طبخة الملفوف ما بيحلى فصل الشتا بدونها
طبخة الملفوف ما بيحلى فصل الشتا بدونها
المقادير
- راسين ملفوف أو حسب أفراد الأسرة
- رز حبة وسط
- بهارات مشكلة حسب الرغبة
- كركم وكمون وفلفل أسود وملح
- زيت نباتي
- شرحات ثوم وشرحات بصل
- لحمة مفرومة
- ليمون
الخطوات
كيفكم يا أهل زاكي وكيفكم مع البردات أكيد طبخة الملفوف الكل بيعرفها وبيعملها وزكاوتها بهيك جو بارد وأنا نزلتها قبل بس حبيت أنزلها كمان هالمرة لأنها طبخة زاكية كتير وما بيختلف عليها حدا
المهم زي ما الكل بيعرف بنسلق ورق الملفوف نص سلقة وبنقطعه وبنجهزه يا إما بنفك الورق كامل ورقة ورقة أو بنقسمه بالنص أو حتى بنقسمه أربع أقسام وبنشيل الضلوع على جنب وبنحط منهم بالطنجرة من تحت مع شرحات البصل والثوم وممكن تحطوا قطع جاج أو لحمة أو بدون
بنحضر الحشوة وهي الرز المنقوع والمغسول والمصفى بنخلطه باللحمة المفرومة وحبيت اجرب البصل معها حطيت شوي مبروش وثوم مهروس مع شوية فلفل اخضر مش حار كتير حسب الذوق وفرمت بندورة ناعمة معها والبهارات مع الفلفل الأسود والملح والزيت النباتي عملت طنجرتين وحدة ضفتلها للحشوة معلقتين مية بندورة ومع المي إلي طبخت فيها الملفوف والثانية ضفت كركم للحشوة وثوم مبروش مع عصير ليمون ونعنع ناشف طلعوا ما شاء الله كتير زاكيين وبالنسبة للثوم حسب الذوق وشو بتفضلوا ممكن تكتفوا بالثوم الشرحات بدون ما ينضاف مع الحشوة
بعد ما نلفهم بنحط مي مش كتير يعني بدون ما يغمر الملفوف وعالنار تقريبا ساعة وشوي إذا بتحبوه ذايب بيكون استوى وما ننسى صحن طبق فوقيه لحتى نضغط شوي الملفوفات لبين ما يقرب يستوي بنشيله وبيضل مغطى على نار خفيفة بعد ما يغلي وبنقدمه مع عصير وشرحات ليمون ولبن والمقبلات إلي بتحبوها
وصحة وهنااااا
