فاصل ضحك يا شلة الأنس
نصطحبكم معنا في قسم المنوعات في زاكي, لمقالة لزيزة ودمها خفيف, ننتظر رأيكم في التعليقات.
للضحك
#كيد_نسوان
سمعو شو عملت بجوزي وعطوني رايكن بهمني.
كتير عما لاحظ عليه موبايلو بإيدو 
اذا فاق بيمسكو .. وإذا أكل بيكون حده .. حتى إذا نام بيعبطو 
هالشي خلى الفار يلعب بعبي .. حركاته مو طبيعية .. صرت أتلفت حوليه لحتى فهمت انو عما يحكي مع وحدة عالفيس .. وعامل حساب مسميه (( العاشق المتيّم ))
فورا” فتت عالحساب ماعندو غير صديقة وحدة إسمها (( الفراشة الذهبية )) يبلاها بقتلا بتشبه كلشي إلا الفراشة .. حاطة صورتا متمكيجة ومزينة حالا .. طالعة بتشبه صحن المسبحة وقت نجيبو من المطعم
ولا شعراتها فلافل
اول شي انقهرت كتير بس .. هديت شوي واخدت نفس عميق وفورا نشرت منشور عالفيس مشان يساعدوني الصبايا وأقدر راقب بروفايلو ☻
_ماشالله الصبايا بالكروب بخيطو للبرغوت قميص .. ساعدوني وعطوني اسم برنامج مراقبة وراقبتو
اول ليلة راقبتون بالفعل المحادثات مو طبيعية عشقان أخونا بالله لشوشتو .. ومسمي حالو هالقرد ((تيم))
وهوي أسمو (( سعدون )) الله لا يسعد ايامو .. واتفق هوي وياها على كلشي .. الزواج .. والسكن .. وووو الخ 
سكرت الدردشة لانو كان رح يسكر قلبي من الوجع .. صرت بدي فكّر على خطة جهنمية ابعدون عن بعض .. ويترك النت نهائيا” 
ضليت أسبوع بالكامل راقب الدردشة .. كرمالون عما يتطورو .. حب .. وغزل .. وهيا م .. وشو لابسة ؟؟ وشو وشيّات
فكرت بخطة .. عملت حساب لضابط بالجيش وبحبشت على صورة على جوجل للاقيت اكتر صورة لضابط بالجيش بخلي الواحد يستهاب منها ..
ووين في صفحات للجيش .. وتم الدعس على الدواعش .. إلا ما اشتركت فيها
وعبيت صفحتي معارك طاحنة .. وصواريخ .. وهواوين
جهزت كلشي .. وصورت المحادثة يلي بينو وبينا ..
عالسهرة ونحنا سهرانين فورا” فتحت على صفحته (( العاشق المتيّم))
قلتلو : ولك سعدون 
رد علي : مين سعدون انا اسمي تيم ?
قلتلو : خراس ولك .. منك عرفان مع مين عما تحكي ..انا بعرف اسمك الثلاثي .. وبعرف عنوانك .. وبعرف رقمك 093375*** وحتى بعرف الداية يلي ولدتك وحتى اسم المطهّر
_ وهي صورة المحادثة مع شخص بهمني .. إذا عاد بتفكر تحكي مع هالبنت أو مع غيرا بدي ادفنك تحت سابع أرض .. ويا ويلك ها .. اسمك صار بكل الحواجز
……..
جوزي حمرن وخضرن وصفرن وصار يتأتأ ..
فورا” سكر حسابه .. لغى كل التطبيقات من فايبر .. وواتس .. وفيس .. وايمو
شال بطارية جوالو وشلفا فوق الخزانة
وكل الليل يصلي قيام الليل
وهلق كل شوي يروح ويرجع ويقلي ادن العصر ولا لسا ؟؟
ا