البصاره الفلسطينيه على طريقة امي الغاليه الله يرحمها ملكة المطبخ

المقادير

• عدس مجروش حسب افراد العائله
• كوب ملوخيه ناشفه او نص كوب حسب الرغبه
• راس بصل
• سنين ثوم
• زيت زيتون
• ملح
• فلفل اسود
• كمون

الخطوات

بسم الله الرحمان الرحيم يسعد اوقاتكم جميعا طبختنا اليوم طبخه شعبيه قديمه من تراث الاباء والاجداد وطبخه شتويه طيبه ومغذيه وهي من طبخات الزمن الجميل ان شاء الله تنال اعجابكم

بدايه هذه الطبخه يستعمل فيها العدس المجروش وبعض اخوتنا في مصر وبعض الدول العربيه بعملوها بالفول المجروش تعالو نشوف الطريقه قديش سهله وبسيطه

بنفرم البصل ناعم في اناء على النار وبنضع زيت الزيتون على نار متوسطه حتى ما يتاكسد الزيت وبنكون غسلنا العدس وصفيناه وبنضيفه للبصل والزيت وبنقلبه وبنضيفله البهارات والماء الساخن بكميه قليله حتى ينضج بسرعه مع المتابعه المستمره ومتابعه كمية الماء حتى ما ينشعط كانك بتعملي طبخة العدس العاديه ولما تشعري انه العدس نضج بتضيفي كمية الملوخيه الناشفه وبتحركيها كويس وبتتركيها تغلي مع العدس لمدة خمس دقائق على نار هاديه وبعديت بتقليها بالثوم اذا كنتي من عشاق الثوم وبتتقدم بارده وساخنه حسب الذوق مع البصل الاخضر والفجل والمخللات والليمون

ملاحظه …اذا ما عندك ملوخيه ناشفه حطي ملوخيه خضرا بيمشي الحال لكن الملوخيه الناشفه هي الاصل واذا بتحبي الملوخيه تكون ظاهره على العدس بتزيدي الكميه

ان شاء الله تنال اعحابكم اكله سهله وبسيطه واقتصاديه ومغذيه

الف صحه وهنا على قلبكم جميعا

استودعتكم لله الذي لا تضيع ودائعه