البتيفور على الأصول ناجح مئة بالمئة ملكة زاكي

المقادير

• كيلو طحين
• ٧٥٠ غرام زبدة
• ٢٥٠ غرام سكر بودر
• ٣ بيضات فانيلا
• للتزيين:
• شكولاتة ٢٠٠ غرام
• مربى مشمش او فراولة حسب الحاجة
• شكولاتة بيضا ١٠٠ غرام
• جوز الهند

الخطوات

السلام عليكم حبوبات كيفكم شو اخباركم والله زمااان عنكم وين الصبايا غايبات والله اشتقتلكم واليوم اجيت اشارك معكم وصفاتي واشترك بالمسابقة عشان اشغل حالي شوي عن التفكير والوسوسة الي انا فيها ادعولي ربي يشافيني ويشافي كل مريض اللهم امين

نيجي لطريقة البتيفور اول شي بخفق بالمضرب الكهربائي الزبدة الي بتكون بحرارة المطبخ بس مش ذايبة بخفق لحتى تصير لون الزبدة ابيض بضيف السكر الباودر وبخفق حتى يعطيني خليط كريمي ونافش بعدين بضيف البيض حبة حبة وبخفق واخر شي بضيف الفانيلا وبعد كل هالمرحلة بكون ناخلة الطحين وبنزلو على خليط الزبدة على ثلاث دفعات وبقلب حتى يختفي الطحين وبكمل لحتى اخلط كل هالكمية من الطحين وبعدين بحطو بكيس الحلاواني وبشكل بصينية فرن حفتها واطية وبعد ما اشكل كل الكمية بدخلهم فرن محمى مسبقآ على درجة حرارة وسط واحمى من الوسط بشوي وبعد ما يوخذ لون من تحت اشوف طرافها صار ذهبي بحمر الوجة وبعدين بطلعو وبتركو يبرد تمامآ عشان ما يفتفت لانو بس يطلع من الفرن بكون كتيير طري لو تمسكيها بتتفتفت وبعد ما يبرد بذوب الشكولاتة على الميكرويف او حمام مائي مع معلقة زيت ذرة انا حطيتو بالميكرويف ٣٠ ثانية وطلعتو وحركتهم ورجعتو كمان ٣٠ ثانية وهيك كان ذايب مية بالمية باخد المربى وبحط شوي على الحبة وبحط الحبة الثانية فوقها وبغطس طرفها بالشكولاتة وبرشلها جوز الهند وبحطها على صينية وكمية ثانية زينتها بخطوط شكولاتة بيضا وكمان ذوبتها بنفس الطريقة وبحطهم بالثلاجة تتماسك الشكولاتة وبعدين بحطهم بوعاء محكم الاغلاق وبحتفظ في بالثلاجة مع حرارة الجو وبالشتا عادي بتتركي برا ما بأثر وصحتين وعوافي على قلبكم

ملاحظة:

اذا بدك تعملي بالماكينة بتزيدي الطحين مقدار ثلاث معالق تقريبآ حتى تقدري تشكلي بالماكينة بس بصراحة بتيفور الكيس اطيب بالنسبة الي لانو كتييير خفيف وهش وبذوب ذوبان بالتم