الغريبة خطوة بخطوة مع الصور وسر نجاحها

الغريبة خطوة بخطوة مع الصور وسر نجاحها, من إبداع خبيرة الحلويات الفنانة والمبدعة في عالم الطهي صفا خليف, وكما عبرت المبدعة قائلة: “اليوم جايبتكلم غريبة بالسمن العربي تاكلوا اصابعكم وراها والريحة بتجنن وتذكرت حلب فيها صحيح طريقتها معروفة والكل تقريبا بيعملها لكن في ناس ماتنجح معاهم لهسبب حابة اعلمكم الطريقة بالتفصيل مع الصور وان شاء الله من اليوم ورايح تنجح مع الكل”, فلنتابع مع المبدعة صفا خليف.

المقادير:

كاستين سمنة  بدرجة حرارة الغرفة
كاستين سكر بودرة
ظرف فانيليا
4 كاسات طحين منخول

الطريقة:

– اول شي بنحط السمنة وضروري تكون بدرجة حرارة الغرفة يعني مايصير نذوبها والكاسة نفسها نعيير فيها المقادير
انا هون حطيت كاستين سمنة بحيث كاسة ونص سمنة نباتية ونص كاسة سمن عربي بس لانو طعمت السمن العربي قوية يعني نص بكفيه وبيعطيه طعمة بتجنن.

– نخفق السمنة منيح ليصير قوامها كريمي ويفتح لونها وبيصير ابيض.

– بعدها نبدأ بوضع السكر البودرة مع الفانيليا وانخلهم وحط شوي شوي عالسمنة واخفق ليتجانس السكر مع السمنة طبعا مقدار السكر كاستين وفيكم تكثروا سكر يعني تتحمل 3كاسات بس انا بشوف كاستين حلاوتهم منيحة تطلع حسب ذوق كل واحد.

– وبعدها بحط الطحين المنخول ضروري يعني السكر والطحين ضروري يكونوا منخولين, حطيت اربع كاسات طحين وصرت احط شوي شوي وحرك اول شي يالملعقة وبعدها بايدي بس ما بدهم عجن كتير يعني بس يتجانسوا ويصير مثل مو مبين بالصورة بغطيه وبحطوا بالبراد ساعة.

– هلق الخطوة هي كتير ضرورية لما اطالعهم من البراد مابعجن العجينة ابدا باخد شوي شوي يعني حجم دائرة صغيرة واصير اشكل كل قطعة بقطعة وعالنظر فيكي تقدري حجمهم مشان يطلعوا تقريبا بحجم بعض وبشكلهم على زوق كل واحد وازينهم بالفستق او اللوز او بدون شي مو مشكلة بس انا بحب شكلهم بالفستق.

– بصف القطع بصينية محطوط عليها ورق زبدة وبصير بدون ورق زبدة لانو فيها كمية سمنة منيحة بس الاحسن انكم تحطوه على ورق زبدة وبترك فراغ بين كل قطعة مثل الصورة لانو رح ينتفخوا شوي ومشان مايلزقوا ببعض.

– وكل صينية بخلصها بغطيها وبحطها بالبراد لبين ما اخلص تشكيل الكمية كلها وبس اخلص تشكيل وبكونوا الصواني كلهم بالبراد طبعا هذا قبل الخبز بجي بطالع اول صينية شكلتها وبحطها بالفرن وهون هو السر الفرن ضروري جدا جدا تنتبهوا عليه لانو هو اساس سر نجاح الغريبة وهلق بصراحة انا وقت اخبزهم بضل واقفة جنب الفرن ومابتحرك ابدا واضل اراقبها لانو مابتطول ابدا.

– الان عيار الفرن انا بكون محمي الفرن قبل عشر دقايق وبحط الصينية على درجة حرارة 180 وطبعا كل واحد وحسب عيار فرنوا انا حطيت من تحت والفرن كان شغال من تحت وفوق لانو فرن هيك يعني مابيشتغل من تحت لحالوا اجباري يكون من تحت وفوق لهسبب بحط الصينية من تحت مشان مايتحمر من فوق ويضل ابيض لونها.

– مدة الخبز بالفرن عشر دقايق تقريبا ورح علمكم طريقة تعرفوا انو تكون صارت جاهزة, هلق اول ماتدخليها الفرن خلي عينك عليها وبس تشوفينها نفشت افتحي الفرن وشوفيها بتبين معك ان كان نشفت السمنة او لأ. الان انا تقريبا بعد ما نفشت دقيقتين وطالعتها وانتي رح تحسي انو ما استوت لانو تكون لساتها حارة بس تبرد شوي تتماسك ولا تشيلينها من الصينية لتبرد وتتماسك مشان ماتفرط معك.

– انا خبزتهم بصواني بايركس كتير بحب خبزهم اكتر من الصاج والصواني العادية وانا بعمل بالبايركس كل شي تقريبا وخصوصا المعجنات يطلعوا بجننوا.

– وفي بنات سألوا بصير زبدة بدال السمنة, اكيد مابصير لانو الزبدة فيها كمية مي ورح تقسى الغريبة بهالحال يعني ضروري بسمنة, واي نوع سمنة فيكي تستخدمي موشرط سمن بلدي بس السمن البلدي بيعطيها طعمة وريحة بتجنن بس ماتكتروا لانو طعمتها قوية.

– وانا بالعادة بعملها بسمن نباتي لاني مابحب السمن العربي بس هلق عملتهم لانو بدي اخذهم هدية لاصدقاء اتراك النا لهسبب عملتهم بالسمن العربي وكتير انبسطوا بالطعمة وخصوصا انو مايعرفوا الغريبة.
وصحة وألف هنا وشفا.

لمتابعة الوصفة على جروب “زاكي”:
الغريبة خطوة بخطوة مع الصور وسر نجاحها