ستيك دجاج بصوص الكريمة والطعم يا ليل يا عين

معكم صديقة زاكي المميزة الشيف لينا عرار

ستيك دجاج بصوص الكريمة:

بنحتاج قطعتين صدور دجاج مخلي من العظم العدد حسب الرغبة بنتبلوا بليمون واكليل الجبل وفلفل اسود واذا متوفر صوص الباربكيو المدخن بنتبلهم ساعة فاكثر بعدها بنحطهم بكيس بلاستيك شفاف وبندق قطعة الستيك لتفرد منيح وبنحطهم بالجريل ع الوجهين لحتى يتحمروا يوخذوا نقشة الجريل بنحط زبدة وتتبيلة الدجاج الباقية بقلاية وبنحط قطع الدجاج وبنوطي الغاز وبنغطيهن لحتى نتاكد انهم استوا من جوا

بنسلق معكرونة سباغيتي وبنسلق بطاطا لحتى تستوي منيح بنقشرها وبنحط عليها قطعة زبدة صغيرة مع ملح وفلفل اسمر وبابريكا وبنحرك منيح في طنجرة نشوح بصلة مفرومة ناعم مع سنين ثومة مهروسين وبنحط فطر مقطع شرايح مع ملح وفلفل اسود ومكعب ماجي بنحرك منيح وبعدها بنحط علبة كريمة وبنتركهم يختلطوا سوا حتى تقريبا يثقل الصوص بنحط معلقة كبيرة صويا صوص

في صحن التقديم بحط الاسباغيتي وبشربها شوي من صوص الكريمة بعدها قطعة الدجاج الستيك وبجنبها البطاطا او الخضار المسلوقة حسب الرغبة وصحة ومية هنا