طريقة البرغل ببندوره مع صينية الدجاج ملكة تحضيرات رمضان

المقادير

• لصينية الدجاج بنحتاح :
• دجاج مقطع
• للتتبيله بنحتاج :
• م.ك.ملح
• م.ص فلفل اسود
• م.ص.كاري
• م.ص.بابريكا
• م.ص.اريجانو
• عصير نص ليمونه
• ربع كوب خل
• 2 م.ك.زيت زيتون او ذره
• 2 م.ك. كاتشب
• نص كوب ماء للصينيه
• زيت ذره ورشة ملح وفلفل اسود
• خضار مقطعه :
• بطاطا مقطعه لدوائر
• بصل وبندوره مقطعه لقطع كبيره
• حبة بصل مقطعه لدوائر
• لطريقة البرغل بنحتاج :
• 2 كوب برغل خشن
• حبة بصل كبيره مفرومه
• عصير بندوره او 3 حبه بندوره مفرومه
• 2 م.ك.معجون بندوره
• ملح
• فلفل اسود
• كاري
• بابريكا
• مكعب ماجي
• ماء ساخن
• زيت ذره

الخطوات

السلام عليكم ويسعد أوقاتكم بالخير

اليوم بقدملكم وصفة برغل ببندوره وصينية الدجاج،، البرغل بهذه الطريقه جدااا زاكي وطعمه بشهههي وتغير عن الارز وطريقه سهله وبسيطه ان شاء الله بعجبكم وبتجربوه عالمائدة أفطار رمضان نوع من التغير

يلاااا نشوووف الطريقه ……

& بنبلش بتجهيز صينية الدجاج لانها بتاخذ وقت بالفرن وااكيد كلكم بتعرفو طريقتها بس راح اقدملكم طريقتي المبسطه ونزلتها قبل هالمره وموجوده بملفي بس عشان الوصفه تكون متكامله راح ارجع انزلها لكم

& بنتبل الدجاج بنضع عليه مكونات التتبيله يلي ذكرتها فوق بالمقادير وبحركهم مزبوط وبتركه عالجنب لحتى اجهز الخضار ..بقطع راس بصل لدوائر وبضعه بالصينيه وثم بقطع البطاطا دوائر غليظه شوي وبغسلها وبتبلها بالملح والفلفل وبضعها فوق البصل ومن ثم بضع قطع الدجاج وثم وشرائح البندوره وقطع البصل الكبيره واخر شي برشلها ملح وفلفل اسود عالوجه الصينيه وشوية خل وزيت ذره او زيت زيتون ونص كوب ماء وبقصدرها وبدخلها الفرن الحامي عالاعلى درجة حراره الرف الاول وبعد نص ساعه بوطي النار للوسط وبتركها ساعه تقريبا وبعد هيك بفتح عليها وبشوف استوائها وبعد ما تستوي تماما وتتنشف ميتها بدهن وجه الدجاج بكاتشب وزيت ذره بخلطهم سوا وبدهن الدجاج فيهم وبحمر الصينيه وهيك بتكون جاهزه معنا ..( ممكن وضع الثوم والفلفل الاخضر مع الخضار حسب الرغبه)

& طريقة البرغل : بنفرم بصله كبيره وبقليها بزيت ذره وبعد ما تتقلى بضع عليها الملح والفلفل الاسود وبابريكا والكاري ومكعب ماجي ومعجون البندوره وبقلبهم سوا ثم بضيف عصير البندوره او بندوره مفرومه حسب الرغبه وبقلبهم سوا وبضيفلهم البرغل المغسول فقط وبقلبهم سوا لمدة دقيقه لحتى البرغل يتشرب المكونات مزبوط ثم بضيف الماء الساخن لحتى يغمر البرغل مثل الارز تماما وبزبط الملح وبغطيه لحتى تتنشف المي وبعدين بوطي النار لاخر شي وبتركه لحتى يستوي وهيك بكون جاهز معنا ، ( ممكن اضافة الفلفل الاخضر المفروم والحمص المسلوق مع البرغل )

& فكره لتقديم البرغل كثير حلوه عالسفره وتغير عن المعتاد وبالأخص للعزايم نوع من التنويع وشكل جديد ومميز بضع البرغل بقالب كيك وكل ما يتم وضع طبقه بضغط عليها بالملعقه مزبوط عشان تاخذ شكل القالب وهيك لحتى اخلص كل الكميه واخر شي بضغط عليه مزبوط بالملعقه وبقلبه بطبق التقديم وبتركه مقلوب ما بشيل عنه القالب تقريبا من خمس دقائق لعشرة دقائق حسب وقتك ثم بشيل القالب وبطلع معي البرغل عالشكل قالب الكيك وزينته بشرائح الليمون والبقدونس والتزين حسب الرغبه واكيد ممكن تقديمه بطبق عادي كالمعتاد بس انا حبيت اعطيكم طريقة هالتقديم الحلوه ان شاء الله تكون عجبتكم،،، والطعم راااائع جدااا

وصحه وعافيه مقدما

دمتم بكل الخير

( اللهم أدمها من نعمه واحفضها من زوال )