كبة نية بدون لحمة وبطعم ولا أروع ملكة تحضيرات رمضان
كبة نية بدون لحمة وبطعم ولا أروع ملكة تحضيرات رمضان
كبة نية بدون لحمة وبطعم ولا أروع ملكة تحضيرات رمضان
المقادير
- كوبين برغل أسمر ناعم مخلوط مع كوب برغل عادي ناعم (ممكن استخدام واحد منهم بس للعيار كامل)
- حبتين بندورة وسط
- بصلة متوسطة
- حبتين فليفلة وسط
- ملعقتين كبار ونصف دبس بندورة
- نصف ملعقة كبيرة دبس فليفلة
- ثلث كوب دبس رمان
- نصف ملعقة فليفلة حمرا يابسة مجروشة
- رشة فلفل أسود ورشة كمون وملح حسب الرغبة
- ثلث كوب بقدونس مفروم ناعم
- ثلاث أرباع كوب زيت زيتون
- جوز مقطع صغير (اختياري)
الخطوات
السلااام عليكم ورحمة الله وبركاته ان شاء الله تكونو بأحسن حال
وصفة اليوم وصفة رائعة وسهلة ولذيذة كتير برمضان كطبق مقبلات مغذي ورح يعجب الكل ان شاء الله تعالى و معي نشوف المقادير :
“بسم الله الرحمن الرحيم”
* أول شي منغسل البرغل بمي ساخن ومنصفيه منها ومنغطيه ومنتركو شي نص ساعة لينتقع بالمي اللي ضلت عليه من الغسل بعد ماصفيناه
* منطحن الخضار ناعم ومنضيفا عالبرغل ومنخلطهم مع بعض منيح ومنتركهم ينتقعو كمان شي ساعة
* منضيف دبس البندورة والفليفلة والرمان مع البهارات ومنخلطهم منيح مع خليط البرغل ومننادي أبو العيال يبلش بمهمة دعك الكبة لحتى يصير قوامها متماسك منيح وكل شي مدموج مع بعضو
* منضيف البقدونس والزيت بآخر مرحلة بالدعك
* وبالنهاية اذا حبينا منضيف جوز مجروش ومنخلطو مع الكبة وصارت عنا جاهزة
* منشكلها متل مامنحب ومنقدمها مع الخضار
* الحلو طبعاً انو بعد مانخلص دعكها بإمكاننا نحتفظ فيها بأكياس بالفريزة وبتضل رائعة متل ماهية ومنلاقيا جاهزة برمضان كطبق جانبي ولا ألذ
لاتنسوني من دعواتكن ومن عزايم الفطور هههه
أستودعكم الله ياوردات زاكي
