بين الطنة والرنة ضعت بين الحماية والكنة الحلقة 5

بين الطنة والرنة ضعت بين الحماية والكنة الحلقة 5
نكمل لكم هذه القصة الشيقة والممتعة والتي نقدمها لكم في قسم المنوعات في تطبيق #زاكي, قراءة ممتعة نتمناها لكم

#بين_الطنة_والرنة_ضعت_بين_الحماية_والكنة

الحلقة الخامسة بعنوان ( عيد حماتي )

والله اكلنا هالدواليات وعمتي طول القعدة تتطلع في ومش عاجبها لانه حماي الله يصلحه سملها بدنها وهو كل شوي يحكيلها الحق مش عليكي الحق على الي قبل يطلع معكم
والله وبعد ما شغل سامي هالكانون عملنا عليه بريق شاي وشوينا ذرة واكلنا
وجبنا هالشدة ولعب سامي وحماي وزوج نجاة وزوج حورية واحنا النسوان قمنا تمشينا شوي ودقينا عالطبلة شوي وقامو هالبنات الصغار يرقصو وكل هاد وحماتي لاوية حالها ومش طايقة حدا وبعد صلاة العصر ضبينا هالاغراض ورجعنا عالبيت وطول طريق الرجعة الكل نعسان ونايم مش عارفة هو احنا كنا برحلة ولا بمعركة ولما وصلت عالبيت
لقيت اللحمة محطوطة عشاحط الدرج شميتها كانت لسا فيها روح ورحت حطيتها جوا بالتلاجة بلاش تخرب وطلعت على بيتي مش ناقصني اسمعلي كلمتين

( شو يا هند شو بتعملي )
( عم بحسب قديش ظايل لعيد الام احنا متعودين كل سنة نعمل لامي حفلة صغيرة )
( هو بتاريخ متى بيجي )
( سامي ما بتعرف متى عيد الام ب واحد وعشرين تلات )
( اه يعني بعد اربع ايام مش اني بعرفش بس امي بتحبش هاي الشغلات دايما بتحكي هاي كلها خرافات ملهاش داعي)
( يلا منيح انا الله يسعدك يا سامي بدي تعطيني عشر ليرات اشتري لامي شنتة وحفاي بعيد عنك )
( خلص ابشري كم هند عندي قومي هند اطفيلنا هالضو مع ضحكة صفرا )

سامي للامانة كان زلمة بيعطيني على قد قدرته يعني ما بقدر احكي انه كتير منيح ولا عاطل احسن من غيره يعني عالاقل بظل احسن من زوج حورية بنت حماي حسب ما سمعت من ام رفعت جارة حماتي انها حورية كل اكم شهر بتيجي لاهلها ماكلة قتلة ومفرقة بس بتستاهل لسانها طويل وما بتنضب بتمها حبة فول

( اهلا وسهلا خالتي ام رفعت زارتنا البركة )
( اهلا يا هندلسا عم بحكي لحماتك ناديلنا على كنتك خلينا نشوفها ونقعد معها )
( بلا كتر حكي هند مش فاضية روحي يا هند حماكي جاب شوية فريكة افرديهم على سدر واطلعي عالبرندة عالشمسات نقيهم بدنا نلحق نطبخ )

هند نظفي الجاجات هند نقي الفريكات هند اغسلي الملوخيات هو فش غير هند بهالبيت مسكت هالفريكة وحطيتها عالسدر وبلشت انقي فيها ولما اجيت اخلصها اجتني حماتي روحي يا هند انشري الغسيلات واعطيني اكمل الفريكة )
( وام رفعت )
( روحت اطمني )
اعطيتها السدر وروحت اخدت سلة الغسيل وطلعت عالسطح انشرهم وهناك شفت جارتنا ام سميح
( السلام عليكم يا خالتي كأني اول مرة بشوفك )
( اه انا ام سميح بس ما بجي عليكم كتير )
( ليش من غير شر )
( حماتك بتحبنيش )
( له شو هالحكي هاد يا خالتي ليش)
( عندك للسر مطرح ولا متل حماتك )
( احكي ولو احكي سيرك ببير يا خالتي)
( من يوم ما مات زوجي وهي مش طايقتني خايفة من ابو سامي عينه تزيغ هيك او هيك )
( يا لطيف ذمتها لحماتي شو وسيعة اسمعي خالتي كل يوم ها كل يوم الصبح انا عازمك عفنجان قهوة ولو انتي ست الكل )
( يييييييي الله يسعدك والله حماتك هالكرنيبة ما بتستاهل كنة منيحة متلك )

