مجدرة الأرز بطريقتي طعم راائع ملكة التوفير
مجدرة الأرز بطريقتي طعم راائع ملكة التوفير
المقادير
- أرز قصير الحبه
- عدس حب
- 2 حبة بصل وسط مفرومين
- 5 سنون ثوم مفرومين
- ملعقتين سمنه
- زيت ذره وممكن زيت زيتون
- ملح
- فلفل أسود
- بكيت ماجي
- كاري
- كمون
- كركم
- للتزين :
- شرائح من البصل المقلي
الخطوات
السلام عليكم ويسعد أوقاتكم بكل خير يا رب
بما انه المسابقه للتوفير فاكيد المجدره راح تكون موجوده بالمسابقه أكله طيبه وزاكيه وموفره وحبيت اقدملكم طريقتي فيها لانه الها اكثر من طريقه..مرات بعملها بالبصل لحاله او بالثوم لحاله بس هالمره حبيت اعملها بالنكهتين الثوم والبصل وبالفعل طلعت كثيير طيبه ان شاء الله بتعجبكم
يلااا نشوف الطريقه ….
& المقادير حسب الرغبه او عدد العيله للارز والعدس انا استخدمت كيلو الا ربع ارز والعدس اقل من نص كيلو ..والبهارات كميتها حسب الرغبه
اعذروني ما صورت الخطوات كامله للوصفه
& بغسل العدس وبغمره بالماء وبضعه عالنار وسط لحتى يغلي بضيفله ملح وفلفل اسود وكمون وكاري وبتركه لحتى يستوي
& بنفس الطنجره يلي راح نطبخ فيها المجدره بضيف زيت ذره وبقلي البصل الشرائح للتزين عشان استغل طعم البصل بالزيت وبعد ما يتحمر البصل بشيله عالفاين مطبخ لوقت التزين
بعدين بضيف ملعقتين سمنه عالزيت يلي قليت فيه بصل وبضيف عليهم البصل وبقليه وثم بضيف الثوم وبقلبهم لحتى ياخذو لون وبضيف بكيت الماجي لحتى يذوب بضيف الارز المغسول والمنقوع مسبقا وبضيفله القليل من الملح والفلفل والكاري والكركم وبقلبهم سوا ثم بضيف العدس مع الماء يلي معه وبقلبهم واذا ماء العدس ما غمرت الارز بزيد ماء عاديه لحتى ينغمر الارز وبتركه عالنار عاليه لحتى ينزل مستوى الماء بوطي الغاز لحتى يستوي تماما ..بشيل من العدس شوي عالجنب للتزين وهالحركه اختياريه ممكن الاستغناء عنها
& العدس يلي للتزين بقليه بزيت زيتون وبضيف عليه رشة ملح وكاري وكركم وبقليهم سوا
& وطبعا ممكن طبخ المجدره بزيت الزيتون اختياري حسب الرغبه
وهيك طبختنا صارت جاهزه ان شاء الله بتجربوها وبتعجبكم ..وااكيد الكل بعرف الطريقه وما عليكم زود بس حبيت اقدملكم طريقتي لعل احد الاخوات يستفيد من الطريقه او اضيف اي جديد عالوصفه …بعد ما تجهز المجدره بقدمها وبزينها بالعدس والبصل المقلي وبقدمها مع السلطه واللبن
وصحه وعافيه مقدما
دمتم بكل الخير
