طريقة الدجاج التركي لذيذ وسهل ملكة رمضان
طريقة الدجاج التركي لذيذ وسهل ملكة رمضان
المقادير
- دجاج مقطع لقطع كبيره
- للتتبيله بنحتاج – الكميات المستخدمه ل3 دجاجات:
- 4 م.ك. لبن زبادي
- 3 م.ك. معجون بندوره
- 2 حبة بصل حجم وسط
- نص راس ثوم
- 2 حبة بندوره
- نص كوب زيت زيتون
- ربع كوب خل
- عصير حبة ليمون
- حبة فلفل احمر حلو او فلفل اخضر
- م.ك.بابريكا حلوه
- م.ص كركم
- ملح + فلفل أسود حسب الرغبه
- م.ك. بهارات دجاج
- م.ص.كمون
- 2 م.ك. دبس رمان
- لصينية الفرن :
- ورق غار
- ربع كوب زيت
- نصف كوب ماء
- كميه من الخبز
- للخبز :
- شرائح بصل
- بقدونس مفروم
- سماق
- ملح
- للتزين :
- شرائح ليمون
- بقدونس
- خس
الخطوات
السلام عليكم ويسعد اوقاتكم بالخير اليوم بقدملكم طريقة الدجاج التركي ولا اروووع واطيب من هيك اكله طيبه ومريحه وحلوه بتشكيلة افطار رمضان
ان شاء الله بتعجبكم وبتجربوها
يلااااا نشووف الطريقه ….
& بخلط جميع مكونات تتبيلة الدجاج عالخلاط وبتبل فيها الدجاج بكون مشرحه الدجاج بالسكين عشان التتبيله وبضعها بالثلاجه لثاني يوم او لعدة ساعات حسب الوقت ( التتبيله بشيل منها شوي عالجتب عشان نعمل فيها الخبز ) …انا تبلتها قبل بيوم اريح واسرع وبستوي الدجاج عالسريع من التتبيله وبالأخص بالعزايم بس بطلعيه من الثلاجه وبدخليها عالفرن وبتبلشي بالاصناف الثانيه عالراحتك …
& قبل تدخيلها الفرن بحط ورق غار بالصينيه ونص كوب ماء وربع كوب زيت وبضع الدجاج بالصينيه وبضع عليها ورق زبده وثم القصدير وبدخلها عالفرن محمى عالحراره عاليه لمدة نصف ساعه ثم بوطي النار للوسط وبتركها لساعه وبعد هيك بتفقدها اذا استوى الدجاج او لا اذا كان لسى مش مستوي وكانت المي متنشفه بزيده مي وبرجعه يكمل سوا اما اذا كان مستوي بطفي تحته لحين وقت التقديم بحمره وهيك الدجاج صار جاهز بننتقل للخبز
& استخدمت الخبز العادي بدهنه بالتتبيله يلي جهزناها من قبل وبفرم بصل شرائح وبقدونس وبفركهم بملح وسماق وبرشهم عالخبز وبدخلهم عالفرن بشغل الشوايه فقط بخليهم ياخذو لون وبعدين بطلعهم وبكون محمره الدجاج يفضل تحمير الخبز والدجاج قبل التقديم بفتره بسيطه عشان يضل ساخن وما ينشف الخبز ،، وبضع الخبز بجاط التقديم وبضع عليه الدجاج وبزينه بالخس والبقدونس والليمون وهيك بكون جاهز معنا يقدم مع السلطات واللبن ..وكنت عامله معه كباب بلبن لانه كان عندي عزيمه
وطلع كثيييير طيب بنصحكم تجربوه وصحه وألف عاافيه
دمتم بكل الخير
(اللهم أدمها من نعمه واحفظها من زوال)
