الفطير المشلتت المصري
معكم صديقة زاكي المميزة الشيف Maha Albe
الطريقة:
3 كاسات طحين .. رشة ملح .. معلقه سكر .. معلقة حليب بودرة اختياري .. معلقتين زيت
بنعجنه منيح بماء دافيء و نتركه يرتاح نص ساعه
منمد العجين على سطح نظيف مع رشة طحين ليصير كتير رقيق و مندهنه كامل سمنه بلديه بس تكون لينة بحرارة الغرفه و ممكن ذبدة كمان لينه مو دايبه
و نلفه متل السينابون
و نقطعه قطع متوسطه الحجم حسب الحجم ال بدكن ياه
هلآ بنجيب صحن كبير و بندهنه زيت كميه و نحط العجين و كمان فوقه زيت بكميه و نتركه يرتاح ربع او نص ساعه مغطى
نرجع نفرده على شكل مستطيل و نسكره متل الظرف و بعدها نسكر الاطراف على شكل كرة
و نتركه يرتاح
منفرد كل كرة حسب الحجم ال بدكن ياه
و منحطه بصينيه غلفتها بورق زبدة و ندهن الوجه ب سمن
و يفوت فرن ساخن حرارة 220 او 200
بياخد تقريبا 10 دقائق ربع ساعه المهم ما نفتح الفرن غير بس ينفخ و يبدا ياخد لون
نفتح الشواى و نكمل تحمير الوجه
بس نطالعه من الفرن منرشه بقليل من الماء و ندهن الوجه بسمن او زيت
و نغطيه ليطرى الوجه ثم يقدم بجانب القشطة والعسل والف هنا وشفا
