سينابون بعجينة العشر دقائق ولا اروع ملكة زاكي 2
سينابون بعجينة العشر دقائق ولا اروع ملكة زاكي 2
سينابون بعجينة العشر دقائق ولا اروع ملكة زاكي 2
المقادير
- بالنسبه للعجين: ٥ كوب طحين
- ملعقتين سكر
- كاستين ماء دافئ
- ملعقتين كبار ممسوحات خميره
- نصف فنجان زيت نباتي
- ٣ ملاعق كبار حليب بودره
- ملعقه صغيره باكينغ باودر(لختياري)
- ربع ملعقه صغيره ملح
- لحشو السينابون: ملعقه كبيره قرفه
- ملعقه كبيره كاكاو
- ملعقه كبيره لملعقتين سكر خشن
- اصبع زبده ١٠٠ غرام
الخطوات
السلام عليكم كيفكم جميعًا طمنوني عنكم ان شاء الله اموركم تمام اشتقتلكم كتير ربي يسعدكم وتضلوا بخير على طول
وهلا بدنا نبلش بالوصفه ونقول بسم الله
اول اشي بالنسبه للعجين انا عملت عجينة العشر دقائق اسهل طريقة عجينه وبنفس الوقت كتير زاكيه
اول اشي في وعاء بنحط كاستين طحين وملعقتين السكر وملعقين الخميره وكوبين الماء الدافئ وبنخلط المكونات منيح لحتى نحصل على خليط بشبه خليط الكيك تقريباوبنترك الخليط في منطقة دافيه عشر دقائق وبعدها بنضيف ٣ اكواب الطحين وملعقة الباكينغ باودر والحليب والزيت النباتي ونعجن لحتى نحصل على عجينه وبعدها بتركها ترتاح ٥ دقائق وبنلش اشتغل فيها…
ع جنب بنحط بصحن سكر وقرفه وكاكاو وبنخلطهم…
بنفرد العجينه بحيث يكون شكلها مستطيل او مربع عشان يطلع شكلهم مرتب وما يطلع زوائد وبنفرد عليها الزبده بحرارة الغرفه بشكل متساوي وبعدها بنحط خليط القرفه اللي عملناه كمان بنوزعه بشكل متساوي فوق الزبده وبنبلش نلف العجينه ع شكل رول زي ما بنلف السجاده هههههه وبعدها ببلش اقطعها بشكل متساوي…
بالنسبة للتقطيع انا ما بحب اقطعها بالسكين بطلع فيها زوائد واذا العجينه طريه بتخبص بعيد عنكم لهيك بجيب خيط عادي وبدخل الخيط من تحت الرول وبمسك الخيط من الجهتين وبلفهم عكس بعض وبقسم وهيك لتخلص الرول كامله …
وبعدها بدهن الصينيه او البايركس بالزبده وبصف السينابون جنب بعض وبحطها بالفرن ع درجة ١٨٠ بالرف الوسط تقريبا نص ساعه وبس تستوي وتاخد لون من تحت بشويها من فوق
واخر اشي بزينها بالحليب المكثف والشوكولاته وصحتين والف هنا
بنصحكم تجربوها وان شاء الله تكون عجبتكم
حاولت اصور كل الخطوات بس انعجقت وما لحقت لاني كنت اعملها ببيت اخوي بس حاولت اوضحلكم كل اشي
بالمناسبه فتحت قناة عاليوتيوب حطيت صورتها تحت لسا اول فيديو لالي عليها لقدام ان شاء الله رح انزل فيديوهات اكتر وبجوده اعلى ان شاء الله بستنى دعمكم حبيبات قلبي
ومع السلامه
