كله منك يا وضحة
في قسم المنوعات في زاكي , نقدم لكم مقالات ترفيهية ثقافية اجتماعية تثري حياتنا, لنتابع.
يعني انا كل الي عملته اني حاولت أفهم ليش؟؟؟
بحضر مسلسل عربي والا تركي والا إفريقي كل هالممثلاث فاردات هالشعر…بتصحی من اليوم شعرها مثل المسطرة…بتطبخ و شعرها بهفهف هفهفة…حتی وضحة بالمسلسلات البدوية بترعی الغنم وشعرها ارتب من شعري وانا طالعة من عند حليمة (كوافيرة الحارة?)….
فقلت بعقلي شكله هاظ أسلوب الحياة الطبيعي…اكيد كل الحق علی أمي الي طول عمري وانا اشوفها فارقة شعرها من النص ومجدلته جدول بدون بكلة كمان?…فخلتني افكر انه هيك كل النسوان بعد الزواج?….بس خلص زمن أول راااح…وأنا لازم اجرب اقضي يوم بطوله..وأنا شعري مفرود…
رحت بالليل تحممت وحطيت بلسم ولفيته عشان ثاني يوم بس افرده يظل ناعم مش ينكش مثل أشعة الشمس?…
ومن الصبح فكيت الربطة ونثرت هالشعرااات…صحيح كلهن شعرتين ونص بس بهمش?…بنعطيهن فرصة?
بعد نص ساعة مريت من جنب المراية ونظرت نظرة خاطفة والا أربع زمبركات طالعات من راسي…عالسريع بليت ايدي بمية وزبطتهن…وكملت رحت أجلي الجليات صار الشعر من العرق يلزق برقبتي وانا ازيحهن بايدي وهي معبية رغوة…ويرجعن يلزقن و ازيحهن لحتی لبدتهن تلبيد?
بلشت اطبخ..ما خليت لا بصل ولا ثومة ولا لحمة إلا ما مسحته بشعراتي وانا ازيحهن عن رقبتي..والغرة المسكينة افرم بصل وابعدها عن عيني…ارش بهار وازيحها لحتی وقفت مثل قطعة الخشب??…و كملتها علي بنتي الصغيرة وختمتها بالتحلاية…مهو شعري ماشالله خلص الوجبة الرئيسية والمقبلات وظل عليه التحلاية…فطعمته بنتي مصاص…ما خلت اشي بنفسه…
ما خلصت طبيخ وشغل إلا شعري فتايل فتايل…وتقلص من شعرتين ونص لشعرتين……
.نص الشعرة هذيك راحت مع المصاصة??
بهاي اللحظة فات جوزي عالدار وانا مثل الغولة …شعري ناقصه بس شوية بقدونس للتزيين…لأنه كل مكونات الطبخة عليه…
وفوق كل هاظ طلعت للزلمة شعرة بصحنه وهو يوكل…
تطلع علي وهو يسحبها وقال:بتعرفيش تظبي شعرك وانتي بتطبخي?
هاظ جزاء الي بشك بتسريحة أمه?? يا حبيبتي يماااا
كله منك يا وضحة?