يوم المشاوي مع كل توابعه
معكم صديقة زاكي المميزة Marwa Elmaghraby
قلت انزلكم الاكلة دي للي يحب يجربها ف الاجازة ☺ يوم المشاوي العالمي
طبعا كلنا بنعمل الشيش طاوووق ولية كذا طريقة وبما اني كل مرة بعملة بصدور الدجاج انهاردة عملتة بالاوراك المخلية الطريقة الاصلية وطبعا كل بنوتة بتعملة بطريقتها المفضلة انتوا طبعا عارفين اني بحب اجرب الاكلة مرة واتنين وبكذا طريقة المهم رغي رغي ?
دا شيش طاووق مشوي ????
مع صوص الزعتر والتوم والصويا ???
وسلطة بابا غنوج المشوية علي طريقتي ?
ارز مبهر بالخضار وصوص الصويا ???
كب كيك التايجر بالموكاااا والقهوة بالكاكاو
شيش طاووق مشوي
اول حاجة هننقع الاسياخ الخشب في مية ساعة عشان متتحرقش
الخطوة الاولي
التتبيلة
ف بولة هنحط كوب زبادي ، معلقة ك مستردة ، معلقة ك صوص باربكيو ، م ك كاتشاب معلقة ك خل تفاح او خل ابيض ، ماء بصلة كبيرة ، معلقتين ك زيت زيتون ، معلقة ك صويا صوص ، معلقة ص صلصة طماطم
التوابل معلقة ص من كل نوع ملح فلفل كمون زعتر بابريكا كزبرة ناعمة زنجبيل بصل وتوم بودر
ملون طعام اورانج يادوب نقطة بسيطة لومفيش نحط كركم
ونقلب كويس كل المكونات ونكون مجهزين الشيش مكعبات وننزل بية ف الخليط ونسبها طول الليل لازم وضروري
الخطوة التانية
نقطع طماطم وفلفل الوان وبصل مكعبات ونجيب العيدان ونرص الوراك والخضار
خطوة التسوية مهمة جدااا
نجيب الجريل او التيفال ونحط زيت يادوب تدهن وتسخن كويس ننزل بالشيش مش هنحرك الابعد دقيقتين نبدا نقلب عشان ياخد صدمة النار ويستوي بسرعة نخلص الكمية ونرصة ف صنية ونغطية بفويل وعلي الفرن لمدة تلت ساعة
نجهز فحمتين سخنين وننزل بيهم مع حبة زيت ونغطي تاني وكلوا احلي شيش
——————————————–
سلطة بابا غنوج المشوية
نجيب باذنجان رومي كبيرة بصلة صفرا كبيرة ونحطهم ف الفرن يتشوي
نخرجهم وعلي الكبة نفتحهم ونحط حشوتهم مع فصين توم مفرومين ونقلبهم ف بولة وننزل بالطحينة والخل وملح وفلفل وسماق وزيت زيتون ومعلقة عصير لمون ونقلب كويس بس كدهون ويقدم
☺ صوص الزعتر والتوم
نجيب فصين توم كبار ونشوحة مع شوية زيت ننزل بمعلقتين ك صويا صوص ومعلقة ص عسل اسود ومعلقة ص مستردة ونقلب كويس غلوة بسيطة ونقفل علية وسمعني احلي سلام علي احلي طعم صيني
——————————————–
الارز المبهر
هنجيب الملفوف ( الكرنب ) العادي او السلطة ونقطعها وناخد منها مقدار كوب وف الحلة نحط حبة زيت وننزل بالملفوف ونقلب شوية ننزل بجزرة مبشورة ونقلب مع ملح وفلفل مكعبين ماجي معلقتين ك صويا صوص حبيتين هيل وقرنفل ونحط الارز انا عملت الكمية دي علي كوبين ارز بس يغلي ونوطي النار وبجد طعمة تحفة وعن تجربة
——————————————–
كب كيك القهوة والكاكاو والشوكلت شيبس
1- ننخل كوب وربع دقيق مع رشة ملح ومعلقة ونصف pp
2- نضع نصف كوب زبدة طرية وكوب الاربع سكر ناعم الحبيبات ومعلقة فانيلا سايلة ونخفقهم كويس
3- اضيف علي خليط السكر بيضة واضربها بعدين التانية واضربها علي سرعة متوسطة لمدة دقيقة بعد كدة انزل بالدقيق مع نص كوب لبن معلقتين ك قهوة ومعلقتين ك كاكاو خام ونخفق نجهز القوالب الخاصة بالكب كيك ونحط كمية من الشوكلت شيبس وبعدين نصب الخليط مع مراعاة عدم ملء الكوب
وبالهنا
—————————————-
كب كيك التايجر والموكااااااا
1- ننخل كوب وربع دقيق مع رشة ملح ومعلقة ونصف pp
2- نضع نصف كوب زبدة طرية وكوب الاربع سكر ناعم الحبيبات ومعلقة فانيلا سايلة ونخفقهم كويس
3- اضيف علي خليط السكر بيضة واضربها بعدين التانية واضربها علي سرعة متوسطة لمدة دقيقة بعد كدة انزل بالدقيق مع نص كوب لبن وكيس كابتشينو موكااااااا ونخفق علي سرعة متوسطة وناخد من الخليط كوب ونضيف علية معلقة ك كاكاو خام ومعلقتين ك حليب سائل ونقلب اجيب قالب الكب كيك واحط معلقة من الخليط الابيض ومعلقة من خليط الكاكاو مع مراعاة عدم ملء الكوب
وبالهنا