بين الطنة والرنة ضعت بين الحماية والكنة الحلقة 4

بين الطنة والرنة ضعت بين الحماية والكنة الحلقة 4
نكمل لكم هذه القصة الشيقة والممتعة والتي نقدمها لكم في قسم المنوعات في تطبيق #زاكي, قراءة ممتعة نتمناها لكم

#بين_الطنة_والرنة_ضعت_بين_الحماية_والكنة

الحلقة الرابعة
بعنوان فنون حماتي

( افتحي يا هند افتحي يلي ما بتنضبي ببيوت افتحي)
( بفتح ليش ما بفتح شو شفتي علي لحتى ما انضب ببيوت )
( ولك مفكرتيني ما بعرف انه انتي عملتي ايشي بالمي خربت الاواعي )
( عمتي لو سمحتي لا تحطي اغلاطك علي انا شو دخلني )
( ولك انتي حية من تحت تبن بس الحق مو عليكي الحق على ابن بطني الي مو عارف يحطلك حد)
( يا عمتي يا حبيبتي انتي ليش حاطة نقري طب والله غلاتك من غلاة امي )
بصوت واطي ( تحبك حية انتي وامك )
( شو حكيتي عمتي)
( ما حكيت ايشي عم بحكي انزلي لتحت حضري الغدا هسا بجي زوجك)
لحقتها وانا بحكي بقلبي هو انتي لسا شفتي ايشي
بسرعة دخلت عالمطبخ وحضرت الاكل البايت وجهزته مع جية سامي وابوه وعينكم ما تشوف حماي كيف بيطلع بمرته
سامي لاحظ الوضع مش طبيعي فحب يطري الجو
( عندي فكرة شو رأيكم نطلع رحلة انا وانت يابا وانتي يما وخواتي وولادهم)
رد عليه حماي وحكاله ( وشو الي بده يشيلنا كلنا )
( تخافش يابا صاحبي عنده باص بريجو وصاحبي التاني عنده بيكب انا بدي اخد الباص وخلي زوج اختي حورية يوخد البيكب وايشي بركب هون وايش هون )
( اذا هيك ما في مشكلة مش غلط خلي هالاولاد يفرحو )
( شو يما ما سمعتك حكيتي ايشي)
( الي بدكم اياه بس انا بركب معك )
( هو انا يما بقدر امشي بدونك انتي مش بس معي انتي بجنبي خلص معناتو بعد بكرة يوم الجمعة بنقول يا الله خبرو حورية ونجاة يحضرو حالهم)
ويوم الخميس كانت التحضيرات
( اه يما يا حورية اخوكي الله يرضى عليه بده يجيب اللحمة والجاج ))
( بس يما مش يجب لحمة متل هديك تبعة الرحلة الماضية كانت نية ومش مستوية والله العليم انها كانت مجمدة مش بلدية)
( شو هالحكي اخوكي بجبش الا بلدي،،، هسا المهم انتي بتجيبي العصاير وشوية شيبس وشوكلاطة للولاد خليهم يحركو تمهم الطريق طويلة وبتجيبي معك حصيرة وفرشتين نقعد عليهم فهمتي ولا ارجع اعيد )
( خلص فهمت على بركة الله )
( يلا خليني احكي مع اختك نجاة )

( ايوا يا حبيبتي يا نجاة اسمعي يما هسا كنت احكي مع اختك وحكتلها شو تجيب معها وانتي عليكي التلج والفحم والكانون وجيبلك شوية بزر بطيخ واعمليلك قالب كيك خلينا نوخده معنا اه شو فهمتي مش تنسي ايشي )
( لا يما اتوكلي عالله )

