برغر لحمة مع حلقات البصل والبطاطس الشبس شي من الخيال

المقادير

• البصل الحلقات:
• بصله كبيرة
• ملح
• فلفل
• بهارات مشكلة حسب الرغبه
• ملعقه نشا
• نصف ملعقه صغيره بيكربونات الصوديوم
• ملعقتين قرشله
• نصف كوب طحين
• للبرغر:
• كيلو لحمة
• ملعقه صغيرة فلفل
• ملح
• ملعقه صغيره كزبرة مطحونة
• للبطاطس الشبس:
• بطاطا
• ملح
• فلفل او اي نوع بهارات بتحبو أو شطة
• ملعقه نشا
• ملعقه طحين
• اضافات البرغر حسب الرغبه:
• خس
• بندورة
• كتشب
• جبنه
• ميونيز

الخطوات

السلام عليكم ورحمه الله وبركاته

حبيبات قلبي اشتقتلكم كثيــــــــــــــر كثير وانتو اشتقتولي ان شاء الله تكونو بألف خير بعرف كثير طولت لرجعت لزاكي بس يلي بيدخل لزاكي مستحيل ما يرجعلو بعدت عنكم لظروف صعبة بس ارجعت وكلي شوق الكن ولأخباركن وتعليقاتكن الحلوة زيكن واكيد ما رجعت وأيدي فاضيه جبتلكن وصفه البرغر يلي رح تخليكن تجربوها ان شاء الله تعجبكن

يلا ادخلوا ولا تنسو كماماتكن واكيد كفوفكن لأنكن كلكن بتعرفن انو أنا ام كف ههههههههه فكثير فادتني الكورونا وصار عندي كفوف كتير هههههههه⁦^_^⁩

يلا مابدي شط ومط أكثر من هيك حتى ما تملو مني من اول يوم

وصفه البرغر رح نبلش باللحمة لازم تكون اللحمه ناعمه ح نضيفلها الفلفل والملح والكزبره ونخلط وبس وبس

طريقه التشكيل ما رح يحتاج لقطعه خاصه بالبرغر بتقدري تستخدمي صحن مدور أو بإيدك انا بالنسبه الي استخدمت غطاء علبة الجبنه الكرتوني حتشوفو بالصور بحط كيس فوق الكرتونه وبضيف اللحمة بعد ما كون قسمتهم كور متساويه وحط كيس فوق اللحمة وبضغط مزبوط وهيك بتكون جاهزة ولازم بين كل قطعه وقطعه نحط كيس وبنحطهم بالبراد نص ساعه بنحمي مقلايه ع النار مع نقطه زيت وبقلب البرغر حتى يستوي

وشرط المقلاي سخنة حتى ما يصغر حجم اللحمه كتير

حلقات البصل

بصله كبيرة عند التقشير ننتبه ما نغرز السكين وينقطع البصل بطول ما رح يطلع معنا شكل الحلقات البصله لما نقطعها الحلقات لازم تكون عريضه مو رفيعه يعني البصله تقريبا اربع أو خمس قطع وبعدها بنفك الحلقات عن بعض

بنحمي الزيت ع النار بنجهز الخلطه للتغطية

ملح وفلفل بهارات مشكلة حسب الرغبه

ملعقه نشا

نصف ملعقه صغيره بيكربونات الصوديوم

ملعقتين قرشله

نصف كوب طحين لازم يكون العجين زي عجين الكيك

بنغمس وحدة وحدة وبنديرها بالزيت حتى تأخذ لون حلو وطعم بجنننننن

البطاطس الشبس سهل كتير بنقطعو شرائح أو برش بالمبرشه بنضيفلو الطحين والملح والفلفل والبهارات والنشا وع الزيت الحامي حيكون تحفه

وهيك بتكون وصفتنا جهزت فرحو اطفالكم فيها بأيام الحضر حتى ما يضوجو بالبيت بالعكس حينبسطو ويساعدو ويستمتعو

الله يرفع الوباء يا رب

يلا بستنا رأيكم بتعليقات إذا كانت تعليقات حلوة رح افتح قناة يوتيوب حتى تدعموني شو رأيكم هههههه

بحبكم كثير اممممممه