تفريز الفول ملكة تحضيرات رمضان
تفريز الفول ملكة تحضيرات رمضان
المقادير
- فول الكمية الي حابة تفرزيها
- معلقة ملح صغيرة
- معلقة سكر كبيرة
- ماء
الخطوات
السلام عليكم صبايا زاكي الحلوين
بسم الله نبدأ
اليوم انا حابة اشارك معاكم باول وصفة الي ع زاكي هية مو وصفة بس من تحضيراتنا لرمضان ولغيرو وبصراحة هاض موسم تفريز الفول
اول شئ نزلت ع الارض ولقطت الفول لاني زارعته جنب البيت عندي ☺️
منبلش بتنظيف الفول ومنشيل الوسخ عنه بالسكين الاطراف يعني ومنجهزة للتفريز حسب الحجم الي بدك اياه طبعا وحسب ما بتحبي تستخدمية ☺️
هلا منجيب طنجرة ومنحط فيها مي ومنحط عليها معلقة ملح صغيرة ومعلقة سكر كبيرة هون السكر مشان يضل لون الفول اخضر وحلو وبس يغلو ببلش انزل الفول عليها وبخليه يغلي غلوتين مع المي مو اكثر من هيك لانه ما بدنا نطبخة نحنا وبعدين بطلعه من المي السخنه ع المي الباردة فورا حتى يوقف طبخ الفول وبصفيه منيح وبحطة ع جنب يبرد
وبس برد بنبلش نحطة باكياس التفريز حسب استخدامك كل طبخة ومنسكر الكيس اما بلزق او مثل ما انا بعمل بحط قطعة قصدير ع باب الكيس بعد ما افضيه من الهواء طبعا وبمشي عليها المكوى وهوه حامي او ستريت الشعر الي بريحك
وهيك بسكر معنا وع لفريزر
وهيك خلصت الوصفة بتمنى اكون خفيفة الضل وما حكيت اكثير
بس حبيت اشرح بالتفصيل مشان تستفيدو ان شاء الله تعجبكو الوصفة
وهلا بترككو برعاية الرحمن
السلام عليكم
