بين الطنة والرنة ضعت بين الحماية والكنة الحلقة 6

بين الطنة والرنة ضعت بين الحماية والكنة الحلقة 6
نكمل لكم هذه القصة الشيقة والممتعة والتي نقدمها لكم في قسم المنوعات في تطبيق #زاكي, قراءة ممتعة نتمناها لكم

#بين_الطنة_والرنة_ضعت_بين_الحماية_والكنة

الحلقة السادسة بعنوان ( حماتي ازمة حياتي )

وهي لفينا هدية امي خليني اشوفلي فستان البسه تحت عبايتي اكيد هسا بالحفلة بتكون ام حسين وام زهير وام تيسير وبناتهم
اخدت هالهدية ونزلت عالدرجات
( بسم الله الرحمن الرحيم عمتي انتي هون)
( لوين رايحة يا ست هند)
( اليوم عاملين حفلة عند امي وبدي اروح عندها)
( وشو هادالكيس الي حاملتيه بايدك )
( هاد ولا ايشي سلامة خيرك )
( طيب افتحيه قدامي اشوف)
( يا عمتي شو بدك فيه )
( اذا ما فتحتيه ما في روحة )
فتحتلتها الكيس ضربت ايد على ايد
( يعني ما صار الا وزوجك اعطاكي مصاري تجيبي هدية لامك)
( لا يا عمتي هدول مش من مصاري سامي هدول كانت امي باول ما تزوجت معطيتني عشر ليرات ضبيتهم واشتريت لامي هدية )
( اه وايش ما حكيتلي عنهم ولا خفتي نوخدهم منك )
( لا ولو بس انا حكيت مش محرزات اخبرك عنهم )
( وليش جايبة لامك لون بيج وانا جبتلي اسود ولا لتكون امك بتفهم باللبس اكتر مني ولا شايفتيني ختيارة وعجزت)
( حسيت الاسود بطلع حلو عليكي قصدي الحفاي بتطلع حلوة على اجرك )
( هاتي جاي انا بدي اخد هدول وفوتي خدي السود لامك )
( يا عمتي هدول اجو على اسمها لامي )
( والله انا حكيت الي عندي عجبك عجبك ما عجبك باخدهم التنتين )
امري لالله اعطيتها الي لونهم بيج واخدت السود لامي وقبل ما اطلع من عندها
( جيبلي معك من كل شي بتعملوه هناك )
( بصوت واطي تيجيكي موجة يا شيخة )
( هند كنتي حكيتي ايشي )
( لا سلامتك عمتي بحكي تكرم عيونك )
( طيب سلمي على امك واحكيلها عمتي كانت بدها تيجي تعايد عليكي بس صار عندها ظرف مش تحكيلها بنات حماي حردانات عندها ترا بعرفه لسانك بده قص)
( لا شو احكيلها تخافيش عمتي الي بصير بهالبيت بظل بهالبيت يلا بخاطرك )

يا ربي شو بدي اخد بايدي حلو لامي ما عملتلها ايشي
احسن ايشي اميل على ابو عدنان الخضرجي اخد من عنده شوية فواكه
وبالفعل مريت لعنده اخدت تنين كيلو تفاح وتنين كيلو موز وروحت عند امي
وهناك كانت ام حسين لابسة هالدشداشة الزرقا بتجنن جايبلتها اياها اختها لما زوجت ابنها وام تيسير وام زهير على حالهم
وامي لابسة طقم اهدتها اياه بالزمنات ستي وسوسن وميرفت بنات جيرانا شاريات فيلم وحاطته بقلب الكاميرا فيه ستة وتلاتين صورة
والسفرة ما شاء الله كانت مليانة وممتلية امي عاملة سدر هريسة وام حسين عاملة قشطة بعسل وام زهير عاملة قزحة وانا رحت حطيت هالفواكه عجاط وحطيته عالطاولة عشان يطلع بالصور
وميرفت كاينة جايبة مسجل من عند بنات عمتها حطينا فيه شريط اغاني لايهاب توفيق كانت فيه اغنية رقصنا عليها كلنا اسمها سحراني ليل ونهار
المهم بعد ما رقصنا لشبعنا قربت علي ام حسين
( ولك يا هند ليش مش لابسة ذهبك ليكون سامي باعو )
( لا شو باعو موجود بس انا حكيت لحالي بلاش البسه بتعرفي انا جيت مواصلات بخاف حدا يسرقه )
( اه والله احسن ايشي بلاش يوخدوه وتصفي بلاه لانه سهيلة عرفتيها)
( مين سهيلة )
( ولك الي ابنها ماخد بنت بنتها لام رسمي الي ساكنة براس الطلعة )
( اه عرفتها مالها )
( كاينة رايحة تزور بنتها وواحد سارق منها اسوارة جنزير بتجنن يا حرام هي الحيلة والفتيلة )
( شفتي بحسبها لبعيد )
(صحيح يما عمتي بتسلم عليكي وبتحكيلك كانت بدها تيجي تحضر الحفلة وتقعد على قلبنا )
( وليش ما اجت )
( ما حكيتلكم ما هو بناتها التنين قاعدات بوجها اجوها حردانات ويمكن يطلقو ولا شو مفكرة كل البنات مربيات متلي مش كل وحدة بتنضب بالبيت وبتصير كنة )
خلصت الحفلة ومرق علي سامي بالليل روحنا

( هند قومي حطيلي ايشي اتعشى )
قمت عخزانة المونة بتذكر اني ضابة علبتين تونة وين راحو الله لا يجبرها هاي اكيد حماتي استغلت عدم وجودي واجت اخدتهم شو بدي اعمله هسا للزلمة يتعشى خلص بقليله بضتين مع حبة بندورة )

