بإرادتي تحديت الكل وخسرت وزني تجربتي

تحرير admin التحديث الأخير 25/08/2016

بإرادتي تحديت الكل وخسرت وزني تجربتي
شلونكم ياشلة الأنس في زاكي

بعد ما كان جسمي حلو أيام الزواج … بدا يخترب والدهون تتراكم بعد الولادة خاصة .. قررت اتغير تغير جاد … وبعد ما بديت الرحلة أحب أشارككم أسراري في خسارة الوزن المستمرة .. كان وزني 98 وبعدين صار 93 وبعدين 89 وصار 87 والحين وصلت 85 يعني ( 13 ) كيلو في حوالي شهرين وانا مستمرة في النزول … والشي الحلو ان كل من شاف جسمي يقول انتي اكيد خسرت فوق ال 20 كيلوا .. والسر هو …… ( بنشوف بعدين )
ياما قرينا مواضيع .. الي يقول

اخسري 30كيلو في 30 يوم
والي يقول اخسري وزنج وانتي في مكانج …
والي يقول خلطة تذوب الشحوم …
والي يقول كريم لحرق الشحوم ..

انا ما انكر ان الي قلته قبل شوي نفع مع بعض الناس .. بس النتايج كانت سلبية من ناحية ثانية .. فمثلا الي خسرت فوق ال 20 كيلوا في الشهر تعرضت لنقص حاد في الفيتامينات وتساقط في شعرها وترهل غير مقبول في جلدها … ( النتايج من تجارب كثيرة قريتها ) .. والي يقول كريم يحرق الدهون .. صحيح ان جاب فايدة وايد بنات تعرضوا بعد فترة لتغير في لون جلدهم وبعضهم صادهم تشقق الجلد … ( والي سمعته ان الكريمات تمتص السوائل من الخلايا فيقل حجمها .. فتضعفين انشات بسيطة بس بعدها يسير عندج خلل في اجهزتج … والله أعلم ) اما من ناحية الخلطات الطبيعية انا ما اقول انها مضرة .. بس بعض البنات ياكلون الي يبونه ويشربون الخلطه وحسبالهم بيضعفون .. لا لا لا .. الموضوع غير هالشي

ياما قريتوا ان الموضوع موضوع إرادة .. وانا برد اكررها
إرادة إرادة إرادة

شنو يعني إرادة ؟؟
معناها انا تعبت .. زهقت .. طفشت .. مليت .. من شكلي ولازم اغيره

يعني اذا انتي مب جدية في خسارة الوزن عمرج ما بتخسرين ..
الموضوع مو موضوع اسبوع أو شهر
الموضوع نظام حياة .. اذا غيرتيه تغيرت حياتج .. اساليني …

وبعدين احنا ليش ميتين على الاكل وخصوصا الحلويات كأنهم بيروحون كوكب ثاني اذا ما كلناهم .. والله موجودين ومكدسين في الجمعيات والدكاكين …
بس انتي عندج خيارمن بين اثنين ..
يا تستمعين بحلاوة الأكل أو حلاوة جسمج والرشاقة
ويسير تستمتعين بالاثنين بس باعتدال …

في البداية .. بكتب لكم عدة نقاط مهمة ساعدتني وايد في تجربتي ..

1. لا تقولين لحد انج تسوين رجيم .. لأن الضغوطات النفسية هي أكبر مدمر للرجيم .. لا تخلين حد يحس .. وانتي بعد لا تحسسين نفسج .. وتحطين نفسج تحت الضغط .. لان مجرد ما تنسين .. الأيام بتمشي بسرعة وانتي ما بتلاحظين

2.لا تحرمين نفسج .. وهذي نقطة مهمة جدا … يعني تمنعين نفسج من الخبز والعيش والسكر والحلويات .. انا كنت اكلهم بس بمقدار معين بقولكم اياه ..

