باباروتي ملكة المعجنات
باباروتي ملكة المعجنات
المقادير
- اربعة كوب طحين
- كوب وربع حليب دافي
- معلقتين كبار خميرة
- اربع معالق كبار سكر
- ربع معلقة صغيرة ملح
- معلقة كبيرة بكنغ باودر
- معلقتين كبار زبدة بحرارة المطبخ
- للطبقة الخارجية:
- اربع معالق زبدة كبار بحرارة المطبخ
- معلقتين كبار نسكافية
- ثلاث معالق كبار سكر
- خمس معالق كبار طحين
- بيضة مخفوقة بدرجة حرارة المطبخ
- معلقتين كبار مية دافية لحل النسكافية
- للحشوة:
- شكولاتة سنكرز او اي نوع بتحبي
الخطوات
السلام عليكم صديقاتي كيفكم وكيف الوضع معكم بعد السينابون يلا جهزو حالكم وخبو ميزانتكم وبلا رجيم بلا هم وتعالو اليوم نعمل الباااااباااروووووتيييييي
طبعآ بحب احكيلكم انو انا كنت ناوي اعمل باباروتي بس بالصدفة طلع معي جدوروتي هههههههههههههه الله وكيلكم طلعو كباااار يعني لازم تصغري حجم العجينة واعمليهم باباروتي ههههههه
انا عملتهم عشر قطع انتي اعمليهم ١٥ وان شاء الله بطلعو معك باباروتي
ندخل على الطريقة
اولا نعمل العجين متل العادة بخلط الحليب الدافي والخميرة والسكر مع بعض وبعدين بكون ناخلة الطحين وخالط معو البكنغ باودر والملح وبحطهم مع خليط السوائل وبعجنهم واخر شي بحط الزبدة وبعجن كتير منيح حتى تتشكل عجينة طرية وما بتلزق باليد وبعدين بخليها ترتاح عشر دقايق وبعدين بقطعها وبحط فيها الشكولاتة وبشكلها كرات وبحطها بصينية الخبز الي عليها ورق الزبدة او مدهونة شوية زيت وبعدين بتركها تخمر مدة ساعة الا ربع وبهالوقت بجهز الطبقة الخارجية وهية طبقة رووووووعة بتيجي مقرمشة وبطعم النسكافية اكيد عشاق النسكافية رح ينبسطو فيها كتييييير
الطريقة بجيب الزبدة الي بحرارة المطبخ بقلبها بالمعلقة حتى تلين معي وبعدين بحطلها السكر وبقلب وبصحن على جنب بحط النسكافية مع المي الدافية وبذوب النسكافية منيح وبعدين بنزلهم على الزبدة وبعدين بنزل البيضة المخفوقة وبقلب واخر شي الطحين وبقلبهم منيح لحتى تصير عجينة لينة بس مو طرية كتير ولا جامدة متوسطة متل ما موضح بالصور
بعد هيك بس تكون خمرة العجينة بحط الخليط تبع النسكافية بكيس كريمة او بكيس تفريز وبقص طرفو وببلش اشكل الخليط فوق قطع العجين وبغطيها للنص ما بنزل بالخليط لتحت كتير لانو لحالو رح ينزل ويغطيها وبعدين بكون محمية الفرن وبدخلهم بالفرن لحتى احس الطبقة الي فوق جفت وتحمرو من الاسفل بنزلهم بحمرهم خفيف حتى ما يغمق لونهم وبعدين بطلعهم وبحطهم على شبك المطبخ يدفو شوي وبقدمهم بكل حب لكل حبيب وغالي يدفي قلبو فيها مع برد الشتا وبجنبها كوب نسكافية او كابتشينو او مع القهوة وتلذذو بالقرمشة الخارجية مع العجينة الاسفنجية والخفيفة جدآ والله ولا اروع من هيك جربوها ودعولي بحبكم بالله
ملاحظة
الطريقة لاصلية لهالنوع من المخبوزات بيحشو بالزبدة وهو اصلو مكسيكي وهو اسمو خبز القهوة ولاكن انا كنوع من التغير حبيت احشيهم سنيكرز وانتي شو بتحبي تحشيهم بكيفك يعني انتي وابداعك هاد الك وانتي تغيري متل ما بدك والف صحة وهنا ع قلبكم يااا رب
ملاحظة
بتقدري تزيني الوجة بصوص الكراميل او الشكولاتة الي استخدمتهم بوصة السينابون