( هند تعالي لهون)
( نعم عمتي )
( روحي طوليلك صفتين دوالي من الفريزر بدك تلفيهم للرحلة لانه الولاد كتار وهسا بهجمو عاللحمة يا دوب تكفي)
( طيب عمتي عادي اخد الدواليات عند امي تساعدني فيهم بنلفهم سوا)
( روحي ولا تطولي)
اخدت هالدواليات وبوجهي على امي وقبل ما افوت عالدار دقيت على ام حسين عالباب وحكتلها تلحقنا عند امي
طبعا ما لحقت اوصل كانت ام حسين جاي اصيلة هالمرة
( شو يا هند مش محوشتيلنا ايشي هيك ولا هيك )
( اطمني خالتي ام حسين لما بكون في ايشي انتي اول وحدة رح تعرفي
اه يما هسا خلينا بموضوعنا بكرة الساعة ستة الصبح بتكوني عندي عباب البيت)
( ولك بلاش عمتك تعمللنا قصة)
( ليش امي وبدي اخدها معي عالرحلة بعدين اللحمة زوجي جابها ما بكفي بده يطعمي بناتها وولادههم وهسا خليني اروح قبل ما تغيب الشمس ) اخدت طنجرة هالدواليات الي ساعدتني فيهم امي وام حسين وام تيسير وام زهير وبناتهم مع اني ما حكيتلهم اني جاي بس خلص هالحارة الاخبار فيها بسرعة بتنتشر
حتى ام تيسير وهي قاعدة صارت تحكيلي الله يسعدك يا هند يا هيك البنات يا بلا مش زي بنتي زهور قديش الها متزوجة بحياتها ما حكتلي تعالي معي يما
المهم وصلت البيت عجية سامي
( يعطيك العافية يا حبيبي والله انك بتتعب الله يعطيك العافية)
( الله يرضى عليكي يا هند والله انك بنت اصل ،،، اه شو محضرتيلنا للسهرة )
( والله ما عندي ايشي)
( ما هي نملية امي مليانة كان اخدتي منها شوية قضامة نتسلى فيهم الليلة بما انه الليلة الخميس)
( خلص وحياتك بعد اليوم رح اصير اخد كل شي بهالنملية )
وسامي الي كان بده يسهر ويوكل قضامة لما صارت الساعة عشرة كان بسابع نومة وانا حطيت راسي ونمت عندي فيقة بكير الصبح
والساعة خمسة ونص الفجر حماتي صبحت تدق علينا صحيت وبلشت احضر بهالاغراض وحطيت طنجرة الدوالي عالغاز حتى تلحق تستوي فش نص ساعة ولا امي جاي
حماتي كان في براسها عقل وطار
( وليه هند امك شو جابها)
( والله حكيت لحالي حرام قاعدة بهالبيت لحالها خليها تيجي تتسلى)
( بس انتي عارفة اللحمة عالقد)
( هي شو كاينة بدها توكل كم سيخ كباب على كم سيخ شقف )
لوت تمها وما عجبها الحكي
صحي سامي ورحب بامي وقام لبس هالشرط وهالبلوزة الصفرا وطاقية خضرا وحكالي هند تنسيش توخديلي معك دشداشتي النص كم عشان بس ياذن لصلاة الجمعة البسها واروح اصلي وخديلي معك الكرة وجيبي الشدة عشان نلعبلنا دق
ركبنا بهالباص واصرت حماتي تركب بحد سامي وحماي راح ركب جنب زوج حورية وانا وامي ركبنا ورا بالباص مع سامي
( سامي خد هي كم شريط اغاني لديانا حدا ومصطفى قمر وحكيم شغلهم خلينا ننبسط)
( ما هو المسجل خربان)

دزتني امي وحكتلي عادي بنغني احنا( ولطلع عالطيارة فوق واحلل براغيها وهالشباب اشكال الوان ويا سامي يا محليها )
نطت حماتي بتحكي ( لا هاي مش حلوة اسمعي هاي احلى يا شوفير دوس دوس الله يبعتلك عروس )
وكل شوي تعيد هالمقطع

( يما يا سامي وقف هون خلينا نوخدلنا بوكسة فقوس)
( يما يا سامي وقف هون خدلنا بطيخة بس دير بالك يضحكو عليك )
وقضت الطريق تتطلب لحتى وصلنا منتزه عمان القومي
وكل ما يعجبنا مكان تحت شجرة تعترض بدها مكان قريب عالحمامات ظل سامي يلف ويلف لحتى لاقى مكان لزق الحمامات
وبلشنا نطول بهالاغراض وسامي حط هالكانون ودار الفحمات وبنات حماي عملو مورجيحة وانا رحت اجيب اللحمة حتى نشكها
( سامي يا سامي وين اللحمة مش لاقيها)
( كيف مش لاقيتها انتي متاكدة انك حطيتها بالاغراض )
( والله متأكدة)
ودور لطش عاللحمة فش لحمة فص ملح وذاب انا متأكدة انها هي الي رجعت شالتها من اغراضي
( والله يما هاي مرتك اخرتها تنسى حالها او هي قصدا عملت هيك مستكترة علينا نوكل لحمة من تعبك وشقاك
وانا احلف وابرر وكلهم مش مصدقين والكل صار يطلع فيي بعين الغضب وما ظل قدامنا غير هالدواليات نوكلهم قلبناهم على هالسدر
( هند جيبي السلطة الي امي عملتها)
رحت اجيب السلطة وحطيت فيها تلت معالق فلفل اسود وعطيتهم لسامي
وهون بلش حماي صوته يشقع ويرقع ما خلى ولا ستر مغطى عمرته وهي مش قادرة تحكي بتعرفو عشوي كان طلقها واختتم البهدلة تبعته ( والله انتي وكنتك بدكم حرق)

حكيت بعقلي مش مشكلة يا عمي الي بدق الباب بده يسمع الجواب وعلي وعلى اعدائي

….. يتبع في الحلقة القادمة
#حنين_طه