخلي الهوا على الطحين

ثالث شي لازم تكوني محمية الفرن قبل الخبز بعشر دقايق

اعذروني على نقص تصوير الخطوات بس هاد الي اقدرت اصورو بحكم استعمار تلفوني الخاص للدراسة عن بعد

اشكر كل الصبايا الي بدعموني ودايمآ بعلقولي تعليقات حلوة متل قلبهم الابيض ربي يسعدكم ويجبر خاطركم يا رب ادعموني بدعوة حلوة وصادقة من القلب وربي يجزيكم الجنة يا رب