محمرة احترافية ولا أروع ملكة تحضيرات رمضان
محمرة احترافية ولا أروع ملكة تحضيرات رمضان
ما أعتقد بلاقي حدا مابحب المحمرة وخصوصاً مع القشقوان لما يمط ويمطمط قلوبنا معو ههههه لهيك حبيت قدملكم خلطة المحمرة اللي مارح تفرقوها عن المحمرة السورية الجاهزة إذا مو أطيب كمان
تعالو معي نشوف المقادير :
المقادير
- خمس حبات متوسطة من البندورة
- 7 حبات فليفلة (يفضل نصف أخضر ونصف أحمر)
- بصلة متوسطة الحجم
- ملعقة كبيرة دبس بندورة
- ملعقة كبيرة دبس فليفلة
- ملعقة كبيرة فليفلة حمرا يابسة مجروشة
- ملعقة كبيرة طحينة
- ملعقة كبيرة ونصف بكصمات
- أربع ملاعق زيت زيتون
- رشة فلفل أسود وملح حسب الرغبة
- ممكن إضافة ملعقتين من السمسم غير المحمص بيعطي طعمة ولا أروع بالاضافة للفائدة المميزة طبعاً
الخطوات
“بسم الله الرحمن الرحيم”
* أول شي منقطع الخضار قطع كبيرة بعد غسلها ومنحطا بطنجرة ومنغطيها ومنشغل أول شي على نار متوسطة وبعدين منوطي النار ومنترك الخضار لحتى ترتخي وتنزل ميتها ، يعني تقريباً بدها شي ربع أو ثلث ساعة
منطفي عليها ومنصفي ميتها بعدين منضيف دبس البندورة عالخضار ومنضربهم بالخلاط
* تاني شي منضيف باقي المكونات كلها ومنخلطهم مع الخضار وبتصير جاهزة
فيكم تفردوها على عجينة فطاير متل المحمرة الجاهزة أو تعملو فيها سندويشات عالفطور أو عسحور رمضان مع قشقوان ومتأكدة رح تدمنوها
والحلو انو فينا نحتفظ بالخلطة بالفريزر لفترات طويلة وبتلاقوها جاهزة ايمت ماحبيتو وطعمتها متل ماهية تماماً
* لاتنسوني من دعواتكن الحلوة ومن كم سندويشة هههههه
