شيشبرك على طريقة امي
شيشبرك على طريقة امي
المقادير
- مقادير العجينة ثلاث كاسات طحين
- ملعقة صغيرة ملح
- ملعقة كبيرة سمنة
- مقادير الحشوة نصف كيلو لحم مفروم ناعم
- حبتين بصل
- ملعقة ملح
- ملعقة صغيرة فلفل اسود مطحون
- ملعقة صغيرة بهارات مشكلة
- مقادير اللبن اثنين كيلو لبن
- ملعقتين نشا
- ملعقة ملح
- ملعقة ثوم مهروس
- ملعقة سمنة
الخطوات
السلام عليكم ورحمة الله وبركاته يسعد اوقاتكم بكل خير احبتي اخواتي العزيزات والغاليات على قلبي ان شالله تكون بأحسن حال اليوم رح نعمل شيشبرك على طريقتها الله يرحمها ويغفرلها
أول مرحلة بنحضر الحشوة أفضل لحتا تبرد وقت العمل بيها بنحط بطنجرة ملعقة كبيرة سمنة وبنضيف البصل المفروم ناعم وبنقلبو لحتا يذبل البصل بنضيف اللحمة وبنحرك لحتا تنشف مية اللحمة بنضيف عليها الملح والفلفل الاسود والبهارات المشكلة وبنتركها على جنب لحتا تبرد وبنحضر العجينة بنضيف بجاط الطحين وبنضيف عليه الملح وملعقة كبيرة سمنة وبنفركهن مع بعض السمنة بتعطي نكهة طيبة وبتسهل فرد العجينة أكثر من مرة وبنضيف الماء بتدريج لحتا تتشكل عجينة ملساء وطرية ومابتلزق بالأيدي بنغطيها وبنتركها ترتاح نصف ساعة
وبعدين بنبلش نشكل بيها على سطح العمل بنرش طحين و بنفرد العجينة بنحاول ما نترك العجينة سمكية و بنقطعها اي شي متوفر عنا مثل فنجان أو قطعات البسكويت اي حجم بترغبولو وبنحشيها وبنسكرها بالطريقة المعتادة وبحطن بصواني مدهونة سمنة وبدخلهن الفرن بس تنشف العجينة بدون ماتاخذ لون طبعا حسب رغبتكم إذا مابتحبو مشوية ممكن تضيف حبات الشيشبرك عاللبن بدون تحطون بالفرن
وبنحضر اللبن أنا عندي كيلو ونصف لبن غنم ضفت عليه نصف كيلو لبن بقري لانو لبن الغنم بكون ثقيل حبيت اخففو بالبن البقري وبضيف ملعقتين نشا وملعقة صغيرة ملح وضفت مكعبات جميدكو بيعطو طعمة طيبة للبن طبعا حسب رغبتكم وبنخلط اللبن بالمضرب اليدوي عالبارد وبعدين بنحطو عالنار وبنحرك بشكل مستمر لحتا مايفرط معانا اللبن وأول مانشوف اللبن بلش يغلي بنضيف قطع الشيشبرك عاللبن وبنحرك بنضيف ملعقة سمنة وبنحطها عالنار وبنضيف عليها الثوم المهروس وبنقلبهن وبضيفهن عالشيشبرك وبعدين بنضيف النعناع أوكزبرة خضرة حسب الرغبة وبنتركهن يغلو مع بعض مدة استواء الشيشبرك من ٢٠دقيقة للنصف ساعة بنطفي الغاز
وبنقدمهن وبنزين باللوز المقلي بالسمنة وهيك طبختنا صارت جاهزة أن شالله مأكول الهنا
