الفطير المشلتت على أصوله وبكل أسراره

الفطير المشلتت على أصوله وبكل أسراره
مرحبا شلة الأنس في زاكي معكم صديقتكم الشيف Tender Heart

مقادير الفطير المشلتت من مطبخي :

كيلو دقيق/ ذرة ملح وتلتزموا بده يعني ما تحطيش معلقة صغيرة مثلا؟ لاء تشعريه ملح بس/ ٣ معالق كبار سكر/ سنة زيت/ ماء للعجن مبدأيا هيكون نص كمية الدقيق وننزل بيه شويه شويه ولو احتاجت ننسمها ميه بس/ نص كيلو زبدة للتوريق
الملاحظات:
١- الدقيق المستخدم انا جربت انواع كتير لكل الاغراض وكان بيطلع لها عرق والنتيجة ما تكونش مستحبة او زي ما انا عوزة
وعشان كده خلطت نص كيلو دقيق الضحي مع نص من دقيق الخمس نجوم لكل الاغراض وهنزل صورته ضمن الصور
الزبدة انا كان عندي الزبدة المرحرين او التونسي اسمها الورقة الذهبية وفيرن خلطت الاتنين ببعض المهم يكون عندي نص كيلو زبدة ممكن تستعملي النيوزيلاندي
٣- الملح ذرة ملح مش اكتر
٤- المية اللي هتستخدميها تكون ساقعة من التلاجة ( ساقعة ومش متلجة)
٥- العجين ما تتخدمش كتير يعني ما تفضلي تعجني فيها لحد ما تنشطي الجلوتين وبعد كده تكون صعبه في الفرد معاكي لاء يا دوب تتشرب المية وتمسك نفسها وما تلزقش
تيجي واحدة تقولك الفطير لازم عجن ولت كتير؟ سوووري بليز بلاش فتي كتير واركني في جنب
اخر حاجة وانتي بتفردي ما تفضليش ترقي فيها جامد والكلام الاهبل ده لاني سمعته وطبقته كتير والنتيجة كانت يا اما العجينة تتقطع وبكده الفطير يكون باظ مقدما يا انا هتضطري تتعاملي بحرص بالغ عشان ما تقطعيهاش بعد وجع القلب ده !
التقطة المهمة وكررتها كتير العجينة ما تتقطعش منك نهائيا
ندخل في الطريقة:
هننخب الدقيق ونضيفله الشكر والملح ونقلبهم وبعدين نبتدي ننزل بالمية الساقعة شويه شويه زس ما تكوني بتقلبي بطراطيف صوابعك بس يا دوب تتشرب الميه وتمسك نفسها وما تلزقش ما تحطيش ميه تاني ولو احتاجت نسميها مية بس وشوفي قوامها

والصورة هتوضح ان شاء الله
بعد ما عجينتي اصبحت جاهزة بغطيها واسيبها ترتاح تلت او نص ساعة
بعد كده برش الرخامة دقيق خفيف وافردها ع شكل مربع واكون محهزة الزبدة بتاعتي مطرياها تكون في قوام الجبنة المثلثات يعني مش سايحة ومش جامدة من التلاجة واوعي تسييحعا ع البوتجاز وبعدين تشتغلي بيها
نفرد الزبدة كويس جدا ع العجينة بحيث تغطي كل جزء فيها وبعدين نلفها رول وبعدين تقسمي الرول ده ع حسب ما انتي عوزة حجم الفطيرة بتاعتك وما تصغروش اوي لان الصغير اوي ده مش منظر ظريف
ندهن القطع زيت كويس ونغطيها ونريحها تلت او ربع ساعة وبعدين ندهن الرخامة زيت خفيف ونبتدي ناخد قطعة قطعة نفردها ع شكل مربع وبعدين نقفل المربع ده زي الظرف بحيث كل الاطراف تكون لجوه عشان نحبس الزبدة وبعدين نكورها والصور هتوضح الكلام ده

بعد ما عملناها كوره نريحها وندهن وشها زيت خفيف جدا
والرخامة بتاعتنا مدهونة زيت هفيف بردو ناخد كورة نفردها بالنشابه بالراحة هتطلع معاكي مدورة وشكلها مظبوط تجيبي الصينية بتاعتك مدهونة زيت خفيف وتشيلي الفطيرة تحطيها فيها وتكرري نفس الخطوة مع باقي الكمية
واخر حاجة تبللي ايدك زيت او سمنه بلدي وتنسمي وش الفطاير بتاعتك قبل ما تدخل الفرن
نشغل الفرن ع ٢٠٠/٢٢٠ ونسخنه كويس ع ما ترتاح الفطاير شويه بعد الفرد وبعدين ندخلها وما تفتحتش عليها الا لما تبتدي تلون عشان ما تهبطش منك لانه بيكون منفوخ وعالي جدا في الفرن
اول ما تطلع ببخاخة المية بتاعة المكوة رشيها ميه خفيف جدا عشان الوش يطري ويطلع زي بتاعتي ولمعيها سمنة بلدي سايحة وباردة او زيت
وبالف هنا ودعواتكم ليا

المقدار نص كيلو دقيق لكل الاغراض/ رشة ملح / حوالي 125 جم زبدة / 250: 275 مل ماء / معلقة صغيرة زيت بلم بيها العجينة في الاخر
مهم جدا الدقيق يكون لكل الاغراض
مهم جدا العجينة ما تتقطعش منك في اي مرحلة من مراحل الفرد والتطبيق
الزبدة ما تكونش سايحة ولا جامدة من الفريزر عشان تتفرد بسهوله ع العجين بدون ما تقطعها
الخبز ع 220: 240 رف وسطاني
دعواتكم وكل سنة والجميع بألف خير ⚘