( ولك يا هند كل هاد بتنشري بالغسيل فعلا انك نايطة نسوان اخر زمن )

( معلش يا خالتي بدي استسمحك بدي اروح قبل ما تعملي قصة )
وهي اجتني عرجليها اذا ما بخليكي تفلفلي يا ام سامي ما بكون انا هند بنت ابتهاج
والله وتاني يوم اجت عندي الخالة ام سميح هو سامي طلع من هون وهي اجت من هون وانا اصريت انه اقعد انا وهي بحوش البيت المشترك وسبحانك يا رب بهاليوم حماي تعب وبطل يروح عدوامه مش عارفة شو تعبان فيه انا قدامي كان متل الحصان المهم الله يشفيه وعمتي شافت هالشوفة ونزلتلي عحوش البيت
( وليه هند انتي شو مقعدك هون مع ام سميح )
( ليش مالها خالتي ام سميح بتجنن وعسلامتها)
( انا ما حكيت ايشي على قعدة ام سميح انا بحكي عنك انتي الي تاركة بيتك معفن والنمل بسرح وبمرح فيه وجاي هون تشربي قهوة من الصبح )
( ييييييي هسا انا عفنة والله عشنا وشفنا خليني ساكتة احسن )
( بدي اقصلك اياه لسانك عشو بدك تحكي ولك انا نظافتي وعدالتي كل العالم بشهدولي فيها مش متل امك ولك اساسا انا ما كنت بدي اوافق عليكي من ورا عفن امك هالقد كان عش الشعشبون عالحيطان لما اجينا خطبناكي )
( انا امي لقيتي ببيتها شعشبون عمتي اذا بدك امي بتعرفك شو يعني نظافة )
وطلع عصوتنا حماي وام رفعت وما سكتنا غير لما سمعنا صوت عمي بحلف يمين اذا ما سكتنا انا وهي غير يطلقها ويخلي سامي يطلقني ويطقها زيجة من تاني يوم هو وابنه وقتها حماتي سكتت وفاتت عبيتها وانا اختصرت وطلعت عبيتي
والمسا لما اجا سامي ميل على اهله قبل ما يجي لعندي ما هو هيك متعود بروح بأدي الولاء والطاعة بعدين بجي لعندي ولما راح عندها استفردت فيه وحكتله شوصار طلع لعندي سامي ما بيتحاكى بدكو الصراحة استغربت منه يعني سامي مش هالزلمة الا بياخد موقف بس شكلها معبية راسه لخلته يفقع
( انا ما بدي اسالك يا هند علي صار بينك وبين امي لكن هم كلمتين علي الطلاق منك اذا ما بتنزلي هسا تبوسي ايدها وتعتذري منها ما بتظليلي ببيت )
( لا شو بتحكي انت هاي متل امي وهسا بنزل بستسمح منها )
كنت بدي هو التاني انفش طرحته بس مش حلوة ارجع مطلقة عبيت اهلي وانا لسا عروس لهيك قلت يلا يا هند عديها وخليها بالقلب تجرح ولا تطلع لبرا وتفضح

نزلنا انا وسامي لعندها واول ما شافتني لفت وجهها
( يما انتي الكبيرة وهند غلطت وهي جاي هسا تستسمح منك )
( كيف بدك اياني اسامحها بعد ما قللت ادبها علي قدام ام سميح والجارات)
( خلص يما اعتبريها بنتك وغلطت )
قربت حتى اسلم عليها مدتلي ايدها ابويها مش مشكلة يا ستي الايد الي ما بتقدر عليها بوسها وادعي عليها بالكسر
( ايوا هيك يما هند برضاي عليكي روحي اعمليلنا غلاية قهوة )
دخلت اعمل قهوة لحقني سامي ( الله يسعدك يا هند بعرفك مربية وما بتكسري كلمتي هسا بس تقدمي القهوة اطلعي استنيني بالبيت والبسيلي البيجامة الستان الي جابتلك اياها جارت امك )