3.خلي الشاي الأخضر صديقج الدايم … ياما سمعت عنه وما صدقت .. انا ما بقول ان هو الي ضعفني .. لا .. هو كان يساعدني بطريقة ثانية .. كنت اول ما اقوم اشرب ماي .. وبعدها بنص ساعه اشرب شاي أخضر بنكهة النعناع ( لأن طعمه مقبول وبسرعه بتتعودين عليه ) أحسه يسد نفسي وما يخليني اشتهي اكل .. فاكل اي شي يسد الجوع بس .. وهذا الشي يساعد انج تاكلين اشياء سعراتها قليلة .. شي ثاني .. سار ما يجيني امساك او اسهال او غازات كلش .. ارتاحت معدتي عليه

4.الرياضة ثم الرياضة ثم الرياضة .. خذيها من عندي بدون رياضة تقدرين تضعفين بس ما تحصلين في النهاية على جسم مشدود .. يعني احنا بنتعب وفي النهاية نتيجة ما ترضينا ؟؟ اذا نخليها مره وحده .. مشي الدلع ما ينفع لازم اقل شي يكون بسرعة 5 كيلو في الساعة .. لازم العرق يصب منج صب .. صج بتتعبين اول الايام .. بس والله بعدين كانج تتمشين على الكورنيش .. ولا تحسين بالتعب .. والرياضه مو بس وقت الرجيم .. خليها نظام حياتج .. يعنة على الاقل بعدين في الاسبوع مرتين مشي ( ونصيحة من عندي ما في احسن من المشي هو الي يعطي نتيجة فعالة وقوية )

5.كانت زنودي مشكله كبيره .. وقدرت اشيل ثلثها بطريقة حمل الاثقال .. روحي محل الرياضة واشتري ثقل كيلو .. لا تاخذين اكثر عشان ما تكبر عضلاتج مثل المصارعين .. كيلو يكفي وشيليهم كل يوم .. ابدي ب 10 مرات لكل يد وكل 3 ايام زيدي 5 مرات لكل يد …

6.الوزن اسبوعيا فقط .. تقلبات الوزن تأثر في النفسية .. يعني اذا وزنتي كل يوم بيكون الوزن متقلب.. بس لما توزنين بعد اسبوع وانتي ناقصة كيلو ونص أو اثنين .. بترتفع نفسيتج وايد ..

7. لا تكثرين من النشويات يعني اذا حبيتي اختاري من الانظمة الي عطيتج اياها أو كليها مره وحدة في اليوم يعني 2 توست الصبح او كوب أرز أو مكرونه على الغدا

8. كآفي نفسج وعاقبيها .. يعني اذا مرت 3 أو 4 أيام وانتي ما خربطتي .. كلي قطعة حلاوة أو شوكلت من النوع المفضل عندج عشان ما تحسين بحرمان ( والله يا بنات اول مره أحس طعم الكافي حلو للهدرجة .. لأن كنا ناكل كل يوم فتعودنا على طعمه )
وعاقبي نفسج اذا كلتي زيادة انج تمشين ربع ساعة زيادة ..

بعد الساعة 6 ما تاكلين إلا خضره وفواكه .. وبعد ال 8 تسكرين حلجج .. بس ماي

اهم شي تشربون ماي واااااااااايد على كثر ما تقدرون اشربوا … منها ما بتحسون بالجوع وايد ومنها
أن الماي مفيد في حالة تخفيف الاكل والرياضة لانج تفقدين سوائل وايد ولازم تعوضينها ..

يا بنات حياتي بدت تتغير من ناحية زوجي( التغيير الأكبر ) وأهلي .. أول كنت اروح السوق واخذ اي شي يركب علي .. وكنت دايما اروح ( ايفانز ) حق المقاسات الكبيرة .. الحين صرت اروح الأماكن الثانية .. صحيح اني اخذ اكبر المقاسات بس الاقي شي .. وانا اطمح انزل زياده عشان الخيارات تكثر عندي …

كان مقاسي 20 ومرات 22 الحين ولله الحمد 18 ومرات 16 …

أنا جربت كل أنواع الرجيمات .. كلها تقريبا.. ما نفع ولا واحد كلها أنظمة سريعة .. وعلى فكرة الي جربت اكثر من واحد توقف لأن مرة سمعت دكتورة تقول الجسم يتعب من كثر الأنظمة المتقلبة الي يمر فيها .. وبعدين ما ستجيب بشكل صحيح

خليج دكتورة نفسج .. ولا تتقيدين بنظام معين
,والارادة ثم الارادة

انتظر رأيكم في التعليقااااااااااااااااااات