أصابع زينب من تحت إديا

المقادير

• كاسة طحين
• ربع كاسة سميد ناعم
• معلقة صغيرة خميرة
• معلقة يانسون
• ٥ معلقة زيت نباتي
• رشة ملح صغيرة
• نص كاسة حليب دافية

الخطوات

السلام عليكم ورحمة الله وبركاته

كيفكم صبايا انشالله الكل بخير انشالله

هاي الوصفة عملتها لأول مرة

بس للأمانة انو عملت وصفة لاخت هون من البرنامج وطلعت العجينة بتجنن والكمية كبيرة بس ما عرفت كيف اشكلها وسرت اتفنن وخدلك عاد ع الفن والإبداع الله لا يورجيكم تنذكر وما تنعاد الحبة الله وكيلكم تقريبا قد راسي طلعت بطل اسمها أصابع زينب سارت اصابع ابو العبد

المهم رجعت اخدت وصفة لاخت كمان من هون وكانت الكمية قليلة واعتمدتها كتجربة والحمد لله نجحت وحبيت انو فيدكم وانشالله تعجبكم

نبدأ بسم الله الرحمن الرحيم

نخلط الطحين والسميد ونضيف الزيت ونخلطهم منيح ونضيف باقي المواد ونتركها ترتاح من ربع ساعة لنص ساعة وبعد ما ترتاح نشكلها انا استخدمت المبرشة للتشكيل

ونتركها ترتاح عشرة دقايق ونقليها بزيت حامي

ونسقيها بقطر بارد وثقيل

القطر عبارة عن

كاستين سكر وكاسة مي وعصرة صغيرة ليمون

والف صحة وهنا