حماتي فكرت انها كسبت هاي المعركة بس انا هند وما بتعرف شو رح يجيها ايام سودة مني

سامي ابن امه ما بقدر يخبي على امه ايشي كاني قلتله عن عيد الام عشان يحكي لامه مسكها من عندي وراح حطها بدانها نفظت حالها
(انا بدي عيد ام كمان وانا بدي تعملوه بنفس اليوم هي تروح عند امها قبل يوم او بعد يوم )
( بتموني يما الي بدك اياه بصير )
( واسمع ولى لا تكون طرطور انت مامعك مصاري لهند وامها وهدايهم احكيلها ما معي مصاري مش ضروري والله ام حسام تلبس حفاي وشنتة جديدة )

وطبعا طلع عندي سامي مشحون ما هو حافظ مش فاهم
( هند انا رح اعطيكي تشتري لامك هدية بس اوعي تجيبي سيرة لامي ونبهي على امك اذا بالصدفة شافت امي تروح تحكيلها انك اهديتها ايشي بعيد الام وصحيح بدي اعطيكي عشرين ليرة مش عشرة بتشتري بطريقك هدية لامي حرام خلينا نفرحها )

والله انا ما كذبت خبر اخدت هالعشرين ليرة وصرت الف بهالسواق يخرب بيتهم هالبياعين كل شي غليان
الحفاي الي كنت اشتريها بخمسة صايرة بسبعة وقد ما فاصلت اخدت هدية امي وحماتي بسبعطش الليرة والباقي اشتريت فيه عوامة وكرابيج حلب وروحت عالبيت احضر لحفلة حماتي مع انه كان قلبي ناغصني لانه حرمتني اروح اول يوم على امي اما هي اتصلت عبناتها يجو اول يوم ما على اساس حرام عيد الام ولا لو الغيرة ما حبلت الاميرة
عملت كم باكيت جلي وحطيت العوامة وكرابيج حلب وخليت سامي يجيب باكيت غريبة وبرازق وغنينا شوي وقعدنا نوكل
وقدمتلها انا مني الحفاي وسامي الشنتة وحورية كانت جايبة لامها قميص نوم قطن وحورية جايبة يانس صلاة

( ولك حورية زوجك شو خلى ولادك يجيبولك هددية يعيد الام )
( والله يا هند ما خلاهم يجيبو ايشي مقهورة نفسي يجبلي ايشي)
( بدك الصراحة زوجك ما بستاهلك انا مش عارفة على شو قبلانة فيه اعمليها حردة وظلك هون يخرب بيته عالاقل يجبلك ايشي يركبلك قنينة عطر من المكتبة او يجبلك حجاب اميرة بس هيك ايد من قدام وايد من ورا والله ما بصير )
( والله كلامك صحيح يا هند هسا بس يرجع يوخدني انا مش راجعة معه )
( عفارم عليكي اعملي لحالك قيمة )

( نجاة وك نجاة تعالي جاي زوجك شو خلى ولادك يجيبولك هدية )
( بتصدقي يا هند صرلي عنده عمر بحياته ما حملي ايشي)
( وااال عليه عالاقل يجبلك مزهرية بهاليوم يا ستي يجبلك طقم اساور ذهب روسي بس هيك بدك رأيي لا ترجعيله الا لما يتربى هيها حورية حلفت يمين ما ترجع لزوجها الا لما يعرف قيمتها )
( اختي حورية هيك حكت )
( اه والله هلا قبل شوي خبرتني )
( هي كاينة احسن مني وانا كمان مش راجعة )

وخلصت الحفلة وكل وحدة قعدت مكانها ولا وحدة رضيت تروح ولكو يهديكم ربي روحو عبيتكم ابداا اصرو يحردو قال لحتى يعلمو ازواجهم الادب

وهيك صرنا واحد بواحد يا ام سامي خليني اقوم انام عشان اصحى بكير واروح احتفل بعيد الام عند امي وجاراتها
…….. يتبع في الحلقة القادمة

#حنين_طه