والله اكل سامي وشبع وحط راسه ونام وانا صفنت بالسقف شو هالحياة يا هند صرلك كم شهر متزوجة ولهسا ما ثبتي حالك بشقفة ولد والله بكرة حماتي لتفضحني وتنشرني وتدور تزوجه لسامي لازم الاقي حل خليني انام هسا وللصبح بفرجها الله

طلع سامي عشغله وانا ضبيت البيت ونزلت على دوامي التاني عند حماتي وبناتها كنت بوحدة صرت بتلاتة وقرودهم اه ولا هاي اكيد امهم الي بتحكيلهم يعملو هيك
اكيد عرفت اني انا لعبت براسهم ليحردو وخلتهم يقعدو ويتستتو بس عمين على هند بسيطة

( صباح الخير عمتي شو عم تعملو غدا )
( بدناش نطبخ اليوم قررنا نعمل عدس )
( اه يلا نعمة كريم )
( حماكي جاي عنده زبون من بلاد برا هدول الي عندهم شمس وحر كتير وجايبله بوكسة صبر هيها عباب المطبخ روحي نظفيلنا اياها انا والبنات بدنا نوكل )
( انا لحالي بدي انظف البوكسة )

نطت حورية ( اه نظفيها لحالك شو وراكي يختي )
( وحضرتك ست حورية ليش ما تقومي تنظفيها عشان توكلي انتي وولادك ولا الحنة بايدكي)
( روحي نظفيها ولا تكتري حكي )
( خير ان شاء الله)

روحت انظف البوكسه والله الشوك موتني ايدي ما عاد حسيت فيهم اطلعت من ورا باب المطبخ كانت حماتي وبناتها قاعدات وفاتحات التلفزيون عمسلسل عيلة خمس نجوم وفارطات ضحك
اخدت قشرتين صبر وفتت عغرفة حماتي مسكت قميصها النوم الي بتلبسه كل يوم بعد صلاة المغرب قلبته وفركت كل ظهره بقشر الصبر وطلعت عالمطبخ
( عمتي وهي صحن صبر كلي انتي وبنات حماي والف صحة وهنا )
(حطيهم هون واطلعي عبيتك بدي اقعد انا وبناتي لحالي )
(من عيوني اكيد الوحدة بتشتهي تقعد مع بناتها اذا احتجتي اي ايشي ها اي ايشي ناديني بخاطركم )

طلعت عبيتي وحكيت لحالي خليني انا كمان اعملي كاستين عدس بنتغدى عليهم عترويحة سامي
اجا سامي المغربيات وتغدينا بعد شوي سمعنا صوت حماتي بشقع بالعمارة الله لا يوفقك يا هند يا بنت ابتهاج

( هند احكيلي انتي عاملة ايشي)
( انا طبعا لا ليش انا دايما ماليش حظ معكم )
( ولا ليش امي بتردح وصوتها طالع عليكي )
فتحت عيوني وحكيتله ما بعرف
نزلتا انا وسامي عصوتها هي وبنات حماي بصرخو وبتشكونو لعمي

( خير يما شو في )
( اجيتي يا سوسة ولك من يوم ما فتي بيتي ما شفت الخير )
( انتي الي حطيتي لامي الشوك بقميصها النوم صح )
( الله عالظالم من وين لفقتولي اياها هالتهمة )
( ولك بتظلمي بلد بحالها )
( مش يمكن انتي ست حورية او انتي ست نجاة اعملتو هالعملة حتى تحطوها بظهري )
( شوف يا خوي بدك الصراحة مرتك لازمها ترباية )

صرخ فيهم عمي بس ولا صوت ( هند انتي الي عملتي هيك )
( طبعا لا يا عمي انت بتشك فيي بكفيش خلوني اعمل بوكسة الصبر وانا حامل )

قرب علي سامي ( انتي حامل )
( اه من يومين فحصت )
( مزبوط يا عمي يعني انتي بدك تجيبلي اول حفيد يحمل اسمي
اسمعو يا بنات من اليوم وطالع هند ما بتصيب ايشي احكيلي يا عمي مشتهية ايشي نفسك بايشي )
( بدك الصراحة يا عمي جاي عبالي كرشات)
( ابشري بكرة بجيبهم من عند اللحام وهي بنات حماكي بكرة بعملولك اياها اصلا احنا من زمان مشتهينها )

طلعت على بيتي وانا بلعب وبضحك صحيح كذبت كذبة كبيرة بس بدبرها اصلا انا هيك هيك بدي اروح على امي ونحكي لام حسين اكيد بتعرف وصفة تخليني احمل
وتاني يوم من الساعة تمنية الصبح كان عمي جايب الكرشات لحماتي وبناتها
للامانة الله يعينهم اذا انا ببيتي ومتت من الريحة بس يلا بستاهلو لعاد انا يخلوني هالمفتريات انظف بوكسة صبر لحالي
اجا سامي ونزلنا نتغدى والله طعمهم غير شكل هالكرشات
( انا بعرف الي بتحمل بتلعي نفسها مش بتنزل دبك باللكرشات)
( والله يا عمتي نفسي لاعية بس كرشاتك انتي ما بتعوضو ولا الفتة ايشي تاني تسلم ايدك حماتي )
خلصنا غدا وعمي حلف الف يمين ما اصيب ايشي
نجاة شالت الاكل وكنست تحته وحورية جلت الجليات
بعدها اجو التنتين على ابوهم بدهم يرجعو عبيوتهم ما استحملو يشتغلو يوم لامهم مع اني كنت حابة يخدموني شوي بس يلا بريحو هم وولادهم وهيك رجعت فضيت ساحة المعركة الي ولحماتي

….. يتبع في الحلقة القادمة
#حنين_طه